ڈھاکہ: بنگلہ دیش کے انٹرنیشنل کرائمز ٹریبونل-2 نے ممنوعہ عوامی لیگ کے سات سینئر رہنماؤں کو 2024 میں طلبہ کی قیادت میں ہونے والے احتجاج، جسے ’جولائی بغاوت‘ بھی کہا جاتا ہے، کے دوران تشدد بھڑکانے یا اسے فروغ دینے کے الزام میں انسانیت کے خلاف جرائم کا مرتکب قرار دیتے ہوئے منگل کو سزائے موت سنائی۔ جسٹس محمد نذر الاسلام چودھری کی سربراہی میں تین رکنی ٹریبونل-2 نے ان ساتوں رہنماؤں کے خلاف فیصلہ سنایا۔
ان کے خلاف مقدمے کی کارروائی ان کی غیر موجودگی میں ہوئی۔ سزائے موت پانے والوں میں عوامی لیگ کے جنرل سکریٹری اور سابق وزیر برائے سڑک ٹرانسپورٹ اوبیدال قادر، جوائنٹ جنرل سکریٹری اے ایف ایم بہاؤالدین نسیم اور سابق وزیر مملکت برائے اطلاعات و نشریات محمد علی عرفات شامل ہیں۔
دیگر چار افراد میں یوتھ لیگ کے چیئرمین شیخ فضل شمس پراش، اس کے جنرل سکریٹری مینول حسین خان نکھل، بنگلہ دیش اسٹوڈنٹس لیگ کے صدر صدام حسین اور اس کے جنرل سکریٹری شیخ ولی عاصف اینن شامل ہیں۔ سابق وزیر اعظم شیخ حسینہ کو ان کی غیر موجودگی میں سزائے موت سنائے جانے کے تقریباً 10 ماہ بعد ٹریبونل نے 2024 کے احتجاج سے متعلق مقدمات میں یہ فیصلہ سنایا ہے۔
ان ساتوں ملزمان کی پیروی حکومت کی جانب سے مقرر کیے گئے دفاعی وکلا نے کی۔ ٹریبونل نے 22 جنوری کو ملزمان کے خلاف سات الزامات طے کیے تھے، جبکہ مقدمے کی سماعت 17 فروری کو شروع ہوئی تھی۔ ٹریبونل-2 نے احتجاج کے دوران مبینہ طور پر تشدد بھڑکانے یا اسے ہدایت دینے میں کردار ادا کرنے کے الزام میں ان ساتوں کے خلاف مقدمہ چلایا۔ اسی احتجاج کے نتیجے میں 5 اگست 2024 کو شیخ حسینہ کی حکومت گر گئی تھی۔
سرکاری وکلا نے ساتوں رہنماؤں پر الزام عائد کیا کہ انہوں نے ہدایات جاری کرکے، اشتعال انگیز اور اکسانے والے بیانات دے کر اور تشدد کی سازش سے متعلق اجلاس منعقد کرکے مظاہرین کو دبانے کی کوشش کی۔ انہوں نے یہ بھی الزام لگایا کہ ملزمان مختلف مقامات پر مسلح حملوں، جابرانہ کارروائیوں اور میڈیا کو کنٹرول کرنے کی کوششوں میں شامل تھے، جس کے نتیجے میں ملک بھر میں ہلاکتیں، قتل کی کوششیں اور بڑے پیمانے پر تشدد ہوا۔ شیخ حسینہ 5 اگست 2024 کو بنگلہ دیش چھوڑ کر ہندوستان آ گئی تھیں اور تب سے ہندوستان میں رہ رہی ہیں۔ اقوام متحدہ کے انسانی حقوق کے دفتر کے اندازے کے مطابق 15 جولائی سے 5 اگست 2024 کے درمیان احتجاج سے متعلق تشدد میں تقریباً 1,400 افراد ہلاک ہوئے تھے۔
