اونیکا مہیشوری / نئی دہلی

’’میں اپنے خاندان کا پہلا بچہ تھا جو اسکول گیا۔ میرے والد کسان ہیں۔ اپنے تجربے کی وجہ سے میں نے طے کیا کہ کوئی بھی بچہ تعلیم سے محروم نہیں رہنا چاہیے۔‘‘ یہ کہنا ہے کشمیر میں سماجی خدمت انجام دینے والے کفایت اللہ ملک کا جنہیں 2021-22 میں قومی سماجی خدمت کے لیے باوقار صدارتی ایوارڈ سے نوازا گیا تھا۔بانڈی پورہ کے ایک چھوٹے سے گاؤں سے تعلق رکھنے والے 25 سالہ کفایت اللہ ملک آج کسی تعارف کے محتاج نہیں ہیں۔ وہ ایک وقف سماجی کارکن اور کوہ پیما ہیں جو تعلیم اور نوجوانوں کو بااختیار بنا کر معاشرے میں تبدیلی لانے کے لیے پوری طرح پرعزم ہیں۔ ’’آواز دی وائس‘‘ سے گفتگو میں وہ کہتے ہیں کہ ان کا کام پہاڑی علاقوں میں رہنے والے بچوں کو اسکول جانے کی ترغیب دینا ہے۔ وہ انہیں کھیلوں میں شامل ہونے کے لیے بھی حوصلہ دیتے ہیں کیونکہ ان کا بنیادی مقصد محروم بچوں کی زندگی بہتر بنانا ہے۔

مشکلات سے بھری ابتدائی راہ اور تعلیم کا سفر

کفایت اللہ نے بوائز مڈل اسکول لوے پورہ سے اپنی ابتدائی تعلیم مکمل کی اور بعد میں سری نگر کے امر سنگھ کالج سے عمرانیات اور سیاسیات میں بیچلر کی ڈگری حاصل کی۔ اس کے بعد انہوں نے کشمیر یونیورسٹی سے سماجی خدمت میں ماسٹرز کی ڈگری مکمل کی۔ اپنے طالب علمی کے دنوں کو یاد کرتے ہوئے وہ بتاتے ہیں کہ وہ ہمیشہ ٹیم کی سرگرمیوں میں فعال طور پر شامل رہتے تھے۔ انہوں نے بہت قریب سے دیکھا تھا کہ ان کے بیشتر ہم جماعتوں نے مالی مشکلات یا گھریلو مجبوریوں کے باعث اسکول چھوڑ دیا تھا۔ انہی تجربات نے ان کے اندر معاشرے کے لیے کچھ کرنے کی بنیاد رکھی۔کالج کے دنوں میں انہوں نے اسکول چھوڑنے والے طلبہ کو دوبارہ تعلیمی دھارے میں لانے کے لیے ہم خیال نوجوانوں کا ایک مضبوط گروپ تیار کیا۔ لوگوں سے مالی تعاون جمع کرکے اپنے اس مشن کو آگے بڑھاتے ہوئے کفایت اللہ نے کبھی پیچھے مڑ کر نہیں دیکھا۔ چونکہ وہ بانڈی پورہ کے پہلے پیشہ ور کوہ پیما ہیں اس لیے انہوں نے طلبہ کو پہاڑی مہمات پر لے جاکر ان کی رہنمائی کی اور انہیں تعلیم حاصل کرنے کی ترغیب دی۔ ابتدا میں وہ اپنے دوستوں سے پرانی کتابیں جمع کرکے ان بچوں میں تقسیم کرتے تھے جو انہیں خریدنے کی استطاعت نہیں رکھتے تھے۔

