احسان فضیلی | سری نگر

کشمیر کی وادی خانقاہوں اور درگاہوں کے ساتھ ساتھ مساجد کے لیے بھی جانی جاتی ہے جہاں مذہبی اجتماعات روحانی تربیت اور اصلاحی سرگرمیوں کا سلسلہ صوفی روایات کے تحت جاری رہا ہے۔ گزشتہ تقریباً ساڑھے چھ سو برس کے دوران ان اداروں نے مختلف صورتیں اختیار کی ہیں۔ کشمیر میں خانقاہی نظام کی بنیاد وسطی ایشیا سے آنے والی تصوف کی روایت سے جڑی ہوئی ہے۔ یہاں خانقاہ کا آغاز چودہویں صدی کے اواخر میں ہوا۔ 1395 میں سلطان سکندر نے فارسی صوفی بزرگ میر سید علی ہمدانی کی یاد میں خانقاہ معلیٰ تعمیر کرائی جسے شاہ ہمدان مسجد اور خانقاہ کے نام سے بھی جانا جاتا ہے۔ میر سید علی ہمدانی کو کشمیر میں اسلام کی اشاعت کے حوالے سے خاص عقیدت و احترام حاصل ہے۔معروف مصنف اور مؤرخ پروفیسر فاروق فیاض بٹ نے بتایا کہ خانقاہ تصوف میں فارسی الاصل ادارہ تھا جو صوفی مشائخ اور ان کے مریدوں کے لیے رہائش گاہ کے ساتھ ساتھ روحانی اور سماجی مرکز کا کردار ادا کرتا تھا۔ صدیوں کے دوران یہ ادارہ چھوٹی اور سادہ رہائش گاہوں سے ترقی کرتے ہوئے وسیع مراکز میں تبدیل ہوا جنہیں مختلف علاقوں میں الگ الگ ناموں سے پکارا گیا۔ شمالی افریقہ میں انہیں زاویہ ترکی میں تکیہ اور جنوبی ایشیا میں جماعت خانہ کہا گیا۔

صاحتیہ اکیڈمی ایوارڈ یافتہ پروفیسر فاروق فیاض بٹ نے جنہوں نے کشمیری اور انگریزی میں کئی کتابیں تصنیف کی ہیں۔ آواز دی وائس سے گفتگو میں کہا کہ کشمیر میں خانقاہی ادارے وقت گزرنے کے ساتھ اپنی سابقہ شان و شوکت کھو بیٹھے اور اب ان میں سے کئی زیارت گاہوں کی حیثیت اختیار کرچکے ہیں۔ ان کے مطابق ان مراکز کے گرد بازار بھی قائم ہوگئے ہیں اور درگاہوں اور مساجد کے اطراف میں یہ تجارتی سرگرمیاں روزگار کے مواقع پیدا کرنے کے ساتھ سماجی مساوات اور مختلف مذاہب سے تعلق رکھنے والے لوگوں کے باہمی میل جول کا ذریعہ بنی ہیں جس سے سماجی یکجہتی کو فروغ ملا ہے۔انہوں نے کہا کہ خانقاہیں اپنی مذہبی تقدس کے ساتھ ساتھ اپنے تعمیراتی حسن کے باعث بھی نمایاں ہیں۔ ان عمارتوں میں منفرد طرز تعمیر دکھائی دیتا ہے جس پر بدھ مت کے فن تعمیر کے اثرات بھی نظر آتے ہیں۔ وقت کے ساتھ یہ مقامات تجارتی مراکز میں تبدیل ہوئے تاہم انہوں نے معاشرے کی مشترکہ ثقافتی روایات کو برقرار رکھا ہے۔ خاص طور پر سالانہ عرس کے مواقع پر یہاں بڑی تعداد میں لوگ جمع ہوتے ہیں۔پروفیسر فاروق فیاض نے خانقاہ کے آغاز اور ابتدائی ارتقا پر روشنی ڈالتے ہوئے بتایا کہ اس تصور نے وسطی ایشیا کے خطے خراسان میں نویں اور دسویں صدی کے دوران جنم لیا۔ اس وقت یہ مقامات متقی صوفیوں اور زاہدوں کے لیے مخصوص ہوتے تھے۔ ابتدائی خانقاہیں عموماً چھوٹی اور سادہ رہائش گاہیں تھیں جنہیں دویرہ یا رباط کہا جاتا تھا اور جہاں صوفی بزرگ خلوت میں زندگی گزارتے تھے۔ خانقاہوں کو منظم اجتماعی زندگی کے مراکز میں تبدیل کرنے کا سہرا ابو سعید بن ابی الخیر جیسے صوفی مشائخ کے سر جاتا ہے جن کا انتقال 1049 میں ہوا۔ان کے مطابق خانقاہی نظام نے سخت روحانی نظم و ضبط کو رواج دیا جس میں نماز کی پابندی روزے اور اجتماعی ذکر شامل تھے۔ یہ طریقہ تصوف کی ابتدائی روایات سے مختلف تھا۔

