تہران۔ ایران نے جمعرات کو مکہ مکرمہ کی جانب حوثیوں کے ڈرون حملے کے دعوے کے بعد اسلامی مقدس مقامات کے خلاف کسی بھی ممکنہ جارحیت کی سخت مذمت کی۔ ایران نے ساتھ ہی خبردار کیا کہ غیر مصدقہ دعوؤں کو بنیاد بنا کر خطے میں کشیدگی بڑھانے یا مسلم ممالک کو تقسیم کرنے کی کوشش نہیں کی جانی چاہیے۔

ایرانی وزارت خارجہ کے ترجمان اسماعیل بقائی نے ایکس پر جاری بیان میں کہا کہ مقدس مقامات کا تحفظ پوری دنیا کی ترجیح ہونی چاہیے۔ تاہم انہوں نے ٹھوس شواہد کے بغیر کسی نتیجے پر پہنچنے سے خبردار کیا۔انہوں نے کہا کہ اسلامی مقدس مقامات بالخصوص مکہ مکرمہ اور مدینہ منورہ اور مسجد اقصیٰ کے خلاف کسی بھی قسم کی جارحیت یا ان کے زائرین اور پڑوسیوں کو لاحق خطرات قابل مذمت ہیں۔بقائی نے سعودی عرب کی جانب اشارہ کرتے ہوئے کہا کہ صرف دعوے کی بنیاد پر کسی مخصوص فریق بالخصوص حوثیوں کو مکہ مکرمہ کی جانب آنے والے ڈرون کا ذمہ دار قرار نہیں دیا جا سکتا۔انہوں نے کہا کہ مکہ مکرمہ کی جانب جانے والے ڈرون کو روکنے کے محض دعوے کو کسی مخصوص فریق پر الزام عائد کرنے کی بنیاد نہیں بنایا جا سکتا۔ خاص طور پر اس لیے کہ یمن کی حکومت تبدیلی و تعمیر نے واضح طور پر اس دعوے کی تردید کی ہے۔

ایرانی ترجمان نے علاقائی فریقوں سے اپیل کی کہ وہ مقدس مقامات سے متعلق الزامات کو وسیع تر سیاسی مقاصد کے لیے استعمال کرنے یا موجودہ جغرافیائی سیاسی اختلافات کو مزید گہرا کرنے سے گریز کریں۔بقائی نے کہا کہ اسلامی جمہوریہ ایران اسلامی مقدسات اور ان کی سلامتی کے معاملے کو سیاسی رنگ دینے سے روکنے کی ضرورت پر زور دیتا ہے۔ اسے اختلافات پیدا کرنے اور علاقائی کشیدگی بڑھانے کے لیے ایک ذریعہ نہیں بنانا چاہیے۔انہوں نے غیر مصدقہ فوجی اطلاعات کے ذریعے علاقائی بیانیے کو متاثر کرنے کے امکانات کی طرف بھی اشارہ کیا۔ انہوں نے کہا کہ خطے میں حالیہ مہینوں کے دوران ایسے متعدد واقعات سامنے آئے ہیں جنہیں ’’فالس فلیگ‘‘ کارروائیوں سے تعبیر کیا گیا۔ ان کا مقصد مغربی ایشیا میں اسرائیل اور امریکہ کی کارروائیوں سے عوام کی توجہ ہٹانا اور اسلامی ممالک کے درمیان اختلافات پیدا کرنا رہا ہے۔

بقائی نے کہا کہ اس معاملے میں احتیاط اور چوکسی اختیار کی جانی چاہیے۔

ایران کا یہ بیان ایسے وقت میں سامنے آیا ہے جب یمنی حکومت کی فوج نے کہا ہے کہ اس نے جنوب مغربی یمن کے تعز اور المخا میں حوثیوں کے اسلحہ اور فوجی ٹھکانوں کو نشانہ بنایا ہے۔ الجزیرہ کے مطابق یمنی صدارتی قیادت کونسل کے چیئرمین رشاد العلیمی نے یمن میں فرانس کی سفیر کیتھرین کورم کامون سے ملاقات کے دوران کہا کہ تعز مارب لحج الجوف حجہ البیضاء اور الضالع کے محاذوں پر حوثی فورسز کو بھاری نقصان پہنچ رہا ہے۔

دریں اثنا برطانوی میری ٹائم ٹریڈ آپریشنز نے بتایا کہ اسے ایک ٹینکر کے بارے میں اطلاع ملی ہے جس کا تعاقب ایک تیز رفتار کشتی کر رہی تھی۔ اس کشتی نے ٹینکر کو روکنے کی کوشش کی۔ یہ واقعہ یمن کی بندرگاہ عدن سے تقریباً 75 ناٹیکل میل مشرق میں پیش آیا۔

UKMTO نے ایکس پر کہا کہ مغرب کی جانب سفر کرنے والے ایک ٹینکر نے اطلاع دی کہ ایک تیز رفتار کشتی نے اس کا تعاقب کیا اور اسے روکنے کی کوشش کی۔ ادارے نے کہا کہ حکام واقعے کی تحقیقات کر رہے ہیں اور علاقے میں موجود بحری جہازوں کو احتیاط برتنے کا مشورہ دیا ہے۔

اس سے قبل بدھ کو یمن کی حوثی تحریک نے مکہ مکرمہ کی جانب ڈرون بھیجنے کے سعودی عرب کے دعوے کو مسترد کرتے ہوئے اسے ’’من گھڑت اور جھوٹ‘‘ قرار دیا تھا۔ حوثیوں نے کہا تھا کہ ان کی کارروائیاں سعودی فوجی اور تیل تنصیبات کو نشانہ بناتی ہیں جو اسلامی مقدس مقامات سے دور واقع ہیں۔

حوثی فوجی ترجمان بریگیڈیئر جنرل یحییٰ سریع نے ٹیلی گرام پر جاری بیان میں سعودی عرب کے آل سعود نظام پر الزام عائد کیا کہ وہ اس دعوے کے ذریعے لوگوں کو گمراہ کرنے کی کوشش کر رہا ہے۔ انہوں نے مقدس مقامات کے لیے یمن کی جانب سے کسی خطرے کی تردید کی۔

سریع نے کہا کہ حوثیوں کی کارروائیوں کا ہدف سعودی عرب کی تیل تنصیبات اور فوجی اڈے ہیں جو مقدس مقامات سے بہت دور ہیں۔

یہ بیان سعودی قیادت والے اتحاد کے اس اعلان کے بعد سامنے آیا تھا کہ اس کے فضائی دفاعی نظام نے منگل کی شام مکہ مکرمہ کے جنوب میں ایک ڈرون کو اس وقت روک کر تباہ کر دیا جب وہ مقدس شہر کے گرد ممنوعہ فضائی حدود میں داخل ہونے والا تھا۔

اتحاد کے ترجمان میجر جنرل ترکی المالکی نے اس واقعے کو ’’دشمنانہ اور دہشت گردانہ کارروائی‘‘ قرار دیا تھا۔ انہوں نے کہا تھا کہ حرمین شریفین اور زائرین کی سلامتی ایک ’’ریڈ لائن‘‘ ہے۔