پیر کی صبح تک جنوبی افریقہ برطانیہ ہندوستان امریکہ اور آسٹریلیا کے شائقین ٹکٹوں کی رجسٹریشن میں سب سے آگے رہے۔ افریقی براعظم سے بھی زبردست دلچسپی سامنے آئی ہے۔ میزبان ممالک جنوبی افریقہ زمبابوے اور نمیبیا سمیت افریقی شائقین کی جانب سے مجموعی طور پر 1 کروڑ 49 لاکھ 36 ہزار 708 درخواستیں موصول ہوئی ہیں۔جنوبی افریقہ کے 8 مقامات پر ہونے والے 41 میچوں کے لیے 10 کروڑ 50 لاکھ سے زائد درخواستیں موصول ہو چکی ہیں۔ جنوبی افریقہ کی ٹیم کے 11 میچوں کے لیے تقریباً 2 کروڑ 60 لاکھ درخواستیں موصول ہوئی ہیں۔ ان میں پہلے سے طے شدہ سپر 7 مرحلے کے میچ بھی شامل ہیں۔
زمبابوے میں ٹکٹوں کی درخواستوں کی تعداد 1 کروڑ 33 لاکھ 50 ہزار 190 تک پہنچ گئی ہے۔ وہاں گروپ مرحلے کے میچوں میں سب سے زیادہ دلچسپی زمبابوے اور ہندوستان کے مقابلے میں دکھائی دے رہی ہے۔ 24 اکتوبر کو وکٹوریہ فالز کے نئے موسِی اوآ تونیا انٹرنیشنل کرکٹ اسٹیڈیم میں ہونے والے اس میچ کے لیے 33 لاکھ سے زائد درخواستیں موصول ہوئی ہیں۔
نمیبیا کے ونڈہوک میں واقع نمیبیا کرکٹ گراؤنڈ پر ہونے والے 6 میچوں کے لیے 20 لاکھ سے زائد ٹکٹوں کی درخواستیں موصول ہوئی ہیں۔ ان میں تقریباً 9 لاکھ درخواستیں 8 اکتوبر کو انگلینڈ اور بنگلہ دیش کے درمیان ہونے والے میچ کے لیے ہیں۔10 اکتوبر کو جوہانسبرگ میں ہندوستان اور پاکستان کے درمیان ہونے والے مقابلے نے بھی شائقین کی غیر معمولی توجہ حاصل کی ہے۔ اس میچ کے لیے 83 لاکھ 97 ہزار 294 درخواستیں موصول ہوئی ہیں۔ اسی شہر میں 21 نومبر کو ہونے والے فائنل کے لیے بھی 79 لاکھ 944 درخواستیں موصول ہو چکی ہیں۔
آئی سی سی کے جنرل منیجر برائے ایونٹس اینڈ کرکٹ آپریشنز گورو سکسینہ نے کہا کہ 2027 ورلڈ کپ کے لیے شائقین کا ردعمل غیر معمولی ہے۔ یہ دلچسپی ٹورنامنٹ کی عالمی مقبولیت اور 24 سال بعد مینز کرکٹ ورلڈ کپ کی افریقہ واپسی کی اہمیت کو ظاہر کرتی ہے۔ جنوبی افریقہ زمبابوے اور نمیبیا میں شائقین کی بھرپور دلچسپی اس بات کا ثبوت ہے کہ یہ ٹورنامنٹ پورے براعظم اور دنیا بھر کے کرکٹ شائقین کو ایک ساتھ لانے کا بڑا موقع فراہم کرے گا۔انہوں نے شائقین سے اپیل کی کہ جو لوگ ابھی تک رجسٹریشن نہیں کرا سکے ہیں وہ 21 نومبر سے پہلے اپنا اندراج مکمل کرلیں تاکہ اس تاریخی ٹورنامنٹ کا حصہ بننے کا موقع حاصل کر سکیں۔
آئی سی سی مینز کرکٹ ورلڈ کپ 2027 کی مقامی آرگنائزنگ کمیٹی کے چیف ایگزیکٹیو قونڈیسا نگویانیا نے کہا کہ ٹکٹوں کی غیر معمولی مانگ اس بات کا اظہار ہے کہ جنوبی افریقہ زمبابوے اور نمیبیا میں اس ٹورنامنٹ کو لے کر زبردست جوش و خروش پایا جاتا ہے۔ افریقی ممالک سے تقریباً ڈیڑھ کروڑ درخواستیں موصول ہونا اور دنیا بھر سے شائقین کی دلچسپی اس بات کی علامت ہے کہ یہ ایونٹ لوگوں کو ایک دوسرے کے قریب لانے میں اہم کردار ادا کرے گا۔
انہوں نے کہا کہ کرکٹ کے علاوہ یہ ٹورنامنٹ تینوں ممالک کے عوام ثقافت اور مہمان نوازی کو عالمی سطح پر متعارف کرانے کا بھی ایک بڑا موقع ہوگا۔واضح رہے کہ مینز کرکٹ ورلڈ کپ 24 سال بعد افریقہ واپس آ رہا ہے۔ اکتوبر اور نومبر 2027 میں ہونے والے اس ٹورنامنٹ میں 12 مقامات پر مجموعی طور پر 57 میچ کھیلے جائیں گے۔ جنوبی افریقہ زمبابوے اور نمیبیا مشترکہ طور پر اس تاریخی ایونٹ کی میزبانی کریں گے۔
نمیبیا پہلی مرتبہ مینز کرکٹ ورلڈ کپ کے میچوں کی میزبانی کرے گا جبکہ زمبابوے وکٹوریہ فالز میں اپنے نئے کرکٹ اسٹیڈیم کو دنیا کے سامنے پیش کرے گا۔ ٹورنامنٹ میں 14 ٹیمیں حصہ لیں گی اور اس کا مقصد شائقین کے لیے زیادہ سے زیادہ سہولت اور رسائی کو یقینی بنانا ہے۔یہ ورلڈ کپ 2003 کے بعد پہلی مرتبہ افریقہ میں منعقد ہوگا اور نمیبیا کو پہلی بار سینئر سطح کے مینز کرکٹ ورلڈ کپ کے میچوں کی میزبانی کا موقع ملے گا۔
