آواز دی وائس:ایچی ناگویا میں جاری ایشین گیمز 2026 میں ہندوستانی خواتین کی کبڈی ٹیم نے اپنی کامیابی کا سلسلہ جاری رکھتے ہوئے گروپ مرحلے کے مقابلے میں ایران کو 37-23 سے شکست دے دی۔ یہ خواتین کی کبڈی میں ہندوستان کی مسلسل دوسری کامیابی ہے۔ہندوستان نے مقابلے کا آغاز قدرے سست انداز میں کیا اور پہلے ہاف میں ایران کے خلاف 9-11 سے پیچھے تھا۔ تاہم ہندوستانی کھلاڑیوں نے شاندار واپسی کرتے ہوئے کھیل کا رخ بدل دیا اور پہلے ہاف کے اختتام تک 19-15 کی برتری حاصل کرلی۔

بھاؤنا دیوی نے اہم ٹیکل کے ذریعے ٹیم کی کامیابی میں نمایاں کردار ادا کیا جبکہ پوجا نے بھی قیمتی پوائنٹس حاصل کیے۔ دوسرے ہاف میں ہندوستان نے اپنی برتری مزید مضبوط کی اور آخرکار 37-23 سے کامیابی حاصل کرلی۔ہندوستانی ٹیم نے اس سے قبل اپنے افتتاحی مقابلے میں بنگلہ دیش کو 42-21 سے شکست دی تھی۔ ہندوستانی خواتین کا اگلا مقابلہ جمعرات کو جاپان سے ہوگا۔

شوٹنگ میں کانسی کا تمغہ

ایشین گیمز کے ایکشن سے بھرپور دن میں ہندوستان نے شوٹنگ میں ایک تمغہ حاصل کیا جبکہ سافٹ ٹینس میں ایک اور تمغہ یقینی بنا لیا۔خواتین کی اسکیٹ ٹیم میں رائزا ڈھلون پریناز ڈھالیوال اور مہیشوری چوہان نے مجموعی طور پر 331 پوائنٹس کے ساتھ تیسری پوزیشن حاصل کرکے کانسی کا تمغہ جیتا۔ چین نے 346 پوائنٹس کے ساتھ طلائی اور قازقستان نے چاندی کا تمغہ حاصل کیا۔

سافٹ ٹینس میں پہلا ایشین گیمز تمغہ یقینی

سافٹ ٹینس میں جے مینا نے فلپائن کے شیروِن نوگٹ کو سنسنی خیز مینز سنگلز کوارٹر فائنل میں 4-3 سے شکست دے کر سیمی فائنل میں جگہ بنالی۔ سیمی فائنل میں پہنچنے والے تمام کھلاڑیوں کا تمغہ یقینی ہوگیا ہے۔ اس طرح جے مینا نے ہندوستان کے لیے ایشین گیمز میں سافٹ ٹینس کا پہلا تمغہ یقینی بنادیا ہے۔اولمپک میڈلسٹ منو بھاکر نے خواتین کے 10 میٹر ایئر پسٹل انفرادی فائنل میں پانچویں پوزیشن حاصل کی۔ سورچی اندر سنگھ اور ایشا سنگھ فائنل کے لیے کوالیفائی نہ کرسکیں۔

روئنگ اور کینو اسپرنٹ میں بھی پیش رفت

روئنگ میں بلراج پوار نے اپنی ہیٹ میں تیسری پوزیشن حاصل کرکے مینز سنگل اسکلز کے فائنل میں جگہ بنالی۔ ستنام سنگھ اور سلمان خان نے مینز ڈبل اسکلز کی ہیٹ میں دوسری پوزیشن حاصل کرکے فائنل میں داخلہ حاصل کیا۔کینو اسپرنٹ میں ہرش وردھن شکاتوت ورندر سنگھ ایل ناؤچا سنگھ اونام اور ارون سنگھ پر مشتمل ہندوستانی ٹیم نے مینز کائیک فور 500 میٹر کی ہیٹ 1 میں تیسری پوزیشن حاصل کرکے فائنل میں جگہ بنالی۔میگھا پردیپ نے خواتین کے کینو سنگل 200 میٹر کے سیمی فائنل میں جگہ بنائی۔ پاروتی گیتا اور پھائرے بام سونیا دیوی نے خواتین کے کائیک ڈبل 500 میٹر کے سیمی فائنل کے لیے کوالیفائی کیا۔خواتین کی فور روئنگ میں گربانی کور الینا انٹو ٹینڈنتھوئی ہاوبی جیم اور پونم نے مجموعی طور پر چھٹی پوزیشن حاصل کرکے فائنل اے میں جگہ بنالی۔ جسوندر سنگھ اور نتن کمار نے مینز پیئر ہیٹس میں چوتھی پوزیشن حاصل کی اور اب فائنل بی میں حصہ لیں گے۔

تیراکی اور ٹیبل ٹینس میں ہندوستانی کھلاڑی

تیراکی میں بینڈکٹن بینی اسٹن نے مینز 100 میٹر بٹر فلائی کی ہیٹس میں مجموعی طور پر 13ویں پوزیشن حاصل کی جبکہ ساجن پرکاش مقابلے میں شریک نہیں ہوئے۔ ویدانت مادھون اور انیش سنیل مینز 200 میٹر فری اسٹائل کے فائنل مرحلے میں جگہ نہ بنا سکے۔ ویدانت نے 19ویں جبکہ انیش نے 17ویں پوزیشن حاصل کی۔ٹیبل ٹینس کے مکسڈ ڈبلز میں ہندوستانی جوڑیوں نے کامیابیاں حاصل کیں۔ ہرمیت دیسائی اور یشسوِنی گھورپڑے نے مالدیپ کے محمد اسماعیل اور فاطمت علی کو شکست دی۔ منوش شاہ اور دیا چتلے نے سری لنکا کے چانول کولاپواواڈو اور بیماندی سورنا کو شکست دی۔سیپاک ٹاکرا میں ہندوستان نے گروپ بی کے مینز ٹیم ریگو مقابلے میں فلپائن کو 2-1 سے شکست دی۔ تاہم ہندوستانی ٹیم اگلے مرحلے کے لیے کوالیفائی نہیں کرسکی۔