نئی دہلی۔ ہندوستانی مردوں کی کرکٹ ٹیم کے ہیڈ کوچ گوتم گمبھیر نے پیر کو مرکزی وزیر داخلہ امت شاہ سے ملاقات کی اور ان کے وقت اور رہنمائی کے لیے اظہار تشکر کیا۔گمبھیر نے سوشل میڈیا پلیٹ فارم ایکس پر ملاقات کی تصاویر شیئر کرتے ہوئے کہا کہ وزیر داخلہ امت شاہ کے ساتھ خوشگوار ملاقات ہوئی۔ انہوں نے ان کے وقت اور رہنمائی پر شکریہ ادا کیا اور ان کی اچھی صحت اور خوش حالی کے لیے نیک خواہشات کا اظہار کیا۔
دریں اثنا وزارت نوجوانوں کے امور اور کھیل کے ایک ذریعے نے ہفتے کو اے این آئی کو بتایا کہ ہندوستانی مردوں کی کرکٹ ٹیم جاپان کے خلاف تاریخی واحد ٹی 20 انٹرنیشنل میچ میں بی سی سی آئی کی جرسی پہنے گی۔ جبکہ ایشین گیمز کے بقیہ مقابلوں کے لیے ٹیم کو اس کی باضابطہ ایشین گیمز کٹ مل گئی ہے۔وزارت کے ذریعے نے کہا کہ جاپان کے خلاف میچ میں ٹیم انڈیا بی سی سی آئی کی جرسی پہنے گی۔ ٹیم کو ٹورنامنٹ کے باقی مقابلوں کے لیے ایشین گیمز کی کٹ مل گئی ہے اور سائز سے متعلق مسئلہ حل ہوگیا ہے۔
20 ویں ایشین گیمز جاپان کے آئچی ناگویا میں 19 ستمبر سے 4 اکتوبر تک منعقد ہورہے ہیں۔ ہندوستان ان کھیلوں میں 36 کھیلوں میں حصہ لے رہا ہے۔ گزشتہ ایشین گیمز میں طلائی تمغہ جیتنے والا ہندوستان 2026 کے ایڈیشن میں اپنا پہلا میچ 28 ستمبر کو کوارٹر فائنل مرحلے میں کھیلے گا۔
وزارت کے ذریعے نے مزید واضح کیا کہ جاپان کے خلاف میچ دوستانہ مقابلہ ہے اور یہ ایشین گیمز کا حصہ نہیں ہے۔ اسی وجہ سے ٹیم اس میچ میں اپنی معمول کی جرسی پہنے گی۔انہوں نے کہا کہ جاپان کے خلاف میچ میں ٹیم اپنی معمول کی کٹ استعمال کرے گی کیونکہ یہ ایشین گیمز کا حصہ نہیں بلکہ دوستانہ میچ ہے۔ تاہم ٹورنامنٹ کے بقیہ مقابلوں کے لیے کٹ کے سائز سے متعلق مسئلہ حل ہوگیا ہے اور ٹیم کو اپنی کٹ مل چکی ہے۔
یہ وضاحت ایشین گیمز میں ہندوستانی ٹیم کی مہم سے قبل باضابطہ کٹ کی دستیابی اور اس کے سائز کو لے کر پیدا ہونے والی تشویش کے بعد سامنے آئی ہے۔سوزوکی کپ 22 ستمبر کو توچیگی پریفیکچر کے سانو انٹرنیشنل کرکٹ گراؤنڈ میں منعقد ہوگا۔جاپان کے خلاف ٹی 20 میچ اور ایشین گیمز کے لیے ہندوستانی ٹیم میں شریئس ایئر بطور کپتان شامل ہیں۔ دیگر کھلاڑیوں میں ابھیشیک شرما۔ سنجو سیمسن۔ ایشان کشن۔ شیوم دوبے۔ تلک ورما بطور نائب کپتان۔ اکشر پٹیل۔ واشنگٹن سندر۔ روی بشنوئی۔ جسپریت بمراہ۔ ارشدیپ سنگھ۔ ویبھو سوریہ ونشی۔ یش ٹھاکر اور وپراج نگم شامل ہیں۔