پروفیسر فاروق فیاض نے مزید بتایا کہ بارہویں صدی تک حکمرانوں نے خانقاہوں کی سیاسی اور مذہبی اہمیت کو تسلیم کرلیا تھا اور انہیں مالی امداد عطیات اور تعمیراتی تعاون فراہم کیا جانے لگا۔ صلاح الدین ایوبی نے بھی اس سلسلے میں اہم کردار ادا کیا اور 1173 میں مصر میں خانقاہ الصالحیہ سمیت کئی خانقاہیں قائم کیں جن کا مقصد فاطمی اثرات کے مقابلے میں سنی مذہبی روایت کو فروغ دینا تھا۔انہوں نے تاریخی حوالوں سے بتایا کہ خانقاہیں رفتہ رفتہ اسلامی دنیا کے مختلف حصوں میں پھیلتی گئیں اور اسپین سے لے کر ہند تک صوفی سلسلوں کے فروغ کا ذریعہ بنیں۔ یہ ادارے صرف روحانی ریاضت کے مراکز نہیں تھے بلکہ تعلیم کے مراکز بھی تھے۔ یہاں مسافروں کے لیے قیام کا انتظام کیا جاتا تھا اور غریبوں کے لیے پناہ گاہ کا کام بھی لیا جاتا تھا۔جنوبی ایشیا میں تیرہویں اور چودہویں صدی کے دوران خانقاہوں کے سماجی اور ثقافتی کردار کا ذکر کرتے ہوئے پروفیسر فاروق فیاض نے کہا کہ دہلی سلطنت کے دور میں یہ مراکز برصغیر میں اسلام کے پھیلاؤ کے اہم ذرائع بن گئے۔ خاص طور پر چشتی اور سہروردی سلسلوں سے وابستہ صوفی بزرگوں نے عوام سے رابطے کے لیے خانقاہوں کو مرکز بنایا۔

جنوبی ایشیا میں خانقاہ سماجی مساوات کی علامت بن گئی جہاں مختلف پس منظر ذاتوں اور مذاہب سے تعلق رکھنے والے لوگوں کو کھانا فراہم کیا جاتا اور ان کی مدد کی جاتی تھی۔ اجتماعی باورچی خانے کے ذریعے سب کے لیے کھانے کا انتظام کیا جاتا تھا۔ ان مراکز نے موسیقی اور فنون کو بھی فروغ دیا۔ خاص طور پر چشتی سلسلے میں قوالی کو روحانی موسیقی کے طور پر اہم مقام حاصل ہوا۔ خانقاہیں روحانی رہنمائی کے مراکز بھی تھیں۔پروفیسر فاروق فیاض نے کہا کہ اگرچہ بہت سے صوفی بزرگ دربار سے دور رہنے کو ترجیح دیتے تھے تاہم خانقاہیں سیاسی فکر کی تشکیل میں اپنا اثر رکھتی تھیں اور خاص طور پر مغلیہ دور میں حکمرانوں کو مذہبی جواز فراہم کرنے میں بھی ان کا کردار رہا۔انہوں نے بتایا کہ خانقاہوں کا بنیادی مقصد روحانی تربیت تھا جہاں مشائخ اپنے مریدوں کی باطنی اصلاح اور اللہ کی یاد کی تربیت کرتے تھے۔ خانقاہ کے مکین ایک ساتھ رہتے تھے اور کھانے پینے اور روزمرہ ذمہ داریوں میں شریک ہوتے تھے۔ مسافروں درویشوں اور غریبوں کے لیے کھانے اور رہائش کا انتظام کیا جاتا تھا۔ صدقات اور سماجی خدمت کے ذریعے مقامی آبادی کی بلا امتیاز مدد کی جاتی تھی۔

