روشنیوں کا تہوار دیوالی محض مٹی کے دیے جلانے، گھروں کو رنگ برنگی روشنیوں سے سجانے یا آتش بازی کرنے کا نام نہیں، بلکہ یہ اندھیرے سے اجالے، جہالت سے علم اور نفرت و تقسیم سے ہم آہنگی کی جانب سفر کی علامت بھی ہے۔ آسام میں کئی خاندان ایسے ہیں جو اپنے طرزِ زندگی سے ثابت کر رہے ہیں کہ محبت، اعتماد اور باہمی احترام کے سامنے مذہب کی دیواریں کوئی معنی نہیں رکھتیں۔ مختلف مذہبی شناخت رکھنے والے ان خاندانوں کا ایک ساتھ دیوالی منانا اس تہوار کے اس آفاقی پیغام کو نمایاں کرتا ہے، جس کی بنیاد انسانیت، محبت، میل جول اور فرقہ وارانہ ہم آہنگی پر ہے۔

آسام میں مذہبی ہم آہنگی کی ایک خوبصورت مثال معروف مائم آرٹسٹ (Mime Artist) معین الحق اور ان کی اہلیہ ڈاکٹر انجنا موئے سائکیا کا خاندان ہے۔ ڈاکٹر انجنا گوہاٹی میڈیکل کالج اینڈ اسپتال (جی ایم سی ایچ) میں ڈاکٹر ہونے کے ساتھ اوڈیسی اور ستریا رقص کی ممتاز فنکارہ بھی ہیں۔ دونوں کی ازدواجی زندگی میں مذہبی شناخت کبھی رکاوٹ نہیں بنی، بلکہ باہمی سمجھ بوجھ، احترام اور ثقافتی کشادگی نے ان کے رشتے کو مزید مضبوط کیا ہے۔

معین الحق اور ڈاکٹر انجنا: فن اور محبت کا خوبصورت امتزاج

معین الحق آسام کے معروف مائم فنکاروں میں شمار ہوتے ہیں۔ وہ 1970 کی دہائی سے اس فن سے وابستہ ہیں۔ انہوں نے 1991 میں مائم اکیڈمی قائم کی، جو شمال مشرقی ہندوستان کا پہلا ادارہ تھا، جسے خصوصی طور پر اس فن کے فروغ کے لیے قائم کیا گیا تھا۔ فن کے میدان میں ان کی غیر معمولی خدمات کے اعتراف میں انہیں 2009 میں سنگیت ناٹک اکادمی ایوارڈ سے نوازا گیا۔

ان کی اہلیہ ڈاکٹر انجنا موئے سائکیا اوڈیسی اور ستریا رقص کی ممتاز فنکارہ ہیں۔ انہوں نے معروف گرو کیلوچرن مہاپاترا سے اوڈیسی رقص کی تربیت حاصل کی۔ اس کے علاوہ ستریا رقص میں بھی مہارت حاصل کی۔ گوہاٹی میں قائم ان کا ادارہ درپن ڈانس اکیڈمی کلاسیکی رقص کی روایات کے فروغ اور تحفظ کے لیے سرگرم ہے۔

اپنے گھر میں دیوالی منانے کے بارے میں معین الحق کہتے ہیں:

’’ہم ہر سال اپنے گھر میں دیوالی مناتے ہیں۔ میرے نزدیک دیوالی کسی ایک مذہب تک محدود نہیں ہے۔ یہ روشنیوں کا تہوار ہے، جو ہمیں اندھیرے کو دور کرکے روشنی کی طرف بڑھنے کا پیغام دیتا ہے۔ اس تہوار سے کئی گہری معنویت اور اقدار وابستہ ہیں۔ اس کی اصل اہمیت جہالت سے علم کی طرف سفر میں ہے۔ دیوالی کو کسی مخصوص مذہب کے ماننے والوں تک محدود کرنا درست نہیں ہوگا۔ البتہ کوئی اسے منانا چاہتا ہے یا نہیں، یہ اس کا ذاتی فیصلہ ہے۔‘‘

اپنے خاندان کی تقریبات کا ذکر کرتے ہوئے وہ بتاتے ہیں:

’’ہر سال دیوالی کے موقع پر ہم اپنی اہلیہ کے گھر والوں اور رشتہ داروں سے ملنے جاتے ہیں۔ ان کے لیے مٹھائیاں لے کر جاتے ہیں، تہوار کی مبارک باد دیتے ہیں، ساتھ وقت گزارتے ہیں اور رات کا کھانا بھی ان کے ساتھ کھاتے ہیں۔ ہم آتش بازی بھی کرتے ہیں اور خوشی و جوش کے ساتھ اس خوبصورت رات کا لطف اٹھاتے ہیں۔‘‘

