ہارورڈ گریجویٹ اسکول آف ایجوکیشن کی اسسٹنٹ پروفیسر ینگ شو (Ying Xu) کے مطابق مصنوعی ذہانت بچوں کی تعلیم اور نشوونما میں مثبت کردار ادا کرسکتی ہے بشرطیکہ اسے بچوں کی عمر، ضروریات اور تعلیمی اصولوں کو مدنظر رکھتے ہوئے تیار کیا جائے۔ ان کی تحقیق سے ظاہر ہوتا ہے کہ بچے اے آئی کے ساتھ تعاملی سرگرمیوں کے ذریعے بہتر انداز میں سیکھ سکتے ہیں۔ تاہم مصنوعی ذہانت کو انسانی تعلقات اور براہ راست میل جول کا متبادل بنانے کے بجائے ایک معاون تعلیمی وسیلے کے طور پر استعمال کیا جانا چاہیے۔

اے آئی کے ذریعے بچوں کی تعلیمی صلاحیتوں میں اضافہ

مصنوعی ذہانت کا ایک اہم فائدہ یہ ہے کہ یہ بچوں کو ان کی ضرورت اور سیکھنے کی رفتار کے مطابق معلومات فراہم کرسکتی ہے۔ روایتی تعلیمی طریقوں میں جہاں تمام بچوں کو عموماً ایک ہی انداز سے پڑھایا جاتا ہے وہیں اے آئی انفرادی ضروریات کے مطابق سوالات اور وضاحتوں کے ذریعے سیکھنے کے عمل کو زیادہ مؤثر بنا سکتی ہے۔

ینگ شو اور ان کی تحقیقی ٹیم نے ایسے اے آئی معاونین تیار کیے اور ان کے اثرات کا جائزہ لیا جو بچوں کو کتابیں پڑھنے کہانیاں سننے اور ٹیلی ویژن دیکھنے جیسی سرگرمیوں کے دوران متحرک رکھتے ہیں۔ اس طریقے میں مصنوعی ذہانت کہانی پڑھنے کے ساتھ بچوں سے کرداروں کے مسائل ان کے جذبات اور کہانی کے ممکنہ انجام کے بارے میں سوالات کرتی ہے۔ اگر بچہ کسی سوال کا جواب دینے میں مشکل محسوس کرے تو اے آئی اسے اشاروں اور مختصر وضاحتوں کے ذریعے مدد فراہم کرتی ہے۔

تحقیق میں سامنے آیا کہ اس طرح کی تعاملی سرگرمیوں میں حصہ لینے والے بچے کہانی کو زیادہ بہتر طور پر سمجھتے ہیں اور ان کے الفاظ کے ذخیرے میں بھی اضافہ ہوتا ہے۔ ان بچوں کے سیکھنے کے نتائج ان بچوں کے مقابلے میں بہتر تھے جو صرف خاموشی سے کہانی سنتے تھے۔ بعض صورتوں میں اے آئی کے ساتھ سیکھنے کے نتائج انسانی تعامل کے ذریعے حاصل ہونے والے نتائج کے برابر بھی دیکھے گئے۔

اس سے ظاہر ہوتا ہے کہ اگر مصنوعی ذہانت کو محض معلومات فراہم کرنے کے بجائے بچوں کو سوچنے اور جواب تلاش کرنے کی ترغیب دینے کے لیے استعمال کیا جائے تو یہ ان کی تعلیمی ترقی میں اہم کردار ادا کرسکتی ہے۔

انسانی تعلقات کا متبادل نہیں بن سکتی مصنوعی ذہانت

تعلیمی فوائد کے باوجود ماہرین اس بات پر زور دیتے ہیں کہ مصنوعی ذہانت انسانی رابطے اور جذباتی تعلقات کی جگہ نہیں لے سکتی۔ بچوں کی ذہنی اور سماجی نشوونما میں والدین اساتذہ اور ہم عمر بچوں کے ساتھ میل جول بنیادی اہمیت رکھتا ہے۔

