ٹورنامنٹ میں چار گروپ بنائے گئے ہیں اور ہر گروپ میں چار ٹیمیں شامل ہوں گی۔ دونوں میزبان ممالک کے چار میدانوں پر مجموعی طور پر 41 میچ کھیلے جائیں گے۔ بنگلہ دیش میں چٹگاؤں کا بیر شریشٹھ شہید فلائٹ لیفٹیننٹ متیع الرحمان کرکٹ اسٹیڈیم اور سلہٹ انٹرنیشنل کرکٹ اسٹیڈیم میچوں کی میزبانی کریں گے۔ نیپال میں کٹھمنڈو کے ٹی یو انٹرنیشنل کرکٹ اسٹیڈیم اور اپر ملپانی انٹرنیشنل کرکٹ گراؤنڈ میں مقابلے ہوں گے۔

چار گروپوں میں ٹیموں کی تقسیم

گروپ اے میں ہندوستان۔ آئرلینڈ۔ ویسٹ انڈیز اور نیپال شامل ہیں۔ گروپ بی میں جنوبی افریقہ۔ نیوزی لینڈ۔ پاکستان اور ساموا کو جگہ دی گئی ہے۔ گروپ سی میں آسٹریلیا۔ بنگلہ دیش۔ نائجیریا اور متحدہ عرب امارات کی ٹیمیں شامل ہیں جبکہ گروپ ڈی میں انگلینڈ۔ سری لنکا۔ امریکہ اور اسکاٹ لینڈ کی ٹیمیں مقابلہ کریں گی۔

افتتاحی روز چار میچ کھیلے جائیں گے جن میں آٹھ ٹیمیں حصہ لیں گی۔ میزبان بنگلہ دیش کی ٹیم متحدہ عرب امارات کے خلاف میدان میں اترے گی۔ نیپال اپنی مہم کا آغاز اگلے روز آئرلینڈ کے خلاف کرے گا جبکہ دفاعی چیمپئن ہندوستان کا پہلا مقابلہ 22 جنوری کو ویسٹ انڈیز سے ہوگا۔

خواتین کرکٹ کے فروغ کا اہم موقع

آئی سی سی کے چیف ایگزیکٹیو سنجوگ گپتا نے کہا کہ انڈر 19 خواتین ٹی 20 ورلڈ کپ خواتین کی کرکٹ کی ترقی میں اہم کردار ادا کرتا ہے۔ یہ نوجوان کھلاڑیوں کو اپنی عمر کے گروپ میں اعلیٰ سطح پر مقابلہ کرنے اور عالمی سطح پر تجربہ حاصل کرنے کا موقع فراہم کرتا ہے۔

آئی سی سی کے مطابق سنجوگ گپتا نے کہا کہ بنگلہ دیش اور نیپال میں 16 ٹیموں کی شرکت خواتین کی کرکٹ میں بڑھتے ہوئے ٹیلنٹ کو اجاگر کرے گی۔ اس سے کرکٹ میں پہلے سے مضبوط مقام رکھنے والے ممالک کے ساتھ ابھرتے ہوئے کرکٹ ممالک کے کھلاڑیوں کو بھی بین الاقوامی مقابلوں کے ذریعے اپنی صلاحیتیں نکھارنے کا موقع ملے گا۔

انہوں نے مزید کہا کہ ایسے ٹورنامنٹ عالمی سطح پر کرکٹ کو مضبوط بنانے اور نئے شائقین تک اس کھیل کو پہنچانے میں اہمیت رکھتے ہیں۔ آئی سی سی میزبان ممالک کے ساتھ مل کر کامیاب انعقاد کے لیے کام کرے گی اور تمام 16 ٹیموں کی تیاریوں کے لیے نیک خواہشات کا اظہار کرتی ہے۔

26 جنوری تک گروپ مرحلے کے مقابلے

گروپ مرحلے کے میچ 26 جنوری تک جاری رہیں گے۔ اس کے بعد کوالیفائی کرنے والی ٹیمیں سپر سکس مرحلے میں پہنچیں گی جہاں انہیں دو گروپوں میں تقسیم کیا جائے گا۔ ہر گروپ کی دو بہترین ٹیمیں سیمی فائنل میں جگہ بنائیں گی۔

سیمی فائنل 4 فروری کو چٹگاؤں کے بیر شریشٹھ شہید فلائٹ لیفٹیننٹ متیع الرحمان کرکٹ اسٹیڈیم میں کھیلے جائیں گے جبکہ 5 فروری کو متبادل دن کے طور پر رکھا گیا ہے۔ فائنل 6 فروری کو مقامی وقت کے مطابق دوپہر 1 بج کر 30 منٹ پر ہوگا۔ ضرورت پڑنے پر 7 فروری کو متبادل دن کے طور پر استعمال کیا جائے گا۔