نئی دہلی۔ بی سی سی آئی کی سلیکشن کمیٹی نے ویسٹ انڈیز کے خلاف آئندہ گھریلو ون ڈے سیریز کے لیے ہندوستان کی 15 رکنی ٹیم کا اعلان کردیا ہے۔ روہت شرما اور وراٹ کوہلی کو ٹیم میں برقرار رکھا گیا ہے جبکہ شبمن گل ٹیم کی قیادت کریں گے اور کے ایل راہل نائب کپتان ہوں گے۔27 ستمبر سے شروع ہونے والی سیریز ہندوستان کو 2027 ون ڈے ورلڈ کپ کی تیاریوں کے دوران کئی کھلاڑیوں کو آزمانے کا موقع فراہم کرے گی۔

ریشبھ پنت کو آئندہ ایرانی کپ کے لیے ریسٹ آف انڈیا ٹیم کا کپتان مقرر کیا گیا ہے۔ تاہم ون ڈے ٹیم میں ان کی مسلسل غیر موجودگی قابل ذکر ہے۔ پنت نومبر 2024 سے ون ڈے ٹیم کا حصہ نہیں ہیں۔ایشین گیمز میں شرکت کے باعث ایشان کشن دستیاب نہیں ہوں گے۔ اس لیے دھروو جوریل کو کے ایل راہل کے ساتھ دوسرے وکٹ کیپر کے طور پر ٹیم میں شامل کیا گیا ہے۔

ہندوستان کو رواں سال کے اواخر میں نیوزی لینڈ اور آسٹریلیا کے خلاف ٹیسٹ سیریز بھی کھیلنی ہے۔ موجودہ صورتحال میں ایسا لگتا ہے کہ وائٹ بال کرکٹ میں پنت کو وکٹ کیپر کے طور پر ترجیح نہیں دی جا رہی ہے۔ٹیم میں رویندر جڈیجا اور محمد سراج کی بھی واپسی ہوئی ہے۔ جڈیجا انگلینڈ کے خلاف حالیہ ون ڈے سیریز کا حصہ نہیں تھے جبکہ ورک لوڈ کو مدنظر رکھتے ہوئے سراج کو انگلینڈ دورے کے لیے آرام دیا گیا تھا۔

2027 ورلڈ کپ سے قبل جڈیجا کی پوزیشن پر اب بھی سوال برقرار ہے۔ انہیں ایک بار پھر ون ڈے ٹیم میں شامل کیا گیا ہے جبکہ اکشر پٹیل ہندوستان کی ٹی 20 ٹیم کے ساتھ ایشین گیمز میں شرکت کریں گے۔

سلیکٹرز نے جموں و کشمیر کے فاسٹ بولر عاقب نبی اور پنجاب کے آل راؤنڈر نمن دھیر کو پہلی بار ون ڈے ٹیم میں شامل کیا ہے۔ ان دونوں کی شمولیت سے ٹیم میں نئے آپشنز پیدا ہوئے ہیں۔ ٹیم میں نتیش کمار ریڈی۔ یشسوی جیسوال۔ رتوراج گائیکواڑ اور گورنور برار بھی شامل ہیں۔ہندوستان کی ون ڈے ٹیم: شبمن گل کپتان۔ روہت شرما۔ وراٹ کوہلی۔ رتوراج گائیکواڑ۔ کے ایل راہل نائب کپتان۔ دھروو جوریل۔ نتیش کمار ریڈی۔ رویندر جڈیجا۔ کلدیپ یادو۔ پرسدھ کرشنا۔ گورنور برار۔ محمد سراج۔ عاقب نبی۔ یشسوی جیسوال اور نمن دھیر۔