ینگ شو کی تحقیق کے مطابق بچے اے آئی کے ساتھ گفتگو کرتے ہوئے بظاہر کافی متحرک رہتے ہیں لیکن انسانوں کے ساتھ بات چیت کے دوران ان کی دلچسپی اور شمولیت زیادہ ہوتی ہے۔ انسانی گفتگو میں بچے اپنی مرضی سے موضوع بدلتے ہیں۔ مزید سوالات کرتے ہیں اور اپنے خیالات اور تجربات کا اظہار کرتے ہیں۔ یہ تمام سرگرمیاں زبان سیکھنے اور سماجی صلاحیتوں کو بہتر بنانے میں اہم کردار ادا کرتی ہیں۔

مصنوعی ذہانت ان سرگرمیوں کی کچھ حد تک نقل تو کرسکتی ہے لیکن انسانی تجربات اور حقیقی ہمدردی کا احساس نہیں رکھتی۔ چھوٹے بچے ابتدا میں اے آئی کو انسان جیسی شخصیت سمجھ سکتے ہیں کیونکہ یہ انسانوں کی طرح بولتی اور جواب دیتی ہے۔ تاہم انہیں یہ سمجھانا ضروری ہے کہ مصنوعی ذہانت ایک کمپیوٹر پروگرام ہے اور اس کے پاس انسانوں جیسے حقیقی جذبات اور مشترکہ تجربات نہیں ہوتے۔

ماہرین کے مطابق بچوں کو مصنوعی ذہانت سے جذباتی وابستگی پیدا کرنے کے بجائے خاندان دوستوں اور اساتذہ کے ساتھ حقیقی تعلقات قائم کرنے کی ترغیب دی جانی چاہیے۔

بچوں کے سماجی رویوں اور اخلاقی تربیت پر اثرات

مصنوعی ذہانت کے بڑھتے ہوئے استعمال سے بچوں کے سماجی آداب اور گفتگو کے طریقوں پر پڑنے والے اثرات بھی توجہ طلب ہیں۔ بچے عام طور پر بڑوں اور اپنے اردگرد موجود لوگوں کے رویوں کو دیکھ کر شائستگی، احترام، شکریہ ادا کرنے اور معذرت کرنے جیسے آداب سیکھتے ہیں۔

لیکن اے آئی کے ساتھ گفتگو میں ہمیشہ ان سماجی اصولوں کی پابندی ضروری نہیں ہوتی۔ بعض مواقع پر بچے مصنوعی ذہانت کو حکم دینے یا سخت الفاظ استعمال کرنے کے انداز میں مخاطب کرتے ہیں۔ ماہرین کو خدشہ ہے کہ اگر بچے اس طرز گفتگو کے عادی ہوگئے تو اس کا اثر ان کے حقیقی زندگی کے تعلقات پر بھی پڑسکتا ہے۔

ینگ شو کے مطابق بعض تحقیقی مشاہدات میں یہ بات سامنے آئی ہے کہ بچے مصنوعی ذہانت کے ساتھ گفتگو کے دوران استعمال ہونے والے الفاظ اور انداز کو بعد میں دوسرے لوگوں کے ساتھ بات چیت میں بھی اپنا سکتے ہیں۔ تاہم ابھی یہ واضح نہیں کہ ایسا رویہ محض کھیل اور تفریح کے طور پر اختیار کیا جاتا ہے یا اس سے بچوں کے مستقل سماجی رویوں میں تبدیلی آرہی ہے۔

اس مسئلے کے پیش نظر بعض ٹیکنالوجی کمپنیوں نے بچوں میں شائستگی کو فروغ دینے کے لیے اقدامات بھی کیے ہیں۔ مثال کے طور پر ایمیزون کے ایکو ڈاٹ میں ’پولائٹ موڈ‘ متعارف کرایا گیا ہے۔ اس میں اگر بچہ الیکسا سے کوئی سوال کرتے وقت ’پلیز‘ کہتا ہے تو الیکسا اس کا شکریہ ادا کرتی ہے۔ اس طرح بچوں کو مؤدبانہ گفتگو کی حوصلہ افزائی کی جاتی ہے۔

تاہم اس حوالے سے یہ احتیاط بھی ضروری ہے کہ بچے مصنوعی ذہانت اور انسان کے درمیان فرق کو سمجھتے رہیں۔

