واشنگٹن: امریکہ نے سعودی عرب کے لیے سفری انتباہ کو بڑھا کر لیول 3 کر دیا ہے اور اپنے شہریوں کو سعودی عرب کے سفر پر نظرِ ثانی کرنے کا مشورہ دیا ہے۔ یمن کی سرحد سے متصل علاقوں کے لیے الگ سے لیول 4 کا انتباہ جاری کرتے ہوئے امریکی شہریوں کو وہاں سفر نہ کرنے کی ہدایت دی گئی ہے۔امریکی محکمہ خارجہ نے منگل کو جاری کردہ سفری ایڈوائزری میں ایران کی جانب سے ڈرون اور میزائل حملوں، مسلح تنازع، دہشت گردی، ملک سے باہر جانے پر پابندی اور سوشل میڈیا سے متعلق مقامی قوانین کو خطرات کی بڑی وجوہات قرار دیا۔یہ پیش رفت ایسے وقت میں ہوئی ہے جب سعودی فضائی دفاع نے مقدس شہر مکہ مکرمہ کے جنوبی علاقے میں یمن کے حوثیوں کی جانب سے داغے گئے ایک ڈرون کو روک کر تباہ کرنے کا دعویٰ کیا ہے۔

ایران اور حوثیوں سے حملوں کا خطرہ

امریکی محکمہ خارجہ نے کہا کہ 28 فروری 2026 کو امریکہ اور ایران کے درمیان مخاصمت شروع ہونے کے بعد سے ایران کی جانب سے ڈرون اور میزائل حملوں کا خطرہ برقرار ہے۔ امریکی بیان کے مطابق ایران نے سعودی عرب میں مختلف شہروں، بنیادی ڈھانچے، ہوائی اڈوں، فوجی اڈوں، سفارتی و توانائی کی تنصیبات کو نشانہ بناتے ہوئے میزائل اور ڈرون حملے کیے ہیں۔ایڈوائزری میں یہ بھی کہا گیا کہ یمن میں ایران کی حمایت یافتہ حوثی تحریک نے سعودی عرب پر دوبارہ حملوں کی دھمکی دی ہے۔ امریکی شہریوں کو خبردار کیا گیا ہے کہ روکے گئے ڈرونز اور میزائلوں کے ملبے سے بھی خطرہ لاحق ہوسکتا ہے۔امریکی محکمہ خارجہ کے مطابق توانائی کے بنیادی ڈھانچے اور فوجی اڈوں کے قریب رہنے یا کام کرنے والے امریکی شہریوں کو زیادہ خطرہ لاحق ہوسکتا ہے، خصوصاً یمن کی سرحد کے قریب علاقوں میں۔

پروازیں جاری، لیکن آمدورفت متاثر

امریکی ایڈوائزری میں کہا گیا ہے کہ سعودی عرب سے تجارتی پروازیں بدستور چل رہی ہیں، تاہم بعض اوقات ان میں نمایاں خلل بھی پیدا ہوا ہے۔دہشت گردی کے خطرے کے حوالے سے امریکہ نے کہا کہ حملے بہت کم یا کسی پیشگی اطلاع کے بغیر ہوسکتے ہیں۔ ممکنہ اہداف میں سیاسی، ثقافتی اور مذہبی مقامات، امریکی شہریوں اور دیگر غیر ملکیوں کی آمدورفت والی جگہیں، سیاحتی مقامات، بڑے اجتماعات، ہوٹل، ٹرانسپورٹ مراکز، بازار، شاپنگ مالز، تفریحی مقامات اور سرکاری تنصیبات شامل ہوسکتی ہیں۔