ایلس علی ہزاریکا: عید اور دیوالی دونوں سے جڑا ہے خاندان

مذہبی ہم آہنگی کی ایک اور قابلِ ذکر مثال بین الاقوامی شہرت یافتہ تیراک ایلس علی ہزاریکا ہیں۔ انہوں نے دیوالی کی مبارک باد دیتے ہوئے اس تہوار کے مثبت اور محبت بھرے پیغام کو بھی اجاگر کیا۔

گوہاٹی کے بھارلومکھ علاقے میں پیدا ہونے اور پرورش پانے والے ایلس کو بچپن ہی سے تیراکی کا شوق تھا۔ انہوں نے قومی اور بین الاقوامی سطح پر اپنی کامیابیوں کے ذریعے آسام کا نام روشن کیا۔ 2019 میں انہوں نے کیٹالینا چینل عبور کرکے اپنے کھیل کے سفر میں ایک اہم سنگ میل قائم کیا۔

ایلس کا تعلق ایسے خاندان سے ہے جہاں طویل عرصے سے مذہبی تنوع اور رواداری کو اہمیت دی جاتی رہی ہے۔ ان کے والد البان علی ہزاریکا اور والدہ دیپیکا علی ہزاریکا کی شادی بھی بین المذاہب تھی۔ اسی آزاد خیال اور کشادہ ذہن ماحول میں پرورش پانے کے سبب ایلس نے بچپن ہی سے تمام مذاہب اور ان کی روایات کا احترام کرنا سیکھا۔

بعد ازاں انہوں نے پرنامی سے شادی کی، جن کا تعلق ایک ہندو خاندان سے ہے۔ مذہبی عقائد کا فرق کبھی ان دونوں کے درمیان محبت، اعتماد اور باہمی احترام کی راہ میں حائل نہیں ہوا۔

اگرچہ ایلس ایک مسلم خاندان میں پیدا ہوئے، لیکن وہ اسلامی مذہبی روایات پر بھی عمل کرتے ہیں اور ہندو مذہب کی روایات کا بھی احترام کرتے ہیں۔ رمضان المبارک میں روزے رکھتے ہیں، نماز ادا کرتے ہیں اور ضرورت مندوں کی مدد کو اپنی مذہبی و انسانی ذمہ داری کا حصہ سمجھتے ہیں۔

اس کے ساتھ ہی وہ گوہاٹی کے تاریخی کاماکھیا مندر اور ماں بگلامکھی مندر بھی جاتے ہیں اور دیوی کا آشیرواد حاصل کرنے کے لیے پوجا کرتے ہیں۔ ان کی اہلیہ پرنامی بھی بگلامکھی مندر میں پوجا اور مذہبی رسومات میں ان کے ساتھ شریک ہوتی ہیں۔

ہزاریکا خاندان میں عید اور دیوالی دونوں تہوار یکساں گرم جوشی اور خوشی کے ساتھ منائے جاتے ہیں۔ عید کے موقع پر خاندان کے افراد جمع ہوتے ہیں اور رمضان میں افطار کی محفلیں سجتی ہیں۔ اسی طرح دیوالی آتے ہی ان کا گھر روشنیوں اور خوشیوں سے جگمگا اٹھتا ہے۔ مختلف مذہبی روایات کا یہ حسین امتزاج اس خاندان کو فرقہ وارانہ ہم آہنگی اور ثقافتی یکجہتی کی ایک خوبصورت مثال بناتا ہے۔

دیوالی کی مبارک باد دیتے ہوئے ایلس علی ہزاریکا کہتے ہیں:

’’میں سبھی کو بہت خاص اور خوشیوں بھری دیوالی کی مبارک باد دیتا ہوں۔ مجھے ہمیشہ سے یہ تہوار بہت پسند رہا ہے۔ جب بھی دیوالی آتی ہے، اپنے ساتھ ایک الگ طرح کی خوشی اور مثبت پیغام لے کر آتی ہے۔ ہر گھر خوبصورت روشنیوں سے جگمگا اٹھتا ہے اور پورا ماحول ایک خاص احساس سے بھر جاتا ہے۔‘‘

