تہران: ایران نے امریکہ کو تہران کے خلاف فوجی کارروائیوں میں مدد فراہم کرنے والے ممالک کو سخت انتباہ دیتے ہوئے کہا ہے کہ واشنگٹن کو کسی بھی قسم کی فوجی یا رسد سے متعلق معاونت فراہم کرنا ایران کے خلاف جارحانہ اقدام تصور کیا جائے گا۔ ایران کے مطابق ایسی مدد دینے والے ممالک اسلامی جمہوریہ کے خلاف جارحیت کے ذمہ دار ہوں گے۔ایران کی وزارت خارجہ کے ترجمان اسماعیل بقائی نے سماجی رابطے کی ویب سائٹ ایکس پر ایک بیان میں یہ انتباہ جاری کیا۔ انہوں نے بین الاقوامی قوانین اور اقوام متحدہ کے منشور کا حوالہ دیتے ہوئے مختلف حکومتوں کو امریکہ اور اسرائیل کی ایران کے خلاف فوجی مہم میں شامل ہونے سے خبردار کیا۔
بقائی نے ایک کوریائی کہاوت کا حوالہ دیتے ہوئے لکھا کہ جو چڑیا بگلے کے پیچھے اڑنے کی کوشش کرتی ہے آخرکار اس کی ٹانگیں ٹوٹ جاتی ہیں۔ اس کہاوت کے ذریعے انہوں نے امریکہ کی فوجی کارروائیوں کی حمایت کرنے والے ممالک کو خبردار کیا۔
انہوں نے کہا کہ ایران کے خلاف جارحیت یا غیر انسانی معاشی دہشت گردی میں کسی بھی قسم کی براہ راست یا بالواسطہ شرکت، جس میں بحری افواج کی تعیناتی، فوجی و رسدی سازوسامان کی فراہمی اور اہلکاروں کی تعیناتی شامل ہے، ایک دشمنانہ اور غیر قانونی اقدام تصور کی جائے گی۔ ایسا اقدام امریکہ کی ایران کے خلاف جارحیت میں شرکت کے مترادف ہوگا۔
ایرانی ترجمان کے مطابق اس طرح کی سرگرمیاں اقوام متحدہ کے منشور کی دفعہ 2 (4) کی خلاف ورزی ہیں اور اقوام متحدہ کی جنرل اسمبلی کی قرارداد 3314 میں بیان کردہ جارحیت کی تعریف کے دائرے میں بھی آتی ہیں۔بقائی نے ممکنہ جواز کو مسترد کرتے ہوئے کہا کہ سمندری راستوں کی آزادی کے تحفظ یا بحری قزاقی کے خلاف کارروائی جیسے بظاہر جائز عنوانات پیش کرنے سے ایسے اقدامات کی غیر قانونی اور دشمنانہ نوعیت تبدیل نہیں ہو جاتی۔
انہوں نے مزید کہا کہ ایران کا پیغام بالکل واضح ہے۔ امریکہ کے ساتھ کوئی دو طرفہ معاہدہ یا وعدہ کسی ملک کو بین الاقوامی قوانین کے تحت اپنی ذمہ داریوں کی خلاف ورزی کرنے یا ایران کے خلاف امریکہ اور اسرائیل کی فوجی جارحیت میں شریک ہونے کا جائز جواز فراہم نہیں کر سکتا۔ایرانی ترجمان نے خبردار کیا کہ جو بھی ملک کسی بھی شکل میں ایسی غیر قانونی جارحیت میں شریک ہوگا اسے اس کے نتیجے میں پیدا ہونے والے تمام اثرات کی مکمل ذمہ داری قبول کرنا ہوگی۔
آبنائے ہرمز پر بڑھتی کشیدگی
ایران کا یہ انتباہ ایسے وقت میں سامنے آیا ہے جب ایران، امریکہ اور اسرائیل کے درمیان کشیدگی میں اضافہ ہو رہا ہے۔ آبنائے ہرمز اور خطے کی سلامتی بھی اس تنازع کے اہم موضوعات بن چکے ہیں۔دوسری جانب امریکی صدر ڈونلڈ ٹرمپ نے جمعرات کو مقامی وقت کے مطابق سیلم نیوز چینل کو دیے گئے ایک انٹرویو میں امریکی حکام کو ممکنہ خطرے کے حوالے سے ایران کو ایک بار پھر خبردار کیا۔جب ان سے پوچھا گیا کہ اگر ایران امریکی حکام کو ہلاک کرنے کی کوشش کرے تو امریکہ کا ردعمل کیا ہوگا تو ٹرمپ نے کہا کہ ’’وہ مزید موجود نہیں رہیں گے۔‘‘ انہوں نے مزید کہا کہ فوجی طاقت کے استعمال میں انہیں کوئی ہچکچاہٹ نہیں ہوگی۔ٹرمپ نے یہ دعویٰ بھی کیا کہ امریکہ کا آبنائے ہرمز پر مکمل کنٹرول ہے اور ایران کی حکومت زوال پذیر ہے۔
