ریاض : سعودی عرب کے صوبہ جازان میں غیر ملکی مرد و خواتین کی مختصر لباس میں برازیل کے روایتی رقص ’سامبا‘ کی ویڈیو وائرل ہونے کے بعد تحقیقات کا آغاز کردیا گیا۔سعودی عرب کے صوبے جازان میں جاری ’جازان فیسٹیول 2022‘ کے دوران بنائی گئی ایک ڈانس ویڈیو سوشل میڈیا پر آنے کے بعد لوگوں نے ہنگامہ شروع کیا۔
سوشل میڈیا پر وائرل ہونے والی ویڈیو میں مرد و خاتون کو رایتی برازیلی ڈانس ’سامبا‘ کرتے ہوئے دیکھا جا سکتا ہے۔وائرل ہونے والی ویڈیو میں خاتون نیم عریاں لباس میں دکھائی دیتی ہیں، تاہم انہوں نے روایتی برازیلی سامبا ڈانسرز سے قدرے بہتر لباس پہن رکھا ہے۔
ویڈیو وائرل ہونے کے بعد سعودی عرب کے مقامی لوگوں نے انتظامیہ پر سخت تنقید کرتے ہوئے جازان کی گلیوں میں غیرملکی افراد کے نیم عریاں لباس کے ڈانس کو اسلامی و سماجی روایات کے خلاف قرار دیا۔
السلطات السعودية تفتح تحقيقا بعد ظهور راقصات شبه عاريات في مهرجان شتاء جازان#طاح_حظك_بن_سلمان pic.twitter.com/cIonRiLuHc
— hoseinmortada حسين مرتضى (@HoseinMortada) January 8, 2022
ویڈیو وائرل ہونے کے بعد جازان کے گورنر اور انتظامیہ نے اعتراف کیا کہ مذکورہ ویڈیو ’جازان فیسٹیول 2022ُ‘ کی ہی ہے، جس میں دنیا بھر سے لوگ شریک ہیں۔انتظامیہ نے غیرملکی افراد کی وائرل ہونے والی ڈانس ویڈیو کی طرفداری کرتے ہوئے کہا کہ مذکورہ ویڈیو مذہبی اور سماجی روایات کے خلاف نہیں۔
حکام کے مطابق مذکورہ ویڈیو تفریحی میلے کا ایک حصہ تھی اور تفریحی ویڈیو کو غلط رنگ نہ دیا جائے، تاہم لوگوں کی جانب سے سخت تنقید کے بعد گورنر جازان نے معاملے کی تحقیق کا حکم دے دیا۔
مذکورہ ویڈیو کو سعودی عرب کے سوشل میڈیا پر شیئر کرکے جازان حکام اور فیسٹیول کے عہدیداروں پر سخت تنقید کی گئی اور لکھا گیاکہ سعودی عرب میں اگرچہ خواتین کو آزادی مل چکی ہے، تاہم تاحال مقامی خواتین اس طرح کا لباس نہیں پہنتیں۔
من فعاليات الكورنيش الشمالي #شتاء_جازان_2022 pic.twitter.com/vb9YpAgXuj
— شتاء جازان 2022 (@Jazanfestivals) January 9, 2022
سعودی عرب کے سوشل میڈیا صارفین نے جازان کی گلیوں میں غیر ملکی افراد کے ’سامبا‘ ڈانس کی ویڈیو کو ملکی روایات سمیت اسلامی اقدار کے خلاف قرار دیا، جس کے بعد ہی انتظامیہ نے تحقیقات کا حکم دیا۔
مذکورہ ویڈیو کے علاوہ بھی ’جازان فیسٹیول 2022‘ کی متعدد ویڈیوز سوشل میڈیا پر وائرل ہوگئیں اور لوگوں نے میلے میں ہونے والے تفریحی پروگرامات کا سراہا۔ خیال رہے کہ سعودی عرب میں گزشتہ چند سال سے جہاں خواتین کو نمایاں آزادیاں دی گئی ہیں، وہیں چند سال سے وہاں تفریحی، موسیقی، شوبز، فیشن اور آرٹ فیسٹیولز کا بھی انتعقاد ہونے لگا ہے۔
سعودی عرب میں اب خواتین غیر محرم مرد حضرات کے ساتھ کام کرنے سمیت اپنے کسی مرد اہل خانہ کی سرپرستی اور اجازت کے بغیر بیرون ممالک سفر بھی کر سکتی ہیں۔
سعودی عرب میں گزشتہ چند سال سے فیشن، شوبز، موسیقی اور تفریحی شعبوں میں نمایاں سرگرمیاں ہو رہی ہیں، جن میں بڑی تعداد میں غیر ملکی افراد بھی شرکت کرتے ہیں۔
