ممبئی : انڈین کرکٹ کنٹرول بورڈ نے ٹی20 کے بعد ون ڈے کرکٹ میں بھی ویرات کوہلی کی جگہ روہت شرما کو ٹیم انڈیا کا کپتان مقرر کردیا ہے البتہ ٹیسٹ کرکٹ میں کوہلی ہی کپتان رہیں گے۔

بورڈ آف کنٹرول فار کرکٹ ان انڈیا(بی سی سی آئی) نے سماجی رابطوں کی ویب سائٹ ٹوئٹر پر اعلان کیاکہ سلیکشن کمیٹی نے روہت شرما کو ون ڈے اور ٹی20 ٹیم کا مستقل کپتان مقرر کردیا ہے۔

ویرات کوہلی نے ٹی20 ورلڈ کپ سے قبل کھیل کے مختصر ترین فارمیٹ میں ٹیم کی قیادت سے استعفیٰ دے دیا تھا اور عالمی ایونٹ کے بعد بورڈ نے روہت کو ان کا جانشین بنانے کا اعلان کیا تھا۔ 2007 میں ڈیبیو کرنے والے روہت شرما اپنے جارحانہ کھیل اور انڈین پریمیئر لیگ میں شاندار انداز قیادت کے لیے شہرت رکھتے ہیں۔ انہیں ابتدائی طور پر صرف محدود اوورز کی کرکٹ کے لیے بھارتی ٹیم کا حصہ بنایاگیا تھا لیکن 2013 میں وہ ٹیسٹ ڈیبیو کرنے میں بھی کامیاب رہے تھے۔

ہٹ مین‘ کے نام سے مشہور جارح مزاج بلے باز نے آئی پی ایل میں ممبئی انڈینز کی بہترین انداز میں قیادت کی اور ان کی قیادت میں ٹیم پانچ مرتبہ ٹائٹل اپنے نام کر چکی ہے۔

-ورڈ نے دو فارمیٹس میں قیادت سونپنے کے ساتھ ساتھ اجنکیا راہانے کی جگہ روہت کو ٹیسٹ ٹیم کا نائب کپتان بھی مقرر کردیا ہے۔

دوسری جانب ویرات کوہلی رائل چیلنجر بنگلور کی قیادت سے بھی استعفیٰ دے چکے ہیں کیونکہ آج تک فرنچائز ایک بھی ایونٹ میں چیمپیئن بننے کا اعزاز حاصل نہیں کر سکی۔

The All-India Senior Selection Committee also decided to name Mr Rohit Sharma as the Captain of the ODI & T20I teams going forward.#TeamIndia | @ImRo45 pic.twitter.com/hcg92sPtCa

— BCCI (@BCCI) December 8, 2021

روہت شرما کو ون ڈے ٹیم کا کپتان بنانے کا اعلان ایک ایسے موقع پر کیا گیا ہے جب ٹیم دورہ جنوبی افریقہ کے لیے روانہ ہونے والی ہے اور مہمان ٹیم افریقی سرزمین پر ورلڈ ٹیسٹ چیمپیئن شپ کے تین ٹیسٹ میچز کھیلنے کے ساتھ ساتھ تین ون ڈے میچز بھی کھیلے گی۔

واضح رہے کہ ٹی20 ورلڈ کپ میں بھارتی ٹیم کی کارکردگی انتہائی مایوس کن رہی تھی اور ایونٹ کے لیے فیورٹ تصور کی جانے والی میزبان ٹیم پہلے ہی راؤنڈ میں باہر ہو گئی تھی۔

 واضح رہے کہ ویرات کوہلی کی قیادت میں ٹیم کسی بھی فارمیٹ میں آئی سی سی ٹرافی جیتنے سے محروم رہی ہے۔