مصنوعی ذہانت کے میدان میں ہندوستان کی کامیابی کا راستہ امریکہ اور چین سے مختلف ہو سکتا ہے۔ ایک نئی تحقیق کے مطابق ملک کا بڑھتا ہوا ہنرمند طبقہ۔ صارفین کی وسیع تعداد اور تیزی سے پھیلتا ہوا ڈیجیٹل نظام ایسے وسائل ہیں جو مصنوعی ذہانت کے اگلے مرحلے میں ہندوستان کو اہم کردار ادا کرنے کا موقع فراہم کر سکتے ہیں۔مصنوعی ذہانت کی عالمی دوڑ کو عموماً بڑے ماڈلز تیار کرنے۔ جدید ترین چپس حاصل کرنے اور سب سے زیادہ کمپیوٹنگ طاقت پر کنٹرول قائم کرنے کے مقابلے کے طور پر دیکھا جاتا ہے۔ بلاشبہ یہ اس دوڑ کا ایک اہم حصہ ہے لیکن کہانی صرف اتنی نہیں ہے۔ جیسے جیسے مصنوعی ذہانت تجربہ گاہوں سے نکل کر کاروبار۔ سرکاری خدمات اور روزمرہ زندگی کا حصہ بن رہی ہے۔ ایک نئی مسابقت بھی جنم لے رہی ہے۔ یہ مسابقت اس بات کی ہے کہ کون اس ٹیکنالوجی کو بڑے پیمانے پر مفید ایپلی کیشنز میں تبدیل کرنے کی صلاحیت رکھتا ہے۔

انڈین کونسل فار ریسرچ آن انٹرنیشنل اکنامک ریلیشنز (ICRIER) کی ایک حالیہ رپورٹ اسٹیٹ آف انڈیا کی ڈیجیٹل اکانومی اس سوال کا ایک امید افزا جواب پیش کرتی ہے۔ رپورٹ میں قومی مصنوعی ذہانت کے نظام کے جائزے میں ہندوستان کو چوتھے مقام پر رکھا گیا ہے۔ اس فہرست میں امریکہ۔ چین اور سنگاپور ہندوستان سے آگے ہیں۔ رپورٹ کا کہنا ہے کہ ہندوستان کو مصنوعی ذہانت کے دو بڑے عالمی طاقتوں کے سرمایہ پر مبنی ماڈل کی نقل کرنے کی ضرورت نہیں ہے۔ اس کی اصل طاقت ہنرمند افراد کی بنیاد پر جدت طرازی اور وسیع پیمانے پر استعمال ہونے والی ایپلی کیشنز اور اے آئی ایجنٹس تیار کرنے میں ہے۔

رپورٹ کے مطابق ہندوستان میں امریکہ کے بعد مصنوعی ذہانت کے شعبے سے وابستہ افراد کی دوسری سب سے بڑی تعداد موجود ہے۔ اس کے علاوہ ہندوستان مصنوعی ذہانت استعمال کرنے والوں کی ایک بڑی عالمی برادری کا حصہ بھی ہے۔ دنیا بھر میں ابھرتی ہوئی اور ترقی پذیر معیشتوں کا حصہ مصنوعی ذہانت کے مجموعی صارفین میں 72 فیصد ہے۔ ہندوستان اور چین مل کر ان صارفین کا تقریباً دو پانچواں حصہ بنتے ہیں۔ ٹیکنالوجی کا اگلا مرحلہ صرف ان ممالک سے متاثر نہیں ہوگا جو بنیادی ماڈلز تیار کرتے ہیں بلکہ ان ممالک کا کردار بھی اہم ہوگا جو مختلف معیشتوں اور معاشروں کے حقیقی مسائل حل کرنے کے لیے اس ٹیکنالوجی کا استعمال کرتے ہیں۔