ملک سے باہر جانے پر پابندی کا انتباہ

امریکی محکمہ خارجہ نے سعودی عرب میں بعض حالات میں ایگزٹ بین کے خطرے سے بھی خبردار کیا ہے۔ ایڈوائزری کے مطابق امریکی شہریوں کو زیرِ التوا فوجداری یا دیوانی تحقیقات اور مقدمات کے باعث سعودی عرب چھوڑنے سے روکا گیا ہے۔ان معاملات میں ویزا کی مدت سے زیادہ قیام کی فیس، خاندانی تنازعات اور مالی و لیبر سے متعلق اختلافات شامل ہوسکتے ہیں۔ امریکی حکام کے مطابق ایسی پابندیاں کئی برس تک برقرار رہ سکتی ہیں۔

سوشل میڈیا پوسٹس پر بھی کارروائی کا خدشہ

امریکہ نے اپنے شہریوں کو سعودی عرب کے سوشل میڈیا سے متعلق قوانین کے بارے میں بھی خبردار کیا ہے۔ ایڈوائزری کے مطابق سعودی حکام ایسی سوشل میڈیا پوسٹس یا آن لائن سرگرمیوں پر امریکی شہریوں کو حراست میں لے سکتے ہیں جنہیں تنقیدی، توہین آمیز یا عوامی نظم و ضبط کے لیے نقصان دہ سمجھا جائے۔امریکی محکمہ خارجہ نے کہا کہ بعض امریکی شہریوں کو ماضی میں بیرونِ سعودی عرب کی گئی سوشل میڈیا سرگرمیوں کے سلسلے میں بھی گرفتار کیا گیا ہے۔ ایڈوائزری کے مطابق ایسی سرگرمیوں پر قید کی سزا 45 سال تک ہوسکتی ہے۔

یمن کی سرحد کے لیے لیول 4 انتباہ

یمن کی سرحد کے لیے امریکہ نے الگ سے لیول 4 یعنی ’’سفر نہ کریں‘‘ کا انتباہ جاری کیا ہے۔ امریکی حکام نے دہشت گردی کے خطرے کو اس فیصلے کی بنیادی وجہ قرار دیا۔ایڈوائزری میں کہا گیا ہے کہ یمن میں مسلح گروہوں نے سعودی سرحدی شہروں اور ملک کے دیگر مقامات کو مسلح ڈرونز، میزائلوں اور راکٹوں سے نشانہ بنایا ہے، جس کے باعث سرحدی علاقوں میں موجود افراد کو زیادہ خطرہ لاحق ہے۔امریکی حکومت نے سعودی عرب میں تعینات اپنے ملازمین کی نقل و حرکت پر بھی پابندیاں عائد کی ہیں۔ انہیں یمن کی سرحد سے 20 میل کے اندر اور قطیف میں غیر ضروری سفر کی اجازت نہیں۔ جازان، عسیر، نجران اور قطیف کے سفر کے لیے خصوصی اجازت درکار ہے۔

مکہ کے قریب ڈرون واقعے کے بعد سخت ردعمل

یہ امریکی سفری انتباہ ایسے وقت میں سامنے آیا ہے جب سعودی قیادت میں اتحاد نے بدھ کو خبردار کیا کہ اسلام کے دو مقدس ترین مقامات کی سلامتی ’’ریڈ لائن‘‘ ہے۔سعودی قیادت میں اتحاد کے مطابق سعودی رائل ایئر ڈیفنس فورسز نے منگل کی شام مکہ مکرمہ کے جنوبی علاقے میں یمن کے حوثیوں کی جانب سے داغے گئے ایک ڈرون کو اس سے پہلے ہی روک کر تباہ کردیا، جب وہ مکہ کے ممنوعہ فضائی علاقے میں داخل ہوتا۔اتحاد کے ترجمان میجر جنرل ترکی المالکی نے اس واقعے کو ’’دشمنانہ اور دہشت گردانہ کارروائی‘‘ قرار دیا اور ڈرون لانچ کرنے والی قوت کو ’’دہشت گرد حوثی ملیشیا‘‘ قرار دیا۔مکہ مکرمہ کے قریب ڈرون کے واقعے کے بعد سعودی عرب اور حوثی تحریک کے درمیان بیان بازی میں مزید شدت دیکھی گئی ہے۔