آئچی ناگویا: ہندوستان کی مردوں کی 4x400 میٹر ریلے ٹیم نے منگل کو ایشین گیمز 2026 کے فائنل میں شاندار کارکردگی کا مظاہرہ کرتے ہوئے برونز میڈل اپنے نام کیا۔دھرم ویر چودھری۔ منو تھیککنالیل۔ جے کمار اور وشال تھینارسو پر مشتمل ہندوستانی ٹیم نے 3:01.61 کا وقت نکال کر تیسری پوزیشن حاصل کی۔ مقابلہ انتہائی سخت رہا اور ٹاپ 3 ٹیموں کے درمیان ایک سیکنڈ سے بھی کم کا فرق رہا۔

جاپان نے 3:00.75 کے وقت کے ساتھ گولڈ میڈل جیتا جبکہ قطر نے 3:00.93 کا وقت نکال کر سلور میڈل حاصل کیا۔ ہندوستان فائنل میں سب سے تیز کوالیفائر کے طور پر پہنچا تھا اور ٹیم نے شاندار دوڑ لگاتے ہوئے پوڈیم پر جگہ بنائی۔مردوں کی ٹیم کا برونز میڈل آئچی ناگویا ایشین گیمز میں ہندوستان کی ایتھلیٹکس مہم میں ایک اور کامیابی ہے۔ اس سے قبل اسی دن ہندوستانی خواتین کی 4x400 میٹر ریلے ٹیم نے گولڈ میڈل جیتا تھا۔

کِرن۔ ماچیترا پُووما۔ پراچی اور ویتھیا رامراج پر مشتمل ہندوستانی خواتین کی ٹیم نے 3:29.69 کا وقت نکال کر گولڈ میڈل جیتا۔ بحرین نے 3:30.21 کے وقت کے ساتھ سلور میڈل حاصل کیا جبکہ چین نے 3:31.02 کے وقت کے ساتھ برونز میڈل جیتا۔ویتھیا رامراج نے اس سے قبل خواتین کی 400 میٹر ہرڈلز میں برونز میڈل جیتا تھا۔ ریلے میں گولڈ جیت کر انہوں نے آئچی ناگویا ایشین گیمز میں اپنا ایک اور میڈل حاصل کیا۔

ہندوستانی خواتین کی 4x400 میٹر ریلے ٹیم کا گولڈ میڈل اس دن ہندوستان کا دوسرا گولڈ تھا۔ اس سے قبل نیرُو دھانڈا نے تاریخ رقم کرتے ہوئے ایشین گیمز میں خواتین کے ٹریپ ایونٹ میں انفرادی میڈل جیتنے والی پہلی ہندوستانی خاتون بننے کا اعزاز حاصل کیا اور فائنل میں گولڈ میڈل جیتا۔نیرُو دھانڈا نے 30 میں سے 28 پوائنٹس حاصل کرکے پہلی پوزیشن حاصل کی۔ چین کی سُن یونونگ نے 30 میں سے 26 پوائنٹس کے ساتھ سلور میڈل جیتا جبکہ متحدہ عرب امارات کی ہاجر عبد المالک نے 25 میں سے 21 پوائنٹس کے ساتھ برونز میڈل حاصل کیا۔ نیرُو دھانڈا کی اس کامیابی کے ساتھ ایشین گیمز 2026 میں شوٹنگ کے مقابلوں میں ہندوستان کے گولڈ میڈلز کی تعداد 2 ہوگئی۔