ان کے مطابق دیوالی کی سب سے خوبصورت بات یہ ہے کہ یہ خاندانوں کو ایک دوسرے کے قریب لاتی ہے۔ والدین، دادا دادی، نانا نانی، بچوں، رشتہ داروں اور دوستوں کو ایک چھت کے نیچے جمع ہونے کا موقع ملتا ہے۔ یہ تہوار اپنے عزیزوں سے دوبارہ جڑنے اور مل بیٹھ کر خوشیاں بانٹنے کا ذریعہ بنتا ہے۔ایلس امید ظاہر کرتے ہیں کہ ہندوستان ہی نہیں، دنیا کے مختلف حصوں میں منائی جانے والی دیوالی ہر شخص کی زندگی میں خوشی، امن، صحت اور خوش حالی لے کر آئے۔ ساتھ ہی انہوں نے آتش بازی کے دوران احتیاط اور ذمہ داری کا مظاہرہ کرنے کی اپیل بھی کی۔ ان کا کہنا ہے کہ اپنی صحت کے ساتھ دوسروں کی سلامتی کا خیال رکھنا بھی ضروری ہے۔

استاد امجد علی خان اور شبھ لکشمی: موسیقی اور رقص نے جوڑا دو ثقافتوں کو

آسام سے گہرا تعلق رکھنے والی ایک اور ممتاز شخصیت عالمی شہرت یافتہ سرود نواز استاد امجد علی خان ہیں۔ ان کی اہلیہ شبھ لکشمی بروا خان کا تعلق آسام کے معروف بروا خاندان سے ہے اور وہ بھرت ناٹیم کی ماہر فنکارہ ہیں۔

شبھ لکشمی نے چنئی کے کلکشیتر ادارے میں تقریباً 15 سال تک معروف رقاصہ رُکمنی دیوی ارونڈیل کی نگرانی میں رقص کی سخت تربیت حاصل کی۔ دوسری جانب استاد امجد علی خان ہندوستانی کلاسیکی موسیقی کی ممتاز شخصیات میں شمار ہوتے ہیں۔ موسیقی کے میدان میں ان کی غیر معمولی خدمات کے اعتراف میں انہیں پدم شری، پدم بھوشن اور پدم وبھوشن جیسے اعلیٰ شہری اعزازات سے نوازا جاچکا ہے۔

مختلف مذہبی پس منظر سے تعلق رکھنے کے باوجود مذہب کبھی ان کی ازدواجی زندگی میں رکاوٹ نہیں بنا۔ موسیقی اور رقص سے مشترکہ دلچسپی نے دونوں کو قریب لانے میں اہم کردار ادا کیا۔ ان کا رشتہ محبت، احترام اور ثقافتی ہم آہنگی پر قائم ہے۔

استاد امجد علی خان جہاں عید مناتے ہیں، وہیں اپنے خاندان کے ساتھ دیوالی بھی خوشی اور محبت کے ماحول میں مناتے ہیں۔

اس سال کی دیوالی کی تیاریوں کے بارے میں شبھ لکشمی بروا خان نے بتایا کہ اگرچہ ان کی طبیعت کچھ عرصے سے ناساز ہے، لیکن اس کے باوجود ان کے گھر میں ہر سال کی طرح اس مرتبہ بھی دیوالی اسی جوش و خروش سے منائی جائے گی۔

ان کے مطابق تہوار زندگی میں ایک خاص خوشی لے کر آتے ہیں، کیونکہ یہ خاندان کے افراد کو ایک ساتھ وقت گزارنے اور خوبصورت یادیں بنانے کا موقع فراہم کرتے ہیں۔

استاد امجد علی خان اور شبھ لکشمی بروا خان کی ازدواجی زندگی ہندوستانی معاشرے میں مذہبی ہم آہنگی کی ایک اہم مثال ہے۔ یہ جوڑا کئی مواقع پر مذہبی اختلافات سے بالاتر ہوکر انسانیت، محبت اور باہمی احترام کی اہمیت پر زور دیتا رہا ہے۔ ان کی زندگی اس تصور کی عکاس ہے کہ شادی محض دو افراد کا نہیں بلکہ دو خاندانوں، دو ثقافتوں اور دو روایات کا ملاپ بھی ہوتی ہے۔

شہناز اور راہل: اپنے گھر میں پہلی دیوالی 

گوہاٹی میڈیکل کالج میں فزیوتھراپسٹ شہناز اور ان کے شوہر راہل کے لیے اس سال کی دیوالی خاص اہمیت رکھتی ہے۔

راہل کا تعلق ہندو خاندان سے ہے، جبکہ شہناز مسلم خاندان سے تعلق رکھتی ہیں۔ دونوں نے گزشتہ سال شادی کی تھی۔ اگرچہ ابتدا میں ان کی شادی کو دونوں خاندانوں کی جانب سے کچھ اختلافات کا سامنا کرنا پڑا، لیکن وقت گزرنے کے ساتھ یہ دوریاں کم ہوتی گئیں اور خاندانوں کے درمیان قربت بڑھنے لگی۔