قیادت کے لیے ایک مختلف راستہ

یہی وہ مقام ہے جہاں ہندوستان کی طاقت اہمیت اختیار کرتی ہے۔ ملک میں ٹیکنالوجی کے شعبے سے وابستہ بڑی افرادی قوت۔ انجینئرنگ کی مہارت۔ تیزی سے ترقی کرتا ہوا اسٹارٹ اپ نظام اور ڈیجیٹل عوامی بنیادی ڈھانچے کی تعمیر کا تجربہ ایک مضبوط بنیاد فراہم کرتے ہیں۔ ہندوستان میں بولی جانے والی متعدد زبانیں اور عوامی خدمات سے متعلق متنوع ضروریات بھی ایسے مواقع پیدا کرتی ہیں جن کے ذریعے ہندوستانی حالات کے مطابق کم خرچ مصنوعی ذہانت کی ایپلی کیشنز تیار کی جا سکتی ہیں۔

جون 2026 میں جے پی مورگن ایسیٹ مینجمنٹ کی جانب سے چار بین الاقوامی پیمانوں کی بنیاد پر کیا گیا ایک جائزہ بھی اس حوالے سے اہم ہے۔ اس میں کہا گیا ہے کہ مصنوعی ذہانت میں قیادت صرف تحقیق یا ہنرمند افراد کی موجودگی سے حاصل نہیں ہوتی۔ بنیادی ڈھانچہ۔ سرمایہ کاری اور کاروباری اداروں اور حکومتوں کی جانب سے اس ٹیکنالوجی کے استعمال کی صلاحیت بھی اتنی ہی اہم ہے۔رپورٹ میں خصوصی نوعیت کے ماڈلز کے بڑھتے ہوئے کردار کو بھی اجاگر کیا گیا ہے۔ کمپنیوں کو اکثر اپنے مخصوص ڈیٹا اور ضروریات کے مطابق تربیت یافتہ چھوٹے مصنوعی ذہانت کے نظام سے زیادہ بہتر نتائج حاصل ہوتے ہیں۔ اس کے لیے ضروری نہیں کہ وہ ہمیشہ انتہائی مہنگے اور بڑے پیمانے کے ماڈلز پر انحصار کریں۔

بینکوں۔ اسپتالوں۔ صنعتوں۔ کھیتوں اور لاجسٹکس کمپنیوں کو پہلے ہی اپنے مسائل اور ضروریات کا علم ہے۔ ان کے پاس قیمتی ڈیٹا بھی موجود ہے جسے مسائل کے حل کے لیے استعمال کیا جا سکتا ہے۔ مصنوعی ذہانت طبی تشخیص کو بہتر بنانے۔ مالی دھوکہ دہی کی نشاندہی کرنے۔ سپلائی چین کو منظم کرنے۔ کسانوں کی رہنمائی کرنے اور عوامی خدمات کو زیادہ مؤثر بنانے میں مدد دے سکتی ہے۔ ان شعبوں میں ہندوستان دنیا کے بڑے مصنوعی ذہانت کے ماڈلز سے براہ راست مقابلہ کیے بغیر بھی بے پناہ معاشی قدر پیدا کر سکتا ہے۔

ہندوستان کے لیے اصل موقع یہ نہیں ہے کہ وہ کسی دوسرے ملک کے ترقیاتی سفر کی ہر منزل کی نقل کرے بلکہ اسے اپنی معیشت کے مطابق صلاحیتیں پیدا کرنی چاہئیں۔ یہی حکمت عملی ہندوستانی کمپنیوں کو عالمی منڈیوں کے لیے مصنوعات تیار کرنے میں مدد دے سکتی ہے۔ خاص طور پر صحت۔ مالیاتی خدمات۔ تعلیم اور موسمیاتی تبدیلی سے نمٹنے کے شعبوں میں مقامی ضروریات کی سمجھ اور کم لاگت حل ہندوستان کی مسابقتی طاقت بن سکتے ہیں۔

