روانگی سے قبل گفتگو کرتے ہوئے ایرانی صدر نے بتایا کہ اس کانفرنس میں 196 ممالک شرکت کر رہے ہیں جن میں 71 ممالک کے وفود کی قیادت صدور یا وزرائے اعظم کر رہے ہیں۔ مہر نیوز کے مطابق انہوں نے کہا کہ وہ اس موقع پر واشنگٹن اور تل ابیب کی کارروائیوں کے نتیجے میں تہران اور اس کے پڑوسی علاقوں کو پہنچنے والی ماحولیاتی تباہی کا معاملہ اٹھائیں گے۔پزشکیان نے بتایا کہ کانفرنس کے موقع پر 10 سے زائد ممالک کے نمائندوں کے ساتھ دو طرفہ ملاقاتیں بھی طے ہیں جن میں ترکیہ کے صدر رجب طیب اردوان سے ملاقات بھی شامل ہے۔

ترکیہ کے ساتھ سفارتی تعلقات کے حوالے سے ایرانی صدر نے کہا کہ دونوں ملکوں کے باہمی تعلقات انتہائی خوشگوار ہیں۔ انہوں نے اس بات پر زور دیا کہ مشترکہ اقتصادی اور سماجی مفادات کے علاوہ ثقافتی اور علاقائی تعلقات بھی باہمی تعاون اور استحکام کو مضبوط بناتے ہیں۔انہوں نے مزید کہا کہ طے شدہ ملاقاتوں میں وہ خطے میں امریکہ اور اسرائیل کی جانب سے کیے گئے جرائم کا معاملہ اٹھائیں گے۔ ان کا کہنا تھا کہ حالیہ انتخابی نتائج اس بات کی عکاسی کرتے ہیں کہ عوام نے جنگ کو ہوا دینے والی شخصیات کو مسترد کیا ہے۔ انہوں نے دعویٰ کیا کہ مغربی ممالک اور فلسطین میں سامنے آنے والے سیاسی نتائج ان حکومتوں کے دعوؤں کے برعکس ہیں جو جمہوری اقدار اور انسانی حقوق کی پاسداری کا اعلان کرتی ہیں۔

پزشکیان نے امید ظاہر کی کہ ان کا سرکاری دورہ ایرانی عوام کی امنگوں کو مؤثر انداز میں دنیا کے سامنے پیش کرنے اور مثبت نتائج حاصل کرنے میں مددگار ثابت ہوگا۔

امریکی وزیر خزانہ کو سکیورٹی خدشات کے باعث فوجی اڈے منتقل کیا گیا

دریں اثنا خطے میں بڑھتی ہوئی کشیدگی کے درمیان امریکی وزیر خزانہ اسکاٹ بیسنٹ نے اپنی سلامتی کو لاحق مبینہ خطرات کے پیش نظر اپنی رہائش گاہ چھوڑ کر ایک فوجی اڈے پر منتقل ہونے کا فیصلہ کیا ہے۔ نیویارک ٹائمز نے منگل کے روز اس معاملے سے واقف افراد کے حوالے سے یہ اطلاع دی۔رپورٹ میں کہا گیا ہے کہ امریکی کابینہ کے اس اہم رکن کو لاحق خطرات کی نوعیت اور شدت کے بارے میں فی الحال واضح معلومات سامنے نہیں آئی ہیں۔ تاہم ان کی رہائش گاہ تبدیل کرنے کا واقعہ ایسے وقت میں پیش آیا ہے جب امریکی انتظامیہ میں ایران کی جانب سے امریکی شہریوں اور اہلکاروں کو نشانہ بنائے جانے کے ممکنہ منصوبوں کے حوالے سے تشویش بڑھ رہی ہے۔

اس کے باوجود امریکی حکام کا اندازہ ہے کہ ایران کی اپنے ملک کے اندر یا بیرون ملک بڑے پیمانے پر حملے کرنے کی صلاحیت محدود ہے۔ دوسری جانب تہران مسلسل ان الزامات کی تردید کرتا رہا ہے کہ وہ امریکی سرزمین پر امریکی شہریوں کو نشانہ بنانے کی منصوبہ بندی کر رہا ہے۔اسکاٹ بیسنٹ ایران کے خلاف واشنگٹن کی اقتصادی مہم کے اہم معماروں میں شمار ہوتے ہیں۔ انہوں نے مالی پابندیوں اور سخت اقدامات کے ذریعے ایران کی تیل سے حاصل ہونے والی آمدنی اور مالیاتی نظام پر دباؤ بڑھانے میں اہم کردار ادا کیا ہے۔

امریکی وزارت خزانہ ایران پر مالی دباؤ بڑھانے کی حکمت عملی کا مرکزی حصہ رہی ہے۔ خاص طور پر 28 فروری کو شروع ہونے والی امریکہ اور اسرائیل کی جنگ کے دوران امریکی حکام نے ایران کی آمدنی پیدا کرنے اور فوجی کارروائیوں کے لیے مالی وسائل فراہم کرنے کی صلاحیت کو کمزور کرنے کی کوششیں تیز کر دیں۔ اس مقصد کے لیے مختلف افراد اور کمپنیوں کے علاوہ بحری جہازوں کے نیٹ ورک اور تیل کی تجارت سے وابستہ اداروں پر پابندیاں عائد کی گئیں۔

مالی دباؤ کی یہ کارروائیاں وسیع فوجی مہم کے ساتھ ساتھ جاری رہیں جس میں امریکی اور اسرائیلی افواج نے اہم مقامات اور ایرانی فوجی تنصیبات کو فضائی حملوں کا نشانہ بنایا۔ ان حملوں میں پورے خطے میں ہزاروں افراد ہلاک اور لاکھوں بے گھر ہوئے۔اس تنازع کے نتیجے میں ایران کی کئی اہم شخصیات بھی ہلاک ہوئیں جن میں سابق سپریم لیڈر آیت اللہ علی خامنہ ای بھی شامل ہیں۔ اسی دوران لبنان میں اسرائیلی فوجی کارروائیوں میں بھی شدت آئی جس سے وہاں انسانی جانوں کا نقصان مزید بڑھ گیا۔جنگ کے باعث واشنگٹن اور تہران کے درمیان کشیدگی مسلسل گہری ہوتی جا رہی ہے اور امریکی حکام کو اپنے اعلیٰ عہدیداروں کے خلاف ممکنہ جوابی کارروائیوں کے خدشات لاحق ہیں۔