نئی دہلی: جرمنی میں جاری فرینکفرٹ بک فیئر میں انڈین نیشنل اسٹینڈ کے افتتاح کے ساتھ ہی جدید ہندوستانی کلاسیکی بچوں کی کہانیوں کے جرمن اور ہسپانوی تراجم بھی جاری کیے گئے۔ نیشنل بک ٹرسٹ، ہندوستان کے چیف ایڈیٹر اور جوائنٹ ڈائریکٹر کمار وکرم نے بتایا کہ انڈین نیشنل اسٹینڈ کو خاص طور پر پریم چند اور سُمترا نندن پنت جیسے ہندوستانی ادب کے اہم ادیبوں کی تخلیقات پر مرکوز کرتے ہوئے تیار کیا گیا ہے۔

انہوں نے کہا کہ اس کا مقصد قارئین، بالخصوص نوجوان نسل کو ان ادیبوں کی تخلیقات سے قریب لانا ہے۔ انڈین نیشنل اسٹینڈ کے افتتاح کے موقع پر جدید ہندوستانی کلاسیکی بچوں کی کہانیوں کے جرمن اور ہسپانوی تراجم بھی جاری کیے گئے۔ ان کتابوں میں پریم چند کی ’مٹھو‘، بھیشم ساہنی کی ’دو گوریاں‘ اور ’چمگادڑ کا رس‘، سدرشن کی ’سائیکل کی سواری‘، امرکانت کی ’بہادر‘، وشنو پربھاکر کی ’سب سے خوبصورت لڑکی‘ اور آچاریہ شیو پوجن سہائے کی ’کنجی‘ شامل ہیں۔

نیشنل بک ٹرسٹ کی جانب سے جاری بیان کے مطابق بچوں کی یہ کتابی سیریز خاص طور پر نوجوان قارئین کو ہندوستانی ادب کے ان اہم ادیبوں سے جوڑنے کے مقصد سے تیار کی گئی ہے، جن کی تخلیقات آج بھی اسی طرح اہم اور متعلقہ ہیں جیسے اپنے زمانے میں تھیں۔