ہوم ورک میں مدد یا بچوں کی خود سیکھنے کی صلاحیت میں کمی؟

تعلیم کے میدان میں مصنوعی ذہانت کا استعمال ایک اہم سوال بھی پیدا کرتا ہے کہ کیا بچے اس کے ذریعے واقعی سیکھ رہے ہیں یا صرف تیار جوابات حاصل کرکے اپنی محنت اور سوچنے کی صلاحیت کو محدود کررہے ہیں؟

مثال کے طور پر جب بچے ریاضی کے سوالات حل کرنے یا مضمون لکھنے کے لیے چیٹ جی پی ٹی جیسے ٹولز کا استعمال کرتے ہیں تو انہیں فوری طور پر بہتر جوابات اور معلومات مل جاتی ہیں۔ تحقیقی مشاہدات کے مطابق اے آئی کی مدد سے طلبہ بہتر معیار کے مضامین لکھ سکتے ہیں اور تعلیمی کاموں کی کارکردگی میں بھی بہتری لاسکتے ہیں۔ لیکن اصل سوال یہ ہے کہ کیا وہ اے آئی کی مدد کے بغیر بھی اسی معیار کا کام کرسکیں گے؟

ینگ شو کے مطابق مصنوعی ذہانت کو بچوں کو براہ راست جواب فراہم کرنے کے بجائے ان کی رہنمائی کرنے والے ایک تعلیمی معاون کے طور پر استعمال کیا جانا چاہیے۔ اگر اے آئی بچوں کو سوالات کے جواب خود تلاش کرنے اور مسائل حل کرنے کے طریقے سمجھائے تو اس کے اثرات طویل مدت تک برقرار رہ سکتے ہیں۔

ماہرین تعلیم اس عمل کو ’پروڈکٹیو اسٹرگلنگ‘ (Productive Struggling) یعنی سیکھنے کے دوران مثبت جدوجہد قرار دیتے ہیں۔ اس کا مطلب یہ ہے کہ جب بچہ کسی مسئلے کو حل کرنے میں دشواری محسوس کرتا ہے تو اسے فوراً جواب فراہم کرنے کے بجائے کچھ وقت سوچنے اور اپنی سمجھ بوجھ استعمال کرنے کا موقع دیا جائے۔ اس طرح بچے میں خود اعتمادی، مسئلہ حل کرنے کی صلاحیت اور آزادانہ طور پر سیکھنے کا رجحان پیدا ہوتا ہے۔

اس لیے ضروری ہے کہ مصنوعی ذہانت بچوں کی محنت اور سوچنے کے عمل کو ختم کرنے کے بجائے اسے مضبوط بنانے میں مددگار ثابت ہو۔

یوٹیوب اور دیگر پلیٹ فارمز پر اے آئی کا پوشیدہ استعمال

بہت سے والدین یہ سمجھتے ہیں کہ ان کے بچے صرف اس وقت مصنوعی ذہانت استعمال کرتے ہیں جب وہ چیٹ جی پی ٹی یا الیکسا جیسے ٹولز سے براہ راست سوال کرتے ہیں۔ حالانکہ حقیقت یہ ہے کہ بچے روزمرہ ڈیجیٹل سرگرمیوں کے دوران بھی مصنوعی ذہانت سے رابطے میں رہتے ہیں اور انہیں اس کا احساس تک نہیں ہوتا۔

اس کی ایک نمایاں مثال یوٹیوب کا خودکار ویڈیو سفارش کرنے والا نظام ہے۔ اس میں مصنوعی ذہانت بچے کی سابقہ ویڈیوز دیکھنے کی عادت اور دلچسپیوں کا جائزہ لے کر اگلی ویڈیوز تجویز کرتی ہے۔ اس طرح بچے براہ راست اے آئی سے گفتگو کیے بغیر بھی اس کے تیار کردہ نظام کے اثرات قبول کرتے رہتے ہیں۔

