پونے: میٹرو سٹی کا روپ اختیار کرتے پونے جیسے شہر میں جہاں تیز رفتار زندگی کے باعث اکثر لوگوں کے پاس اپنے پڑوسیوں کی خیریت دریافت کرنے تک کا وقت نہیں، وہیں ایک سماجی کارکن گزشتہ دو دہائیوں سے ضرورت مندوں کے لیے مسلسل مصروفِ عمل ہے۔ کسی مریض کو طبی ایمرجنسی کے دوران بروقت مفت آکسیجن مشین پہنچانے سے لے کر دور دراز گاؤں سے تعلیم کا خواب لے کر پونے آنے والے طالب علم کو رہائش، رہنمائی اور مالی مدد فراہم کرنے تک، خصال جعفری نے سماجی خدمت کو اپنی زندگی کا مقصد بنا لیا ہے۔

طبی، تعلیمی اور سماجی شعبوں میں ان کی مسلسل اور بے لوث خدمات کے اعتراف میں حال ہی میں منعقدہ ہندوستان کے 80ویں یومِ آزادی کے موقع پر پونے میونسپل کارپوریشن نے انہیں خصوصی طور پر اعزاز سے نوازا۔ پونے کی میئر منجوشا ناگپورے نے انہیں باوقار ’’پونے پرتھم سنمان چنہ‘‘ پیش کیا۔

’آواز دی وائس‘ سے گفتگو میں خصال جعفری نے اپنے سماجی سفر، خاندان سے ملنے والی خدمت کی روایت، ضرورت مند طلبہ کی مدد، طبی سہولتوں کی فراہمی اور مستقبل کے عزائم کے بارے میں تفصیل سے بات کی۔

سماجی خدمت کی چنگاری کالج کے دنوں میں بھڑکی

خصال جعفری کے لیے سماجی خدمت کوئی اچانک اختیار کیا گیا پیشہ یا وقتی جذبہ نہیں ہے۔ اس کی بنیاد ان کے خاندانی ماحول میں موجود تھی۔ ان کے والد پونے میونسپل کارپوریشن میں افسر تھے، جبکہ ان کے دادا بھی میونسپلٹی میں افسر کی حیثیت سے خدمات انجام دے چکے تھے۔ چنانچہ بچپن ہی سے انہیں عوامی خدمت اور ضرورت مندوں کی مدد کا ماحول میسر آیا۔

خصال جعفری کے مطابق سماجی کام کی طرف ان کا باقاعدہ سفر طالب علمی کے زمانے میں شروع ہوا۔ کالج کے دوران انہیں بعض طلبہ کی فیس سے متعلق مشکلات کا علم ہوا۔ ایک طالب علم کی فیس کا مسئلہ حل کرنے کے بعد انہیں احساس ہوا کہ تعلیم اور صحت کے شعبوں میں ضرورت مند لوگوں کے لیے بہت کچھ کیا جاسکتا ہے۔

وہ کہتے ہیں کہ اسی احساس نے انہیں باقاعدہ سماجی کام کی طرف راغب کیا اور انہوں نے محض 20 سال کی عمر میں سماجی خدمت کا آغاز کردیا۔

تعلیم ہر طالب علم کا حق، اسکالرشپ کے ذریعے مدد

پونے کو ملک ہی نہیں بلکہ دنیا بھر میں تعلیم کے ایک اہم مرکز کے طور پر جانا جاتا ہے۔ ملک کے مختلف حصوں، دور دراز دیہی علاقوں، دیگر ریاستوں اور بیرون ملک سے بھی ہزاروں طلبہ بہتر مستقبل کے خواب کے ساتھ پونے آتے ہیں۔ تاہم ان میں سے بہت سے ذہین طلبہ مالی مشکلات کا شکار ہوتے ہیں۔

مسابقتی امتحانات کی تیاری یا اعلیٰ تعلیم کے حصول کے لیے پونے آنے والے طلبہ کو کئی مرتبہ فیس، رہائش، رہنمائی اور دیگر بنیادی ضروریات کے مسائل کا سامنا کرنا پڑتا ہے۔ خاص طور پر دیہی علاقوں اور دیگر ریاستوں سے آنے والے طلبہ کے لیے ایک نئے شہر میں خود کو مستحکم کرنا آسان نہیں ہوتا۔

خصال جعفری اور ان کی ٹیم ایسے ہی طلبہ کی مدد کرتی ہے۔ وہ ضرورت مند اور باصلاحیت طلبہ کو مالی تعاون کے ساتھ رہنمائی اور نفسیاتی حوصلہ بھی فراہم کرتے ہیں۔

اپنے کام کی نوعیت بیان کرتے ہوئے خصال جعفری کہتے ہیں کہ کئی مرتبہ طلبہ پڑھائی یا امتحان کے لیے پونے آتے ہیں لیکن انہیں مناسب رہنمائی نہیں ملتی۔ گاؤں یا کسی دوسری ریاست سے آنے والا طالب علم نئے شہر میں خود کو غیر محفوظ محسوس کرسکتا ہے، اس لیے ان کی کوشش ہوتی ہے کہ ایسے طلبہ کو مستحکم کیا جائے۔ خصوصاً غریب مگر ذہین طلبہ کو مالی مشکلات کی وجہ سے آگے بڑھنے کا موقع نہیں مل پاتا، اس لیے انہیں اسکالرشپ کے ذریعے مدد فراہم کی جاتی ہے۔

خصال جعفری آئین کے آرٹیکل 29 اور 30 کے تحت اقلیتی برادریوں کو حاصل تعلیمی اور دیگر بنیادی حقوق کے نفاذ اور ضرورت مند طلبہ تک تعلیمی سہولتوں کے فوائد پہنچانے کے لیے بھی کام کرتے ہیں۔

