ودوشی گور:نئی دہلی

ہر چند روز بعد سید عابد حسین کے فون کی گھنٹی بجتی ہے اور دوسری طرف سے مدد کی ایک مانوس فریاد سنائی دیتی ہے۔کبھی خلیجی ملک میں پھنسا ہوا کوئی مزدور ہوتا ہے جس کا پاسپورٹ ضبط کر لیا گیا ہوتا ہے۔ کبھی بہار کی ایک پریشان حال ماں اپنے اس بیٹے کی تلاش میں مدد مانگتی ہے جو بیرون ملک کام کرنے گیا تھا اور لاپتہ ہو گیا۔ کبھی پاکستان۔ سعودی عرب یا ملیشیا میں پھنسے کسی ہندوستانی کے پاس نہ پیسے ہوتے ہیں۔ نہ سفری دستاویزات۔ اور نہ ہی وطن واپسی کی کوئی امید ۔۔زیادہ تر لوگوں کے لیے ایسی کہانیاں صرف ہمدردی پر ختم ہو جاتی ہیں۔ مگر عابد حسین کے لیے یہ ایک مشن بن جاتی ہیں۔

سید عابد حسین

سوشل میڈیا پر اور ہزاروں شکر گزار خاندانوں کے درمیان "حقیقی زندگی کے بجرنگی بھائی جان" کے نام سے معروف بھوپال کے رہنے والے انٹیریئر ڈیزائنر نے خاموشی سے اپنی زندگی کے کئی برس بیرون ملک پھنسے ہوئے ہندوستانیوں کو واپس وطن لانے کے لیے وقف کر دیے ہیں۔ وہ نہ کوئی معاوضہ لیتے ہیں۔ نہ شہرت کے خواہاں ہیں۔ اور نہ ہی کسی غیر معمولی صلاحیت کا دعویٰ کرتے ہیں۔ ان کے مطابق ان کی واحد خوبی یہ ہے کہ وہ کسی ایسے شخص کی امید نہیں توڑتے جو اپنے گھر واپس آنے کا منتظر ہو۔عابد اکثر کہتے ہیں کہ یہ اللہ کا کام ہے۔ جب کوئی خاندان مدد مانگتا ہے تو میں اپنی کوششیں شروع کر دیتا ہوں۔ میں کبھی یہ شمار نہیں کرتا کہ میں نے کتنے لوگوں کی مدد کی ہے۔

اتر پردیش کے ضلع امبیڈکر نگر کے گاؤں رودرپور بھگاہی سے تعلق رکھنے والے عابد 2006 میں مصور اور انٹیریئر ڈیزائنر کے طور پر اپنا مستقبل بنانے کے لیے بھوپال آئے تھے۔ ان کی ابتدائی زندگی میں کوئی ایسی بات نہیں تھی جس سے اندازہ ہو کہ ایک دن وہ ہندوستان کی انسانی خدمت کی دنیا میں ایک معروف نام بن جائیں گے۔ان کی زندگی کا رخ ایک ہی واقعے نے بدل دیا۔

سید عابد حسین اپنے بڑے بھائی کے ساتھ

کئی برس پہلے جب وہ رمضان نامی ایک نوجوان کی مدد کرنے کی کوشش کر رہے تھے جو بیرون ملک پھنس گیا تھا تو انہیں احساس ہوا کہ عام خاندانوں کے لیے بین الاقوامی سرکاری نظام سے نمٹنا کتنا مشکل ہوتا ہے۔ سفارت خانے۔ امیگریشن کے مراحل۔ قانونی دستاویزات۔ اور سفارتی کارروائیاں پہلے ہی پریشانی اور مالی مشکلات کا شکار خاندانوں کے لیے نہایت پیچیدہ ثابت ہوتی ہیں۔ایک کامیاب کوشش کے بعد پیچھے ہٹنے کے بجائے انہوں نے یہ خدمت جاری رکھنے کا فیصلہ کیا۔مہربانی کا یہی ایک عمل رفتہ رفتہ ان کی پوری زندگی کا مشن بن گیا۔ آج سید عابد حسین سیکڑوں ہندوستانیوں کو ان کے خاندانوں سے دوبارہ ملانے میں کامیاب ہو چکے ہیں۔ ان کی کوششوں کا دائرہ پاکستان۔ سعودی عرب۔ متحدہ عرب امارات۔ عمان۔ کویت۔ بحرین۔ ملیشیا۔ قطر۔ جنوبی افریقہ اور افریقہ کے متعدد دیگر ممالک تک پھیل چکا ہے۔

 ان کی خدمات سے ہندوستان کی تقریباً ہر ریاست کے لوگ مستفید ہوئے ہیں جن میں اتر پردیش۔ بہار۔ جھارکھنڈ۔ مغربی بنگال۔ مدھیہ پردیش۔ مہاراشٹر۔ کیرالہ۔ پنجاب۔ راجستھان۔ ہریانہ۔ اڈیشہ۔ دہلی اور اتراکھنڈ شامل ہیں۔ مذہب۔ زبان یا علاقہ ان کے لیے کبھی اہمیت نہیں رکھتا۔ ان کے نزدیک مدد کی ہر پکار یکساں توجہ کی مستحق ہوتی ہے۔انسانی ہمدردی کے میدان میں کام کرنے والی بہت سی تنظیموں کے برعکس عابد کسی باقاعدہ ادارے یا بڑے مالی وسائل کے بغیر اپنی خدمات انجام دیتے ہیں۔اکثر ان کا دفتر صرف ان کا موبائل فون ہوتا ہے۔جب کوئی شخص ان سے رابطہ کرتا ہے تو وہ سب سے پہلے ضروری دستاویزات جمع کرتے ہیں۔ شناخت کی تصدیق کرتے ہیں اور ہندوستانی سفارت خانوں۔ وزارت خارجہ اور اس ملک کے متعلقہ حکام سے رابطہ قائم کرتے ہیں جہاں وہ شخص پھنسا ہوا ہوتا ہے۔