اس کے علاوہ بچے مصنوعی ذہانت سے مختلف موضوعات پر سوالات کرتے ہیں۔ بعض بچے آتش فشاں کے اندرونی نظام یا خلا کے بارے میں جاننا چاہتے ہیں تو کچھ اپنے ہوم ورک میں مدد لیتے ہیں۔ کئی بچے کھانے کی ترکیبوں، موسم اور روزمرہ زندگی سے متعلق معلومات بھی حاصل کرتے ہیں۔

ماہرین کے مطابق مصنوعی ذہانت نے بچوں کے لیے معلومات اور علم تک رسائی کے نئے راستے کھولے ہیں۔ یہ ایک مثبت پیش رفت ہے لیکن اس کے ساتھ بچوں میں حاصل شدہ معلومات کی سچائی اور اعتبار کو جانچنے کی صلاحیت پیدا کرنا بھی ضروری ہے۔

غلط معلومات اور اے آئی پر اندھا اعتماد ایک بڑا خطرہ

مصنوعی ذہانت کے حوالے سے ایک اہم تشویش یہ ہے کہ بچے اس سے حاصل ہونے والی ہر معلومات کو درست سمجھ سکتے ہیں۔ چیٹ جی پی ٹی اور دیگر جنریٹو اے آئی ٹولز معلومات کو گفتگو کے انداز میں پیش کرتے ہیں جس کی وجہ سے ان کے جوابات بظاہر مستند اور قابل اعتماد محسوس ہوتے ہیں۔ لیکن حقیقت میں اے آئی بعض اوقات غلط، نامکمل یا گمراہ کن معلومات بھی فراہم کرسکتی ہے۔

روایتی انٹرنیٹ سرچ میں صارفین کو مختلف ویب سائٹس اور ذرائع دیکھنے کا موقع ملتا ہے۔ اس کے برعکس جنریٹو اے آئی مختلف معلومات کو یکجا کرکے ایک جواب پیش کرتی ہے۔ اس صورت میں بچے کے لیے یہ جاننا مشکل ہوسکتا ہے کہ فراہم کردہ معلومات کہاں سے حاصل کی گئی ہیں اور ان کی حقیقت کیا ہے۔

ہارورڈ کی محقق ینگ شو کے مطابق بچوں میں اے آئی سے حاصل ہونے والی معلومات پر اعتماد کا انداز مختلف ہوسکتا ہے۔ بعض بچے معلومات کی درستگی جانچنے کے لیے اے آئی کی سابقہ کارکردگی اور اس کے موضوع سے متعلق علم کو دیکھتے ہیں جبکہ بعض بچے اس کے فراہم کردہ جوابات پر بلا تحقیق یقین کرلیتے ہیں۔

یہ صلاحیت بچوں کے پہلے سے موجود علم اور مصنوعی ذہانت کے کام کرنے کے طریقے سے متعلق ان کی سمجھ بوجھ پر بھی منحصر ہوتی ہے۔ اس لیے بچوں کو یہ سکھانا ضروری ہے کہ اے آئی کی جانب سے پیش کی گئی معلومات کو حتمی سچائی نہ سمجھیں بلکہ دیگر مستند ذرائع سے بھی ان کی تصدیق کریں۔

اے آئی لٹریسی: بچوں کے لیے نئی دور کی اہم ضرورت

مصنوعی ذہانت کے بڑھتے ہوئے استعمال نے تعلیم کے میدان میں ایک نئی ضرورت کو جنم دیا ہے جسے ’اے آئی لٹریسی‘ (AI Literacy) کہا جاتا ہے۔ اس سے مراد بچوں کو مصنوعی ذہانت کے کام کرنے کے طریقے، اس کی صلاحیتوں اور حدود کے بارے میں بنیادی سمجھ بوجھ فراہم کرنا ہے۔

اس تعلیم کے ذریعے بچوں کو بتایا جاتا ہے کہ اے آئی کس طرح معلومات تیار کرتی ہے، اس کے جوابات میں غلطی کیوں ہوسکتی ہے اور اس سے حاصل ہونے والی معلومات کی جانچ کس طرح کی جانی چاہیے۔

