نئی دہلی: ہندوستان اور نیوزی لینڈ کے درمیان آزاد تجارتی معاہدہ (ایف ٹی اے) 19 اکتوبر سے نافذ ہونے کا امکان ہے۔ ایک سرکاری عہدیدار نے یہ اطلاع دی۔ دونوں ممالک نے 27 اپریل کو اشیا اور خدمات کی دو طرفہ تجارت کو فروغ دینے اور سرمایہ کاری بڑھانے کے لیے آزاد تجارتی معاہدے پر دستخط کیے تھے۔

اس معاہدے کے تحت نیوزی لینڈ میں ہندوستان کی 100 فیصد برآمدات کو ڈیوٹی فری رسائی حاصل ہوگی۔ فی الحال نیوزی لینڈ ہندوستان کی اہم اشیا، جن میں سیرامکس، قالین، گاڑیاں اور آٹو پارٹس شامل ہیں، پر زیادہ سے زیادہ 10 فیصد تک درآمدی ڈیوٹی عائد کرتا ہے۔ نیوزی لینڈ نے اگلے 15 برسوں کے دوران ہندوستان میں 20 ارب امریکی ڈالر کی سرمایہ کاری کرنے کا وعدہ بھی کیا ہے۔