جنیوا،: امریکہ اقوام متحدہ کے اعلیٰ ترین انسانی حقوق ادارے میں اپنے انسانی حقوق کے ریکارڈ کے باقاعدہ جائزے سے مکمل طور پر کنارہ کشی اختیار کرنے والا پہلا ملک بننے جا رہا ہے۔ ٹرمپ انتظامیہ نے گزشتہ سال امریکہ کو انسانی حقوق کونسل سے الگ کر لیا تھا۔ اس نے کونسل پر امریکہ اور اسرائیل کے خلاف جانبدارانہ رویہ اپنانے اور ان اقدار پر عمل نہ کرنے کا الزام لگایا تھا جن کی وہ خود حمایت کرتی ہے۔

کونسل کے حامیوں کا کہنا ہے کہ اس کا مینڈیٹ تمام رکن ممالک، بشمول امریکہ، کے انسانی حقوق کے ریکارڈ پر نظر رکھنا ہے۔ تاہم امریکہ کی پالیسیوں پر بھی تنقید ہوتی رہی ہے۔ ان میں سختی کے ساتھ ملک بدر کرنے کی کارروائیاں اور کیریبین و بحرالکاہل کے علاقوں میں منشیات کی اسمگلنگ کے مشتبہ افراد کو نشانہ بنا کر ہلاک کرنے کے واقعات شامل ہیں۔

امریکی انتظامیہ کا کہنا ہے کہ یہ اقدامات امریکی کارکنوں کے تحفظ اور ملک کو محفوظ رکھنے کے لیے کیے جا رہے ہیں۔ جنیوا میں قائم اقوام متحدہ کی انسانی حقوق کونسل تنظیم کے تمام 193 رکن ممالک کے انسانی حقوق کے ریکارڈ کا باقاعدہ جائزہ لیتی ہے۔ یہ جائزہ عموماً ہر 4 سے 5 سال میں ہوتا ہے اور اسے ’’عالمگیر متواتر جائزہ‘‘ کہا جاتا ہے۔ ٹرمپ کی قیادت میں امریکہ ایک سال پہلے ہی اپنے جائزے کے لیے مقررہ اجلاس میں شرکت نہیں کر سکا تھا۔ نومبر 2025 میں ہونے والے اس جائزے کو اس امید میں منگل تک ملتوی کر دیا گیا تھا کہ شاید امریکی حکومت اپنا فیصلہ بدل لے، لیکن ایسا نہیں ہوا۔

امریکی محکمہ خارجہ کے ایک ترجمان نے کہا، ’’ہمیں اس ادارے پر بالکل بھروسا نہیں ہے۔‘‘ دوسری جانب امریکن سول لبرٹیز یونین کے انسانی حقوق پروگرام کے ڈائریکٹر جمیل دکوار نے کہا کہ امریکی انتظامیہ دنیا کو یہ پیغام دے رہی ہے کہ اسے اس بات کی کوئی پروا نہیں کہ کوئی اس کے انسانی حقوق کے ریکارڈ کا جائزہ لے یا نہیں۔ ان کے بقول، امریکہ بلا جھجک انسانی حقوق کی خلاف ورزیوں کا سلسلہ جاری رکھے گا۔ انہوں نے پیر کو جنیوا میں صحافیوں سے گفتگو کرتے ہوئے کہا، ’’نہیں، اب بہت ہو چکا۔ کونسل کو امریکہ کو جواب دہ ٹھہرانا چاہیے۔‘‘ یہ پیش رفت شہری سماج کی اس مہم کا حصہ ہے جس کا مقصد امریکہ کے انسانی حقوق کے ریکارڈ کے بارے میں بیداری پیدا کرنا ہے۔