اسلام آباد: پاکستان کے سابق وزیر اعظم عمران خان کے وکیل نے کئی ماہ بعد راولپنڈی کی اڈیالہ جیل میں ان سے اور ان کی اہلیہ بشریٰ بی بی سے ملاقات کی۔ اس دوران دونوں کے مقدمات سے متعلق قانونی معاملات پر بات چیت ہوئی۔ 74 سالہ عمران خان اگست 2023 سے مختلف مقدمات میں جیل میں بند ہیں، جبکہ ان کی اہلیہ بشریٰ بی بی کو 17 جنوری 2025 کو ایک الگ مقدمے میں گرفتار کیا گیا تھا۔ اس مقدمے میں دونوں کو سزا سنائی گئی ہے۔

پاکستان تحریک انصاف (پی ٹی آئی) کے وکیل سلمان صفدر نے پیر کے روز بتایا کہ انہوں نے اڈیالہ جیل میں عمران خان اور بشریٰ بی بی سے ملاقات کی ہے۔ اسلام آباد ہائی کورٹ نے عمران خان کو خاندان کے افراد، وکلا اور دیگر ساتھیوں سے ہفتے میں 2 بار، منگل اور جمعرات کو ملاقات کرنے کی اجازت دے رکھی ہے۔

تاہم، عدالت کی متعدد ہدایات کے باوجود حالیہ مہینوں میں عمران خان کی اپنے اہل خانہ اور پارٹی رہنماؤں سے ملاقاتیں کافی حد تک محدود رہی ہیں۔ سلمان صفدر نے سوشل میڈیا پلیٹ فارم ایکس پر بتایا کہ انہوں نے عمران خان سے 7 ماہ اور بشریٰ بی بی سے 11 ماہ بعد ملاقات کی۔ یہ ملاقات تقریباً 40 منٹ تک جاری رہی، جو تمام مقدمات اور قانونی معاملات پر تفصیلی گفتگو کے لیے کافی نہیں تھی۔

وکیل کے مطابق، عمران خان اور بشریٰ بی بی نے انہیں اپنی صحت اور جیل میں رہنے کے حالات کے بارے میں بتایا۔ اس کے علاوہ مختلف قانونی معاملات اور مقدمات کے سلسلے میں انہیں نئی ہدایات بھی دیں۔ اخبار ’ڈان‘ کے مطابق، پی ٹی آئی کے مرکزی سکریٹری اطلاعات شیخ وقاص اکرم نے کہا کہ یہ ملاقات عمران خان سے ملاقات کی اجازت حاصل کرنے کے لیے عدالتوں میں دائر کی گئی متعدد درخواستوں کے سلسلے میں ممکن ہو سکی۔