صحت کی خدمت، انسانیت کی حقیقی خدمت

تیزی سے بڑھتی شہری آبادی، آلودگی اور ماحولیاتی عدم توازن کے باعث بڑے شہروں میں سانس اور دیگر سنگین بیماریوں کے مریضوں کی تعداد میں اضافہ ہورہا ہے۔ ایسے حالات میں مہنگا طبی علاج، اسپتال کے اخراجات اور جدید طبی آلات عام آدمی کے لیے بڑا مسئلہ بن جاتے ہیں۔

خصال جعفری نے گزشتہ 10 برسوں سے ایسے مریضوں کی مدد کے لیے ایک خصوصی پہل شروع کر رکھی ہے۔ ان کی ٹیم ضرورت مند مریضوں کو علاج کے لیے درکار آکسیجن مشینیں، بیڈ اور دیگر جدید طبی آلات مفت فراہم کرتی ہے۔

اپنی طبی خدمات کے بارے میں خصال جعفری کا کہنا ہے کہ بڑے شہر میں ماحولیاتی توازن متاثر ہونے کے باعث متعدد مریضوں کو بروقت آکسیجن اور دیگر طبی سہولتوں کی ضرورت پڑتی ہے۔ اسی ضرورت کے پیش نظر گزشتہ دس برسوں سے ان کی ٹیم ایسے مریضوں کو مفت طبی سامان فراہم کرنے کی کوشش کررہی ہے۔

ان کے مطابق ہر مریض کو بہتر علاج حاصل کرنا بنیادی حق ہے، اور کسی شخص کی مالی حالت اسے اس حق سے محروم نہیں کرنی چاہیے۔

خصال جعفری اور ان کی ٹیم چوبیس گھنٹے ایک رابطہ کار کے طور پر بھی کام کرتی ہے، تاکہ حکومت کی مہاتما جیوتی راؤ پھولے جن آروگیہ یوجنا اور دیگر صحت سے متعلق اسکیموں کے فوائد حقیقی ضرورت مند مریضوں تک پہنچ سکیں۔ ان کی کوشش ہوتی ہے کہ سرکاری سہولتوں کے بارے میں معلومات اور ان تک رسائی نچلی سطح تک پہنچائی جائے۔

اکیلے نہیں، تنظیموں کے نیٹ ورک کے ذریعے خدمت

خصال جعفری کو جلد ہی یہ احساس ہوگیا کہ وسیع پیمانے پر سماجی خدمت کا کام ایک فرد کے لیے اکیلے انجام دینا ممکن نہیں۔ اسی لیے انہوں نے سماجی اور تعلیمی شعبوں میں کام کرنے والی مختلف تنظیموں کے ساتھ رابطہ قائم کیا اور ایک وسیع نیٹ ورک تشکیل دیا۔

انہوں نے یونیک فاؤنڈیشن اور گائیڈنس فاؤنڈیشن سمیت متعدد سماجی و تعلیمی اداروں کو اس نیٹ ورک کا حصہ بنایا۔ قومی سطح پر کام کرنے والی تقریباً چار سے پانچ تنظیموں کے تعاون سے ان کا امدادی اور فلاحی نیٹ ورک پونے شہر اور اس کے آس پاس کے علاقوں تک پھیلا ہوا ہے۔

اس نیٹ ورک کے ذریعے تعلیم، صحت، شہری حقوق اور دیگر شعبوں میں ضرورت مند افراد تک مدد پہنچانے کی کوشش کی جاتی ہے۔

دو دہائیوں کی خدمت کا ’’پونے پرتھم سنمان چنہ‘‘

گزشتہ 20 برسوں سے سماجی، تعلیمی، طبی اور شہری حقوق کے شعبوں میں مسلسل کام کرنے والے خصال جعفری کی خدمات بالآخر پونے میونسپل کارپوریشن کی توجہ کا مرکز بنیں۔

پونے میونسپل کارپوریشن کی جانب سے پونے کی میئر منجوشا ناگپورے نے انہیں باوقار ’’پونے پرتھم سنمان چنہ‘‘ سے نوازا۔

اس اعزاز کے بارے میں اپنے جذبات کا اظہار کرتے ہوئے خصال جعفری نے کہا کہ پونے میونسپل کارپوریشن نے خاص طور پر مفت آکسیجن اور طبی سامان فراہم کرنے کے ان کے کام کا نوٹس لیا۔ انہوں نے کہا کہ یہ اعزاز انہیں شہر کے شہریوں اور سماجی خدمت کو ترجیح دینے پر دیا گیا ہے اور اس سے انہیں مستقبل میں مزید کام کرنے کا حوصلہ ملا ہے۔

پونے کی تیزی سے بدلتی شہری زندگی، صحت کے بڑھتے ہوئے مسائل اور تعلیم کے میدان میں بڑھتے مقابلے کے درمیان خصال جعفری جیسے سماجی کارکن ضرورت مندوں کے لیے امید کی کرن بن کر سامنے آتے ہیں۔

ان کی کہانی اس بات کی مثال ہے کہ سماجی خدمت صرف بڑے اداروں یا سرکاری منصوبوں کی محتاج نہیں۔ ایک فرد بھی اگر اخلاص، مستقل مزاجی اور احساسِ ذمہ داری کے ساتھ قدم اٹھائے تو وہ معاشرے کے کئی طبقات کی زندگی میں مثبت تبدیلی لا سکتا ہے۔ خصال جعفری کی گزشتہ دو دہائیوں پر محیط جدوجہد اسی جذبے کی عکاسی کرتی ہے۔