آئیچی ناگویا۔ :ہندوستانی مردوں کی اسکیٹ ٹیم نے ایشین گیمز 2026 میں برونز میڈل جیت لیا ہے۔ اننت جیت سنگھ نروکا۔ معراج احمد خان اور بھوتیگ سنگھ گل پر مشتمل ہندوستانی ٹیم نے ٹیم ایونٹ میں 346 پوائنٹس کے ساتھ تیسری پوزیشن حاصل کی۔ہندوستان اور قازقستان کے پوائنٹس برابر رہے تاہم شو آف میں ہندوستانی ٹیم نے قازقستان کو شکست دے کر برونز میڈل اپنے نام کیا۔
اننت جیت سنگھ نروکا نے مردوں کے اسکیٹ انفرادی مقابلے کے فائنل میں بھی جگہ بنا لی ہے۔ ان کا فائنل ہندوستانی وقت کے مطابق دوپہر 12 بج کر 30 منٹ پر شروع ہوگا۔ایشین گیمز میں شوٹنگ کے میدان میں ہندوستان کی کارکردگی مسلسل مضبوط رہی ہے۔ ہندوستانی خواتین کی اسکیٹ ٹیم نے بھی برونز میڈل حاصل کیا۔ رائزہ ڈھلوں۔ پریناز ڈھالیوال اور مہیشوری چوہان نے مجموعی طور پر 331 پوائنٹس حاصل کرکے تیسری پوزیشن حاصل کی۔ چین نے 346 پوائنٹس کے ساتھ گولڈ جبکہ قازقستان نے سلور میڈل حاصل کیا۔
اولمپک میڈلسٹ منو بھاکر نے خواتین کے 10 میٹر ایئر پسٹل کے انفرادی فائنل میں جگہ بنائی تاہم میڈل راؤنڈ میں وہ پانچویں نمبر پر رہیں۔ سورچی اندر سنگھ اور ایشا سنگھ فائنل کے لیے کوالیفائی نہیں کر سکیں۔سافٹ ٹینس میں جے مینا نے فلپائن کے شیروِن نوگٹ کو مردوں کے سنگلز کوارٹر فائنل میں شکست دے کر سیمی فائنل میں جگہ بنالی۔ سیمی فائنل میں پہنچنے والے تمام کھلاڑیوں کا میڈل یقینی ہونے کے باعث جے مینا نے ایشین گیمز میں ہندوستان کے لیے اس کھیل کا پہلا میڈل بھی یقینی بنا دیا ہے۔
خواتین کی کبڈی میں ہندوستان نے ایران کو 37-23 سے شکست دے کر گروپ اے میں مسلسل دوسری کامیابی حاصل کی۔ ہندوستان نے اپنے پہلے میچ میں بنگلہ دیش کو شکست دی تھی۔روئنگ میں بالراج پنوَار نے ہیٹ میں تیسری پوزیشن حاصل کرکے مردوں کے سنگل اسکلز کے فائنل میں جگہ بنائی۔ ستنام سنگھ اور سلمان خان نے اپنی ہیٹ میں دوسری پوزیشن حاصل کرکے مردوں کے ڈبل اسکلز کے فائنل کے لیے کوالیفائی کیا۔
کینو اسپرنٹ میں ہندوستان کی مردوں کی کائیک فور 500 میٹر ٹیم بھی فائنل میں پہنچ گئی۔ ہرش وردھن شکَتاوت۔ وریندر سنگھ۔ ایل ناؤچا سنگھ اونم اور ارون سنگھ نے ہیٹ 1 میں تیسری پوزیشن حاصل کی۔خواتین کے کینو سنگل 200 میٹر میں میگھا پردیپ نے سیمی فائنل میں جگہ بنائی جبکہ پاروتی گیتا اور فیرمبم سونیا دیوی نے خواتین کے کائیک ڈبل 500 میٹر سیمی فائنل کے لیے کوالیفائی کیا۔
خواتین کی روئنگ میں گربانی کور۔ الینا انٹو۔ ٹینڈنتھوئی ہاوبیجام اور پونم نے ہیٹس میں مجموعی طور پر چھٹی پوزیشن حاصل کرکے فائنل اے میں جگہ بنائی۔ جسوندر سنگھ اور نتن کمار اپنی ہیٹ میں چوتھے نمبر پر رہے اور فائنل بی میں حصہ لیں گے۔سوئمنگ میں بینیڈکٹن بینیستن نے مردوں کے 100 میٹر بٹر فلائی ہیٹس میں مجموعی طور پر 13ویں پوزیشن حاصل کی۔ ساجن پرکاش ایونٹ میں شریک نہیں ہوئے۔ ویدانت مادھون اور انیش سنیل مردوں کے 200 میٹر فری اسٹائل کے ہیٹس سے آگے نہیں بڑھ سکے۔ ویدانت 19ویں جبکہ انیش 17ویں نمبر پر رہے۔
ٹیبل ٹینس کے مکسڈ ڈبلز میں بھی ہندوستانی کھلاڑیوں نے کامیابی حاصل کی۔ ہرمیت دیسائی اور یشسوِنی گھورپڑے نے مالدیپ کے محمد اسماعیل اور فاطمت علی کو شکست دی۔ جبکہ منوش شاہ اور دیا چیتلے نے سری لنکا کے چانول کولاپوواڈو اور بیماندی سوارنا کو شکست دی۔سیپک ٹاکرا کے مردوں کے ٹیم ریگو گروپ بی مقابلے میں ہندوستان نے فلپائن کو 2-1 سے شکست دی تاہم ہندوستانی ٹیم اگلے مرحلے کے لیے کوالیفائی نہیں کر سکی۔ایشین گیمز 2026 میں ہندوستان نے مختلف کھیلوں میں اپنی مہم جاری رکھتے ہوئے میڈلز اور فائنل مقابلوں میں اپنی موجودگی برقرار رکھی ہے۔