مضبوط بنیادوں کی تعمیر

اس کا مطلب یہ نہیں ہے کہ کمپیوٹنگ کا بنیادی ڈھانچہ اہمیت نہیں رکھتا۔ مصنوعی ذہانت کی تحقیق۔ ماڈلز کی تیاری اور ان کے استعمال کے لیے اعلیٰ کارکردگی والے کمپیوٹنگ نظام تک قابل اعتماد رسائی ضروری ہے۔حکومت کی جانب سے 10,371.92 کروڑ روپے کے بجٹ کے ساتھ پانچ سال کے لیے منظور کیا گیا انڈیا اے آئی مشن اسی مقصد کے تحت شروع کیا گیا ہے۔ اس کا مقصد کمپیوٹنگ سہولیات تک رسائی بڑھانا۔ مقامی ماڈلز کی تیاری میں مدد دینا اور اسٹارٹ اپس۔ محققین اور تعلیمی اداروں کو اس شعبے میں حصہ لینے کا موقع فراہم کرنا ہے۔

مشترکہ کمپیوٹنگ سہولت کے تحت دستیاب صلاحیت 45,000 جی پی یوز سے تجاوز کر چکی ہے۔ اگست 2026 تک 237 منصوبوں نے رعایتی کمپیوٹنگ سہولت سے فائدہ اٹھایا تھا۔ ان منصوبوں کے تحت مجموعی طور پر 93.18 لاکھ جی پی یو گھنٹے استعمال کیے گئے۔ مقامی سطح پر بنیادی ماڈلز تیار کرنے کے لیے 506 درخواستوں میں سے 20 منصوبوں کا انتخاب بھی کیا گیا ہے۔ان اقدامات سے اسٹارٹ اپس۔ محققین اور اداروں کے لیے جدید کمپیوٹنگ سہولیات تک رسائی آسان ہو رہی ہے۔ بصورت دیگر ان کے لیے ان سہولیات کے اخراجات برداشت کرنا مشکل ہوتا۔ تاہم اصل چیلنج یہ ہے کہ اس سہولت کو مفید ماڈلز۔ مصنوعات۔ تحقیق اور دانشورانہ ملکیت میں کیسے تبدیل کیا جائے۔ اس میں ایسے نظاموں کی تیاری بھی شامل ہے جو ہندوستان کی مختلف زبانوں اور عوامی ضروریات کے مطابق کام کر سکیں۔

اس مقصد کے لیے درکار بنیادی ڈھانچہ بھی تیزی سے پھیل رہا ہے۔ اگست 2026 تک ہندوستان میں ڈیٹا سینٹرز کی نصب شدہ صلاحیت تقریباً 1.57 گیگاواٹ تک پہنچ گئی تھی۔ 2020 میں یہ صلاحیت تقریباً 375 میگاواٹ تھی۔ حکومت کا اندازہ ہے کہ 2030 تک یہ صلاحیت تقریباً 8 گیگاواٹ تک پہنچ سکتی ہے۔ ڈیٹا سینٹرز کی توسیع سے سرمایہ کاری کو فروغ مل سکتا ہے۔ تکنیکی خدمات مضبوط ہو سکتی ہیں اور مقامی سپلائرز کے لیے نئے مواقع پیدا ہو سکتے ہیں۔

ایسی ترقی جو سب کے کام آئے

تیزی سے پھیلتے ہوئے اس بنیادی ڈھانچے کے لیے محتاط منصوبہ بندی بھی ضروری ہے۔ ڈیٹا سینٹرز کو مسلسل بجلی۔ مؤثر کولنگ نظام اور پانی کے محتاط استعمال کی ضرورت ہوتی ہے۔ حکومت کا اندازہ ہے کہ 2031-32 تک ڈیٹا سینٹرز کی بجلی کی طلب 13.56 گیگاواٹ تک پہنچ سکتی ہے۔ اس لیے قابل تجدید توانائی میں اضافہ۔ توانائی کی بچت کرنے والے کولنگ نظام۔ پانی کی ری سائیکلنگ اور مناسب مقامات کا انتخاب ضروری ہوگا تاکہ یہ ترقی پائیدار بھی رہے۔

