کھٹمنڈو: نیپال میں ہندوستان کے سبکدوش ہونے والے سفیر نوین سریواستو نے منگل کو وزیر اعظم بالیندر شاہ سے الوداعی ملاقات کی۔ اس دوران دونوں ممالک کے باہمی تعلقات اور تعاون سے متعلق امور پر گفتگو ہوئی۔ وزیر اعظم کے دفتر کے مطابق، چار سالہ مدت مکمل کرنے کے بعد ہندوستان واپس روانہ ہونے کی تیاری کر رہے سریواستو نے کھٹمنڈو میں وزیر اعظم شاہ سے ان کے دفتر میں ملاقات کی۔

ملاقات کے بعد سریواستو نے سوشل میڈیا پلیٹ فارم ایکس پر لکھا، ’’نیپال چھوڑنے کی تیاری کے دوران معزز وزیر اعظم بالیندر شاہ جی سے الوداعی ملاقات کی۔ میں نے اپنی مدت کار کے دوران دو طرفہ شراکت داری کو آگے بڑھانے میں تعاون کے لیے وزیر اعظم اور حکومت نیپال کا شکریہ ادا کیا۔‘‘

وزیر اعظم کے دفتر کے مطابق، ملاقات کے دوران دونوں رہنماؤں نے ہندوستان اور نیپال کے باہمی تعلقات اور باہمی تعاون سے متعلق امور پر تبادلہ خیال کیا۔ نوین سریواستو جون 2022 سے نیپال میں ہندوستان کے سفیر کی حیثیت سے خدمات انجام دے رہے تھے۔ وہ یکم اکتوبر کو نیپال سے ہندوستان واپس ہوں گے۔