ینگ شو کے مطابق تحقیق سے یہ بات سامنے آئی ہے کہ پری اسکول کی عمر کے بچوں کو بھی مصنوعی ذہانت کے بنیادی اصول سمجھائے جاسکتے ہیں۔ اس طرح وہ اے آئی کی صلاحیتوں اور خامیوں کو بہتر طور پر سمجھنے کے قابل ہوجاتے ہیں۔

دنیا کے بعض تعلیمی اداروں میں اسکول جانے والے بچوں کے لیے اے آئی لٹریسی سے متعلق پروگرام اور ورکشاپس بھی شروع کی گئی ہیں۔ تاہم ابھی ان سہولیات کو عام تعلیمی نظام کا حصہ بنانے کی ضرورت ہے تاکہ زیادہ سے زیادہ بچے اس نئی ٹیکنالوجی کو سمجھ سکیں اور ذمہ داری کے ساتھ استعمال کرسکیں۔

والدین اور اساتذہ کا کردار کیوں اہم ہے؟

بچوں کو مصنوعی ذہانت کے مثبت استعمال کی طرف راغب کرنے میں والدین اور اساتذہ کا کردار بنیادی اہمیت رکھتا ہے۔ صرف بچوں کو اے آئی استعمال کرنے کی اجازت دینا یا اس پر مکمل پابندی عائد کردینا مسئلے کا حل نہیں ہے۔ اس کے بجائے انہیں یہ سمجھانا ضروری ہے کہ مصنوعی ذہانت ایک مددگار ذریعہ ہے اور اس پر مکمل انحصار مناسب نہیں۔

والدین کو چاہیے کہ وہ بچوں کی اے آئی سرگرمیوں سے باخبر رہیں اور ان کے ساتھ اس ٹیکنالوجی کے استعمال میں شریک ہوں۔ اگر بچہ کسی موضوع پر اے آئی سے معلومات حاصل کرتا ہے تو والدین اس سے مزید سوالات کرسکتے ہیں اور اسے یہ سمجھنے میں مدد دے سکتے ہیں کہ جواب درست ہے یا نہیں۔

اسی طرح اساتذہ کو بھی کلاس روم میں مصنوعی ذہانت کے تعمیری استعمال کے طریقے متعارف کرانے چاہئیں۔ بچوں کو ایسے تعلیمی کام دیے جاسکتے ہیں جن میں وہ اے آئی سے مدد حاصل کرنے کے بعد اپنی سوچ اور تحقیق کے ذریعے نتائج اخذ کریں۔

ینگ شو کے مطابق اس سلسلے میں صرف والدین اور اساتذہ ہی نہیں بلکہ مصنوعی ذہانت تیار کرنے والی کمپنیوں کی بھی ذمہ داری ہے۔ اے آئی ٹولز میں ایسے سوالات اور تنبیہی پیغامات شامل کیے جانے چاہئیں جو بچوں کو معلومات پر غور کرنے اور ان کی سچائی جانچنے کی ترغیب دیں۔

مثال کے طور پر اگر کوئی بچہ اے آئی سے حاصل کردہ معلومات کو دوسروں کے ساتھ شیئر کرنا چاہتا ہے تو اسے پہلے اس کی تصدیق کرنے کی یاد دہانی کرائی جاسکتی ہے۔ اس طرح بچوں میں جلد بازی کے بجائے سوچ سمجھ کر فیصلہ کرنے کی عادت پیدا ہوگی۔

اے آئی کا استعمال بچوں کو انسانوں سے دور نہ کرے

ماہرین کے نزدیک مصنوعی ذہانت کے استعمال میں سب سے اہم پہلو بچوں اور انسانوں کے درمیان حقیقی تعلقات کو برقرار رکھنا ہے۔ بچوں کی شخصیت صرف کتابوں اور ٹیکنالوجی سے نہیں بنتی بلکہ خاندان، اسکول، دوستوں اور معاشرتی ماحول کے ساتھ ان کے تجربات بھی ان کی نشوونما میں اہم کردار ادا کرتے ہیں۔