مصنوعی ذہانت زراعت سے متعلق بہتر مشورے فراہم کرنے۔ صحت کی سہولیات تک رسائی بڑھانے۔ مختلف زبانوں میں تعلیم کو فروغ دینے۔ سرکاری خدمات کو مؤثر بنانے اور چھوٹے کاروباروں کو مسابقت کے قابل بنانے میں مدد دے سکتی ہے۔ انڈیا اے آئی مشن کی جانب سے کمپیوٹنگ سہولیات تک آسان رسائی اور مقامی ماڈلز کی تیاری پر توجہ اسی لیے اہم ہے کیونکہ مصنوعی ذہانت کے فوائد صرف چند بڑی کمپنیوں یا بڑے شہروں تک محدود نہیں رہنے چاہئیں۔

فروری 2026 میں منعقدہ انڈیا اے آئی امپیکٹ سمٹ میں ہندوستان نے مصنوعی ذہانت کو جمہوری بنانے اور اسے شمولیت اور بااختیار بنانے کا ذریعہ بنانے کی ضرورت پر زور دیا تھا۔ خاص طور پر گلوبل ساؤتھ کے ممالک کے لیے اس ٹیکنالوجی کو قابل رسائی بنانے کی بات کی گئی تھی۔یہ مقصد ہندوستان کی اس صلاحیت سے مطابقت رکھتا ہے جس کے تحت وہ مختلف ضروریات رکھنے والی آبادیوں اور معیشتوں کے لیے کم خرچ اور آسان حل تیار کر سکتا ہے۔ ہندوستان کی وسیع منڈی اور ہنرمند افرادی قوت اسے ترقی پذیر دنیا میں مصنوعی ذہانت کے استعمال کے طریقوں کو تشکیل دینے میں اہم کردار ادا کرنے کا موقع فراہم کرتی ہے۔

ہندوستان کو ہر مقابلہ دوسروں کی طے کردہ شرائط پر جیتنے کی ضرورت نہیں ہے۔ اسے تحقیق میں سرمایہ کاری کرنی ہوگی۔ کمپیوٹنگ سہولیات کو عام کرنا ہوگا۔ کاروباری اداروں میں اس ٹیکنالوجی کے استعمال کی حوصلہ افزائی کرنی ہوگی اور اپنے ہنرمند افراد کو خیالات کو مصنوعات اور کاروبار میں تبدیل کرنے کے مواقع فراہم کرنے ہوں گے۔ اس کے ساتھ بنیادی ڈھانچے کی ترقی کو مؤثر اور پائیدار بنانا بھی ضروری ہے۔مصنوعی ذہانت کی عالمی قیادت میں نمایاں مقام صرف درجہ بندی یا سرمایہ کاری کے اعلانات سے حاصل نہیں ہوگا۔ یہ مقام اس وقت حاصل ہوگا جب ہندوستانی محققین۔ کاروباری افراد اور ادارے اس ٹیکنالوجی کی تشکیل میں اپنا کردار ادا کریں گے۔ جب کاروباری ادارے اس کے ذریعے اپنی پیداواری صلاحیت بڑھائیں گے اور جب عام شہری اپنی روزمرہ زندگی میں اس کے فوائد محسوس کریں گے۔ہندوستان کے پاس ہنرمند افراد بھی ہیں۔ وسیع منڈی بھی ہے اور آگے بڑھنے کا عزم بھی۔ اب اصل ضرورت ان تمام صلاحیتوں کو ایک دیرپا طاقت میں تبدیل کرنے کی ہے۔

مصنف ایک تجربہ کار صحافی اور شعبۂ ابلاغ عامہ کے ماہر ہیں۔