اپنے منصوبوں کے بارے میں اس جوڑے نے بتایا:

’’ہم دونوں کی پیشہ ورانہ مصروفیات بہت زیادہ رہتی ہیں۔ ایسے میں اس سال کی دیوالی ہمارے لیے ایک خاص وقفے کی طرح ہے۔ پہلی مرتبہ ہم اپنے گھر میں ایک ساتھ یہ تہوار منائیں گے۔ ہم اپنے رشتہ داروں اور قریبی دوستوں کو مدعو کرنے اور روشنیوں کے اس تہوار کو پورے جوش و خروش کے ساتھ منانے کا ارادہ رکھتے ہیں۔‘‘

اس نوجوان جوڑے کے لیے یہ موقع صرف اپنے گھر میں پہلی دیوالی منانے کا نہیں، بلکہ اپنے عزیزوں کو قریب لانے اور ماضی کے اختلافات کو پیچھے چھوڑ کر ایک نئی زندگی کا آغاز کرنے کی خوش گوار کوشش بھی ہے۔

آفسانہ بیگم: شوہر کی یادوں اور خاندانی روایت کے ساتھ دیوالی

اسی طرح آفسانہ بیگم اور ان کے مرحوم شوہر سیلندر کنور دتا کے خاندان میں بھی دیوالی کو خاص اہمیت حاصل ہے۔ آفسانہ پہلے گوہاٹی کے مچ کھوا علاقے میں رہتی تھیں اور بچپن ہی سے دیوالی مناتی آرہی ہیں۔ تاہم ایک ہندو خاندان میں شادی کے بعد اس تہوار سے ان کی وابستگی مزید گہری ہوگئی۔

اپنے تجربات یاد کرتے ہوئے آفسانہ کہتی ہیں:

’’میں بچپن ہی سے دیوالی مناتی آرہی ہوں۔ شادی کے بعد جب میں ایک ہندو خاندان کی بہو بنی تو اس تہوار کو پہلے سے زیادہ جوش اور خوشی کے ساتھ منانے لگی۔‘‘

اپنے مرحوم شوہر کو یاد کرتے ہوئے وہ مزید کہتی ہیں:

’’میرے شوہر کو بھی دیوالی منانا بہت پسند تھا۔ اگرچہ اب وہ ہمارے درمیان نہیں ہیں، لیکن اس سال بھی ہم اسی خوشی اور جوش کے ساتھ یہ تہوار منائیں گے۔ ہم ان کی یادوں اور خاندانی روایات کو زندہ رکھنا چاہتے ہیں۔‘‘

وہ اس موقع پر اپنی دلی خواہش کا اظہار کرتے ہوئے کہتی ہیں:

’’میری امید ہے کہ یہ تہوار ہمارے اندر اور ہمارے ارد گرد موجود تمام برائیوں کو ختم کرے اور ہماری زندگیوں کو روشنی، علم اور مثبت سوچ سے بھر دے۔‘‘

آفسانہ اور ان کے خاندان کے لیے دیوالی اب محض سالانہ تہوار نہیں، بلکہ اپنے عزیز کی یادوں کو تازہ کرنے، خاندانی روایات کو برقرار رکھنے اور محبت و اپنائیت کے ان رشتوں کو آگے بڑھانے کا موقع بھی ہے، جنہوں نے مذہبی اختلافات کے باوجود خاندان کو ایک دوسرے سے جوڑے رکھا ہے۔

دیوالی کا اصل پیغام: دلوں سے دور ہوں نفرت اور تعصب کے اندھیرے

بلاشبہ دیوالی کی روشنی کا مقصد صرف گھروں اور گلیوں کو روشن کرنا نہیں ہے، بلکہ یہ انسانی دلوں سے اندھیرے، تنگ نظری اور تقسیم کے خاتمے کی علامت بھی ہے۔ اس کا پیغام باہمی اعتماد، سمجھ بوجھ اور محبت کو فروغ دینا ہے۔

مذاہب مختلف ہوسکتے ہیں، عبادت کے طریقے الگ ہوسکتے ہیں، لیکن خوشی، غم، محبت اور رشتوں کے بنیادی انسانی جذبات سب میں یکساں ہوتے ہیں۔شاید دیوالی کی اصل روح بھی اسی سادہ مگر گہرے پیغام میں پوشیدہ ہے کہ یہ تہوار صرف اپنے گھروں کو روشن کرنے کا نہیں، بلکہ دوسروں کی زندگیوں میں بھی روشنی، امید اور خوشیاں بکھیرنے کا نام ہے۔