بیجنگ: ایرانی وزیر خارجہ سید عباس عراقچی 16 ستمبر کو چین کا دورہ کریں گے جہاں وہ اپنے چینی ہم منصب وانگ یی کے ساتھ اہم مذاکرات کریں گے۔ چین کی وزارت خارجہ نے منگل کو اس کی تصدیق کرتے ہوئے کہا کہ اس ملاقات میں دونوں ممالک کے درمیان تعلقات کے علاوہ علاقائی اور عالمی صورتحال پر بھی تبادلہ خیال متوقع ہے۔چینی وزارت خارجہ نے سماجی رابطے کی ویب گاہ ایکس پر جاری بیان میں کہا کہ ایران کے وزیر خارجہ سید عباس عراقچی 16 ستمبر کو چین کا دورہ کریں گے۔ کمیونسٹ پارٹی آف چائنا کی مرکزی کمیٹی کے سیاسی بیورو کے رکن اور وزیر خارجہ وانگ یی ان کے ساتھ مذاکرات کریں گے۔

عراقچی کا یہ دورہ ایسے وقت میں ہو رہا ہے جب چینی صدر شی جن پنگ کے 24 ستمبر کو امریکہ کے متوقع دورے کی تیاریاں جاری ہیں۔ وہاں ان کی امریکی صدر ڈونلڈ ٹرمپ کے ساتھ ملاقات متوقع ہے۔

ٹرمپ نے ستمبر کے اوائل میں امریکی سفری شعبے کے عہدیداروں سے گفتگو کے دوران شی جن پنگ کے دورے کی تاریخ کا اعلان کیا تھا۔ انہوں نے کہا تھا کہ انہیں امید ہے کہ چینی صدر کے ساتھ ہونے والی ملاقات کے مثبت نتائج سامنے آئیں گے۔عراقچی کا چین کا دورہ مغربی ایشیا میں بڑھتی ہوئی کشیدگی کے درمیان ہو رہا ہے۔ امریکہ کے ساتھ فوجی محاذ آرائی کے باعث خطے میں صورتحال انتہائی حساس ہے اور ایران علاقائی عدم استحکام کے درمیان اپنے اہم شراکت داروں کے ساتھ سفارتی روابط بڑھانے کی کوشش کر رہا ہے۔

ایرانی وزیر خارجہ اور وانگ یی کی اس سے قبل جولائی میں کرغزستان میں منعقدہ شنگھائی تعاون تنظیم کے وزرائے خارجہ کے اجلاس کے موقع پر ملاقات ہوئی تھی۔ عراقچی نے برکس سربراہی اجلاس کے موقع پر بھی چینی وزیر خارجہ وانگ یی سے الگ ملاقات کی تھی۔عراقچی کا چین کا دورہ نئی دہلی میں منعقدہ 18ویں برکس سربراہی اجلاس میں ایران کی شرکت کے بعد ہو رہا ہے۔ اجلاس میں ایرانی صدر مسعود پزشکیان نے اپنے ملک کے وفد کی قیادت کی تھی۔

برکس سربراہی اجلاس سے خطاب کرتے ہوئے پزشکیان نے رکن ممالک پر زور دیا تھا کہ وہ ان یک طرفہ اور غیر انسانی پابندیوں کے خلاف عملی اقدامات کریں جنہیں وہ عالمی سطح پر مسلط کیے جانے والے دباؤ کا حصہ قرار دیتے ہیں۔ انہوں نے عالمی تنازعات کے حل میں برکس کے زیادہ فعال کردار کی بھی اپیل کی۔پزشکیان نے کہا تھا کہ برکس ممالک کی ذمہ داری ہے کہ وہ شہری بنیادی ڈھانچے اور پرامن جوہری تنصیبات پر حملوں کو معمول بنائے جانے کے خلاف کھڑے ہوں کیونکہ ان مقامات کے خلاف کوئی بھی کارروائی عالمی امن اور سلامتی کے لیے براہ راست خطرہ ہے۔ انہوں نے فلسطین اور فلسطینی عوام کے حق خود ارادیت کو عالمی نظام حکمرانی کی ساکھ اور قانونی جواز کے لیے ایک اہم امتحان قرار دیتے ہوئے برکس سے فعال کردار ادا کرنے کا مطالبہ کیا تھا۔

برکس رہنماؤں نے متفقہ طور پر 2026 کا نئی دہلی اعلامیہ منظور کیا جس میں عالمی نظام حکمرانی میں اصلاحات اور ترقی پذیر ممالک کی زیادہ مؤثر نمائندگی پر زور دیا گیا۔ اعلامیے میں مغربی ایشیا میں بڑھتی ہوئی کشیدگی پر گہری تشویش کا اظہار کرتے ہوئے زیادہ سے زیادہ تحمل اختیار کرنے اور شہریوں اور شہری بنیادی ڈھانچے کے تحفظ کے ساتھ خود مختاری اور علاقائی سالمیت کے احترام کی اپیل کی گئی۔

اعلامیے میں عالمی تجارت رسد کے سلسلوں اور توانائی کی بلاتعطل ترسیل کو بین الاقوامی قانون کے مطابق جاری رکھنے کی اہمیت پر بھی زور دیا گیا۔

برکس اجلاس کے موقع پر ایرانی صدر مسعود پزشکیان نے وزیر اعظم نریندر مودی سے بھی ملاقات کی۔ دونوں رہنماؤں نے دو طرفہ تعلقات اور مغربی ایشیا کی صورتحال پر تبادلہ خیال کیا۔

وزیر اعظم مودی نے خطے میں پائیدار امن اور استحکام کے لیے مسلسل کوششوں کی ضرورت پر زور دیا۔ انہوں نے آبنائے ہرمز میں جاری کشیدگی کے تناظر میں بحری جہازوں کی آزادانہ آمد و رفت تجارت کے بلاتعطل سلسلے اور سمندری عملے کی سلامتی کی اہمیت بھی اجاگر کی۔

ایسے ماحول میں عباس عراقچی اور وانگ یی کے درمیان ہونے والی بات چیت بیجنگ اور تہران کو علاقائی صورتحال اور وسیع تر عالمی معاملات پر اپنے نقطہ نظر کا تبادلہ کرنے کا اہم موقع فراہم کرے گی۔ یہ ملاقات چینی صدر شی جن پنگ کی واشنگٹن میں ڈونلڈ ٹرمپ کے ساتھ اہم ملاقات سے قبل بھی خاص اہمیت رکھتی ہے۔