ینگ شو اور ان کی تحقیقی ٹیم نے ایک ایسے اے آئی نظام پر بھی کام کیا جس میں بچوں کے لیے کتاب پڑھنے کے دوران ایک مقبول بچوں کے کردار کو شامل کیا گیا تھا۔ اس نظام کی خاص بات یہ تھی کہ مصنوعی ذہانت صرف بچوں کو سوالات نہیں کرتی تھی بلکہ والدین کو بھی گفتگو میں شریک رہنے اور بچوں سے مختلف موضوعات پر بات کرنے کی ترغیب دیتی تھی۔

تحقیق کے مطابق اس طریقے سے نہ صرف بچوں کی زبان سیکھنے کی صلاحیت کو فائدہ پہنچا بلکہ والدین اور بچوں کے درمیان خاندانی تعلقات بھی مضبوط ہوئے۔ اس سے یہ بات سامنے آتی ہے کہ اگر مصنوعی ذہانت کو اس انداز میں تیار کیا جائے کہ وہ بچوں کو انسانوں سے دور کرنے کے بجائے ان کے درمیان رابطے کو بہتر بنائے تو اس کے مثبت نتائج سامنے آسکتے ہیں۔

ماہرین اس بات پر بھی زور دیتے ہیں کہ بچوں کی نشوونما کو صرف ٹیکنالوجی کے استعمال کے تناظر میں نہیں دیکھنا چاہیے۔ ایک ہی ڈیجیٹل پروگرام کا مختلف بچوں پر مختلف اثر ہوسکتا ہے۔ اس کا انحصار اس بات پر بھی ہوتا ہے کہ بچے کے ساتھ والدین موجود ہیں یا نہیں اور وہ اس سرگرمی کے دوران اس کی رہنمائی کررہے ہیں یا نہیں۔

مصنوعی ذہانت کے دور میں متوازن تربیت وقت کی ضرورت

مصنوعی ذہانت نے بچوں کی تعلیم اور معلومات تک رسائی کے طریقوں میں ایک نئی تبدیلی پیدا کردی ہے۔ اس کے ذریعے بچے اپنی دلچسپی کے موضوعات پر فوری معلومات حاصل کرسکتے ہیں اور اپنی تعلیمی صلاحیتوں کو بہتر بنا سکتے ہیں۔ لیکن اس کے ساتھ یہ بھی ضروری ہے کہ ان کی آزادانہ سوچ، تخلیقی صلاحیت، اخلاقی تربیت اور سماجی تعلقات متاثر نہ ہوں۔

ینگ شو کے مطابق مصنوعی ذہانت کو بچوں کی نشوونما میں ایک قیمتی معاون وسیلے کے طور پر قبول کیا جانا چاہیے لیکن اسے انسانی تعلقات کی جگہ نہیں دینی چاہیے۔ بچوں کو یہ سمجھانا ضروری ہے کہ وہ کسی انسان سے نہیں بلکہ ایک کمپیوٹر پروگرام سے رابطے میں ہیں۔ اس کے ساتھ انہیں اے آئی کی صلاحیتوں اور حدود سے بھی واقف کرایا جانا چاہیے۔

حقیقت یہ ہے کہ آنے والے وقت میں مصنوعی ذہانت تعلیم اور روزمرہ زندگی کا مزید اہم حصہ بنے گی۔ ایسے میں بچوں کو اس ٹیکنالوجی سے دور رکھنے کے بجائے اس کے ذمہ دارانہ استعمال کی تربیت دینا زیادہ ضروری ہے۔ اس مقصد کے لیے والدین، اساتذہ، تعلیمی اداروں اور ٹیکنالوجی کمپنیوں کو مشترکہ طور پر کام کرنا ہوگا تاکہ نئی نسل جدید ٹیکنالوجی سے فائدہ اٹھانے کے ساتھ انسانی اقدار، سماجی شعور اور آزادانہ سوچ کو بھی برقرار رکھ سکے۔

بنیادی مقصد ایسی نسل کی تربیت ہونا چاہیے جو مصنوعی ذہانت کو اپنا رہنما اور مددگار تو بنائے لیکن اپنی سوچنے، سمجھنے، سوال کرنے اور انسانی رشتوں کو نبھانے کی صلاحیت کبھی نہ کھوئے۔