ناروے: اقتصادیات کے شعبے میں دنیا کا سب سے معتبر ایوارڈ دینے والی سویڈن کی مرکزی ’سیورجس رکس بینک‘ نے سال 2021 کا اقتصادیات کا نوبیل پرائز تین ماہرین کو دینے کا اعلان کردیا۔
نوبیل پرائز 6 مختلف کیٹیگریز میں دیا جاتا ہے، جس میں سے اقتصادیات کی کیٹیگری کا انعام کا اعلان سویڈن کی مرکزی بینک جب کہ امن کے انعام کا اعلان یورپی ملک ناروے کی کمیٹی کرتی ہے، باقی چاروں شعبوں کا اعلان نوبیل پرائز سویڈش اکیڈمی کرتی ہے۔
سال 2021 کا نوبیل انعام مجموعی طور پر تین معاشی و اقتصادی ماہرین کو دیا جائے گا، جس میں سے نصف انعام کینیڈا کے معاشی ماہر پروفیسر ڈیوڈ کارڈ کو ملے گا۔
جب کہ باقی نصف ایوارڈ امریکی ماہر پروفیسر جوشوا ڈی اینگرسٹ اور امریکی ماہر پروفیسر گیوڈو ڈبلیو ایمبینس کو دیا جائے گا۔ نوبیل پرائز ویب سائٹ کے مطابق ایوارڈ کا نصف حصہ لینے والے کینیڈین ماہر اقتصادیات کو لیبر اکنامکس میں خدمات سر انجام دینے جب کہ دونوں امریکی ماہرین کو کاروباری معاملات میں موازنے کے طریقہ کار متعارف کرائے جانے پر دیا جا رہا ہے۔
تینوں ماہرین کو رواں برس 10 دسمبر کو اسٹاک ہوم میں ہونے والی تقریب میں ایوارڈ سے نوازا جائے گا اور انعام کی نصف رقم کینیڈین جب کہ باقی نصف رقم دونوں امریکی ماہرین میں تقسیم کی جائے گی۔
گزشتہ برس کا اقتصادیات کا نوبیل انعام امریکی معاشی و اقتصادی ماہرین پروفیوسر پال ملگروم اور رابرٹ ولسن کو دیا گیا تھا۔نوبیل کمیٹی نے رواں سال کے انعامات کے اعلانات کا سلسلہ 4 اکتوبر کو شروع کیا تھا اور پہلے روز طب، دوسرے روز فزکس، تیسرے روز کیمسٹری، چوتھے روز ادب اور پانچویں روز امن کے انعامات کا اعلان کیا گیا تھا۔
اب کمیٹی نے آخری کیٹیگری اقتصادیات کے نوبیل انعام کا بھی اعلان کردیا، کمیٹی اقتصادیات سمیت مجموعی طور پر 6 کیٹیگریز میں انعامات دیتی ہے، یہ کمیٹی اقتصادیات کے علاوہ فزکس، طب، ادب، امن اور کیمسٹری کی کیٹیگری میں بھی انعام دیتی ہے۔
رواں سال کے تمام فاتحین کو 10 دسمبر کو ایوارڈز اور رقم دی جائے گی، ایوارڈز دینے کے لیے سویڈن اور ناروے میں دو مختلف تقاریب ہوں گی۔ سویڈن کے شہر اسٹاک میں ہونے والی تقریب میں طب، کیمسٹری، فزکس، ادب اور اقتصادیات کے نوبیل انعامات دیے جائیں گے جب کہ ناروے کے شہر اوسلو میں ہونے والی تقریب میں امن کا نوبیل انعام دیا جائے گا۔
BREAKING NEWS:
— The Nobel Prize (@NobelPrize) October 11, 2021
The 2021 Sveriges Riksbank Prize in Economic Sciences in Memory of Alfred Nobel has been awarded with one half to David Card and the other half jointly to Joshua D. Angrist and Guido W. Imbens.#NobelPrize pic.twitter.com/nkMjWai4Gn
