بدھ کو ووٹوں کی گنتی آگے بڑھنے کے ساتھ ہی 45 سالہ نتھیا رمن اپنی حریف سے آگے نکل گئیں۔ انہیں 51.1 فیصد ووٹ ملے جبکہ 73 سالہ کیرن باس کو 48.33 فیصد ووٹ حاصل ہوئے۔ تاہم انتخابی تجزیہ کاروں نے خبردار کیا کہ مقابلہ اب بھی اتنا سخت ہے کہ کسی حتمی نتیجے پر پہنچنا قبل از وقت ہوگا۔

انتخاب سے قبل ووٹروں کی ترجیحات نے شہر کو درپیش بڑے شہری مسائل کی نشاندہی کی تھی۔ برکلے آئی جی ایس اور لاس اینجلس ٹائمز کی جانب سے 19 سے 25 اکتوبر کے درمیان کرائے گئے ایک سروے میں تقریباً 40 فیصد ممکنہ ووٹروں نے کہا تھا کہ نئے میئر کی اولین ترجیح بے گھر افراد کی عارضی رہائش گاہوں اور خیمہ بستیوں میں کمی لانا ہونی چاہیے۔

دوسری جانب تقریباً 30 فیصد ووٹروں نے عوامی تحفظ کو بہتر بنانے اور کم قیمت مکانات کی تعمیر کو بھی اہم ترجیحات قرار دیا تھا۔

اس انتخابی صورت حال کے درمیان نتھیا رمن منگل کی شب اپنی انتخابی تقریب میں پرجوش حامیوں کے سامنے نمودار ہوئیں۔ انہوں نے یونانی تھیٹر پلازا میں جمع ہجوم سے خطاب کرتے ہوئے اگرچہ اپنی کامیابی کا باضابطہ اعلان نہیں کیا لیکن لوگوں سے فی الحال جشن منانے سے گریز کرنے کی اپیل کی۔

انہوں نے کہا کہ وہ پُرامید ہیں اور انہیں کامیابی کی پوری امید ہے۔ تاہم انہوں نے یہ بھی کہا کہ وہ توہم پرست طبیعت کی مالک ہیں اس لیے سبھی کو فی الحال پرسکون رہنا چاہیے۔

کیرالہ میں پیدائش، ہارورڈ اور ایم آئی ٹی سے تعلیم

نتھیا رمن کی پیدائش 1981 میں کیرالہ میں ہوئی تھی۔ وہ 6 سال کی عمر میں امریکہ منتقل ہو گئیں اور 22 برس کی عمر میں امریکی شہریت حاصل کی۔

انہوں نے ہارورڈ یونیورسٹی سے گریجویشن کیا اور اس کے بعد میساچوسٹس انسٹی ٹیوٹ آف ٹیکنالوجی (ایم آئی ٹی) سے شہری منصوبہ بندی میں ماسٹرز کی ڈگری حاصل کی۔

عملی زندگی میں انہوں نے ’ٹرانسپیرنٹ چنئی‘ کے نام سے ایک شہری تحقیقی ادارہ قائم کیا جس کا مقصد صفائی ستھرائی اور شہری سہولتوں کو بہتر بنانا تھا۔

2013 میں لاس اینجلس منتقل ہونے کے بعد انہوں نے شہر کے انتظامی افسر کے ساتھ کام کیا۔ اس کے علاوہ بے گھر افراد کے مسائل پر کام کرنے والے ’سیلہ نیبرہڈ ہوم لیس کولیشن‘ کے قیام میں بھی اہم کردار ادا کیا اور ’ٹائمز اپ انٹرٹینمنٹ‘ کی ایگزیکٹو ڈائریکٹر کے طور پر خدمات انجام دیں۔

نتھیا رمن کی ممکنہ کامیابی کو امریکہ کے دوسرے سب سے زیادہ آبادی والے شہر کی قیادت کی دوڑ میں ایک اہم سیاسی پیش رفت قرار دیا جا رہا ہے۔ تاہم ووٹوں کی گنتی مکمل ہونے اور حتمی نتائج کے اعلان تک انتخابی صورت حال واضح نہیں ہوگی۔