پروفیسر فاروق فیاض کے مطابق بہت سے صوفی بزرگوں کی وفات کے بعد انہیں ان کی خانقاہوں ہی میں دفن کیا گیا اور وقت کے ساتھ ان مقامات نے درگاہوں کی شکل اختیار کرلی جہاں زائرین آنے لگے۔اٹھارہویں صدی سے جدید دور میں داخل ہونے کے بعد بہت سی روایتی خانقاہیں رفتہ رفتہ درگاہوں میں تبدیل ہوگئیں یا ان کا کردار درگاہوں کے مقابلے میں محدود ہوگیا۔ ان مقامات پر رسمی روحانی تربیت کے بجائے زیارت اور شفا یابی پر زیادہ توجہ دی جانے لگی۔ قومی ریاستوں کے ظہور اور روایتی مالی وسائل اور اوقاف کے نظام میں تبدیلی نے بھی خانقاہوں کے کردار کو متاثر کیا۔ تاہم پروفیسر فاروق فیاض کے مطابق آج بھی بہت سی خانقاہیں روحانی تعلیم سماجی روابط اور صوفی روایات کی ترویج کے مراکز کے طور پر کام کررہی ہیں۔

کشمیر کے حوالے سے پروفیسر فاروق فیاض نے بتایا کہ ہر صوفی سلسلے کا اپنا خانقاہی نظام تھا تاہم زیادہ تر خانقاہیں کبرویہ سلسلے سے وابستہ تھیں۔ انہوں نے اس دور کی تقریباً ایک درجن نمایاں خانقاہوں کا ذکر کیا جن میں سری نگر کی خانقاہ بلبل شاہ۔ کولگام کی خانقاہ سید حسین سمنانی۔ سری نگر کی خانقاہ معلیٰ۔ پلوامہ کے مونگہامہ کی خانقاہ امیریہ۔ ترال پلوامہ کی خانقاہ فیض پناہ۔ خانقاہ بابا اسماعیل۔ سری نگر کی خانقاہ ملک احمد یتو۔ سری نگر کی خانقاہ شمس کبروی۔ سری نگر کی خانقاہ چک۔ سری نگر کی خانقاہ زڈی بل۔ سری نگر کی خانقاہ سید احمد کرمانی اور دیگر شامل ہیں۔انہوں نے بتایا کہ ایران اور وسطی ایشیا کے دیگر علاقوں کی طرح کشمیر میں بھی خانقاہوں کو ریاستی سطح پر مالی معاونت حاصل تھی۔ ان کے مطابق کشمیر کے تقریباً ہر مسلم خاندان کا کسی نہ کسی صوفی سلسلے اور اس کے پیر اور خانقاہ سے تعلق رہا ہے۔ اسی وابستگی کے ذریعے خانقاہوں کے اخراجات کا ایک حصہ پورا ہوتا تھا۔یوں خانقاہ نے نماز کے ساتھ ذکر کی محافل کو فروغ دینے کے علاوہ مسلم شہروں اور قصبوں کی زندگی میں بھی ایک اہم مقام حاصل کرلیا۔ جمعہ کی مساجد کے ساتھ خانقاہیں بھی شہری اور سماجی زندگی کا نمایاں حصہ بن گئیں اور یہ صوفی روایت کی ایک اہم میراث ثابت ہوئیں۔