@cgidubai@pbskdubai @HelplinePBSK @meaMADAD
JayHind Mr. Anil, from Ambedkarnagar who had fallen ill in Dubai, was discharged from Medeor Hospital there on June 8,2026, & —thanks to your assistance—he has returned to his home country. Mr. Anil is now back in India
Thanks
Regards pic.twitter.com/j6wurMIvb5

— Syed Abid Hussain (@Aapka_abid) July 5, 2026

 سوشل میڈیا بھی ان کے لیے ایک مؤثر ذریعہ ہے۔ وہ مسلسل آن لائن مہم چلاتے ہیں۔ متعلقہ حکام کو مخاطب کرتے ہیں اور میڈیا کی توجہ اس معاملے کی طرف مبذول کراتے ہیں تاکہ مسئلے کے حل تک دباؤ برقرار رہے۔یہ کام سب سے بڑھ کر صبر کا تقاضا کرتا ہے۔کبھی گمشدہ پاسپورٹ کی وجہ سے کئی ہفتوں تک مسلسل رابطہ کرنا پڑتا ہے۔ کبھی زیر حراست مزدور کے لیے قانونی مدد کا انتظام کرنا ہوتا ہے۔ کسی دوسرے ملک میں قید شخص کی وطن واپسی کے لیے مختلف سرکاری اداروں کے درمیان طویل رابطہ کاری کرنا پڑتی ہے۔اس کے باوجود عابد بہت کم ہار مانتے ہیں۔

وقت کے ساتھ ساتھ ان کی انسانی خدمات کا دائرہ مزید وسیع ہوتا گیا۔ بیرون ملک ہندوستانی مزدوروں کو درپیش مختلف بحرانوں کے دوران انہوں نے حکام اور متاثرہ خاندانوں کے ساتھ رابطہ قائم کر کے لوگوں کے انخلا میں اہم کردار ادا کیا۔ مختلف رپورٹوں کے مطابق انہوں نے بیرون ملک تنازعات میں پھنسے 150 سے زائد ہندوستانیوں کی وطن واپسی میں بھی مدد کی۔ اس کے علاوہ وہ بیرون ملک وفات پانے والے مزدوروں کی میتیں ہندوستان واپس لانے میں بھی معاون ثابت ہوئے تاکہ ان کے اہل خانہ ان کی آخری رسومات باوقار طریقے سے ادا کر سکیں۔

 سابق وزیر خارجہ سشما سوراج جو بیرون ملک مقیم ہندوستانیوں کی فوری مدد اور آسان رسائی کے لیے جانی جاتی تھیں، سید عابد حسین کے کام سے بخوبی واقف تھیں۔ مختلف امدادی کارروائیوں کے دوران ان کے درمیان ہونے والے رابطے اس بڑھتے ہوئے اعتماد کی عکاسی کرتے تھے جو انسانی خدمت کے جذبے سے سرشار شہریوں اور سرکاری اداروں کے درمیان قائم ہوا۔متعدد اعزازات اور عوامی پذیرائی حاصل کرنے کے باوجود عابد آج بھی خود کو ایک عام انسان ہی قرار دیتے ہیں، جو صرف وہی کام کرنے کی کوشش کر رہا ہے جسے وہ درست سمجھتا ہے۔ان کے مطابق ان کا سب سے بڑا انعام وہ لمحہ ہوتا ہے جب مہینوں بلکہ بعض اوقات برسوں کی جدائی کے بعد کوئی خاندان دوبارہ اپنے پیاروں سے مل جاتا ہے۔گھر واپسی کے ان لمحات میں کوئی ڈرامائی تقریریں نہیں ہوتیں۔

 زیادہ تر مواقع پر ہوائی اڈے پر بہنے والے آنسو ہوتے ہیں۔ والدین اپنے بچوں کو گلے لگاتے ہیں۔ میاں بیوی طویل جدائی کے بعد دوبارہ ملتے ہیں۔ اور بوڑھی مائیں ایک ایسے اجنبی کا شکریہ ادا کرتی ہیں جس سے وہ کبھی ذاتی طور پر نہیں ملتیں۔یہی لمحات عابد کی کامیابی کا اصل پیمانہ بن چکے ہیں۔آخر میں سید عابد حسین کی زندگی ہمیں یہ یاد دلاتی ہے کہ سب سے غیر معمولی ہیرو اکثر وہ عام لوگ ہوتے ہیں جو کسی ضرورت مند کی پکار سن کر نظریں نہیں پھیرتے۔ان خاندانوں کے لیے جو ان کی کوششوں کی بدولت اپنے پیاروں سے دوبارہ مل سکے، سید عابد حسین صرف "بجرنگی بھائی جان" نہیں ہیں بلکہ اس حقیقت کا زندہ ثبوت ہیں کہ ہمدردی۔ ثابت قدمی اور انسانیت ہر سرحد سے کہیں زیادہ طاقتور اور دور رس ثابت ہو سکتی ہے