ڈھاکہ: بنگلہ دیش میں 2024 میں بڑے پیمانے پر عوامی بغاوت کے بعد اقتدار سے بے دخل کی جانے والی سابق وزیر اعظم شیخ حسینہ نے کہا ہے کہ وہ آئندہ ماہ ہندوستان میں جلاوطنی کی زندگی چھوڑ کر اپنے وطن واپس جانے کے ارادے پر قائم ہیں۔ شیخ حسینہ کا یہ بیان ایسے وقت میں سامنے آیا ہے جب مظاہرین کے خلاف ان کی حکومت کی جانب سے کی گئی خونریز کارروائی کے معاملے میں انہیں سزائے موت سنائی جا چکی ہے۔ طلبہ کی قیادت میں چلنے والی احتجاجی تحریک کے نتیجے میں اقتدار سے ہٹائے جانے کے بعد وہ ہندوستان آگئی تھیں اور تب سے یہیں مقیم ہیں۔

بنگلہ دیش کے ایک خصوصی ٹریبونل نے 2025 میں انہیں انسانیت کے خلاف جرائم کا مرتکب قرار دیتے ہوئے سزائے موت سنائی تھی۔ عدالت کے مطابق وہ اس کارروائی کا حکم دینے کی ذمہ دار تھیں جس میں سیکڑوں افراد ہلاک اور ہزاروں زخمی ہوئے تھے۔ اقوام متحدہ کی ایک رپورٹ میں کہا گیا ہے کہ اس دوران تقریباً 1,400 افراد مارے گئے تھے۔ تاہم شیخ حسینہ نے کسی بھی غلط کارروائی میں ملوث ہونے سے انکار کیا ہے۔ انہوں نے ٹریبونل کے فیصلے کو مسترد کرتے ہوئے مقدمے کی قانونی حیثیت کو بھی چیلنج کیا ہے۔

بنگلہ دیش کئی مرتبہ ہندوستان سے شیخ حسینہ کی حوالگی کا مطالبہ کر چکا ہے، لیکن ہندوستان نے انہیں بنگلہ دیش کے حوالے کرنے سے انکار کیا ہے۔ شیخ حسینہ نے پہلی بار اگست میں دسمبر میں وطن واپسی کا ارادہ ظاہر کیا تھا۔ ای میل کے ذریعے پوچھے گئے سوالات کے جواب میں انہوں نے خبر رساں ادارے ’دی ایسوسی ایٹڈ پریس‘ (اے پی) سے کہا، ’’اگر میری قسمت میں موت لکھی ہے تو میں اپنے ہی ملک کی سرزمین پر، اپنے ہی لوگوں کے درمیان مرنا پسند کروں گی۔‘‘

انہوں نے مزید کہا، ’’اس لیے میں بنگلہ دیش واپس آؤں گی۔ میرا فیصلہ تبدیل نہیں ہوا ہے۔‘‘ رپورٹ کے مطابق، گزشتہ ہفتے ان سے کچھ سوالات پوچھے گئے تھے، جن کے جواب انہوں نے بدھ کو دیے۔ شیخ حسینہ 2009 سے 2024 تک بنگلہ دیش کی وزیر اعظم رہیں۔ تاہم انہوں نے ہندوستان سے واپسی کے اپنے منصوبے کی تفصیلات ظاہر نہیں کی ہیں۔ بنگلہ دیش پہنچنے پر انہیں گرفتار بھی کیا جا سکتا ہے۔