دور دراز علاقوں میں تعلیم کی شمع روشن کرنا سردیوں کے دوران اجتماعی تعلیمی مراکز

اپنی حالیہ سرگرمیوں کی پیش رفت کے بارے میں کفایت اللہ بتاتے ہیں کہ حالیہ اقدامات میں سب سے پہلے عید کے کھانے کے سامان کی تقسیم شامل ہے جس کے تحت انہوں نے کشمیر کے چھ اضلاع میں 205 خاندانوں کو عید کے لیے کھانے کے سامان کی کٹس تقسیم کیں۔ اسی طرح ایک بڑا اقدام سردیوں کے دوران اجتماعی تعلیمی مراکز کا قیام تھا۔ یہ مراکز انہوں نے ایسے تین علاقوں میں قائم کیے جو سردیوں میں مکمل طور پر باقی علاقوں سے کٹ جاتے ہیں اور جہاں بچوں نے اس سے پہلے کبھی سردیوں کے موسم میں باقاعدہ اضافی تعلیم حاصل نہیں کی تھی۔انہوں نے مزید بتایا کہ یہ تعلیمی خلا طویل مدت میں بچوں کے اسکول چھوڑنے کی ایک بڑی وجہ بن جاتا تھا کیونکہ 3 سے 4 ماہ تک تعلیم سے مکمل طور پر دور رہنے کے باعث بچے اسکول چھوڑ دیتے تھے۔ اس مسئلے سے نمٹنے کے لیے انہوں نے مکمل طور پر رضاکارانہ بنیاد پر چھانداجی کیتسن اور ریشواری میں تین اضافی تعلیمی اور سردیوں کے اجتماعی تعلیمی مراکز قائم کیے جن کے ذریعے سردیوں کے دوران 400 بچوں کی تعلیم مسلسل جاری رکھی گئی۔ مقامی اعلیٰ تعلیم یافتہ نوجوانوں کو رضاکار کے طور پر شامل کیا گیا اور ’’سنڈے فار سوسائٹی‘‘ کے تحت مختلف تعلیمی اداروں کے نجی اساتذہ کو ساتھ جوڑ کر بچوں کی ابلاغی صلاحیتوں قیادت کی صلاحیتوں باہمی تعلقات اور شخصیت سازی کی صلاحیتوں کو نکھارا گیا۔

اسٹیشنری کی تقسیم سے شادی میں مدد اور ہنر مندی کی تربیت تک

پہاڑی اور قبائلی برادریوں کے درمیان سردیوں میں روزگار کے ذرائع نہ ہونے کی وجہ سے کئی خاندانوں کے لیے بچوں کے تعلیمی سامان کا خرچ اٹھانا مشکل ہوجاتا ہے جس سے تنگ آکر وہ اپنے بچوں کی تعلیم چھڑوا دیتے ہیں۔ اس خلا کو پُر کرنے کے لیے کفایت اللہ کی ٹیم اب تک 540 سے زیادہ ضرورت مند بچوں تک تعلیمی سامان پہنچا چکی ہے۔ اس کے ساتھ ہی انہوں نے شادی میں مدد کے بعض معاملات کے لیے رقم جمع کرکے تعاون کیا اور طب یا نرسنگ کے کورس کرنے والے ذہین بچوں کی فیس ادا کرکے ان کی اعلیٰ تعلیم کی راہ بھی ہموار کی۔دیہی خواتین اور خواتین کاروباری افراد کے لیے انہوں نے ہنر مندی کی تربیت کے مواقع فراہم کیے۔ دور دراز قبائلی علاقوں کی خواتین کاروباری افراد کی تیار کردہ مصنوعات کی تشہیر اور فروغ وہ اپنے سماجی رابطوں کے پلیٹ فارم کے ذریعے کرتے ہیں تاکہ دوسری لڑکیاں بھی ان سے متاثر ہوکر اپنے پیروں پر کھڑی ہوسکیں۔

بیداری کیمپ اور ہمہ جہت سماجی خدمت

کفایت اللہ نے اپنی ٹیم کے ساتھ مل کر کیتسن ڈاکھی ڈنگرنار اور چنچار جیسے دور دراز علاقوں میں بڑے پیمانے پر بیداری کے کیمپ بھی لگائے ہیں۔ ان مہمات کے ذریعے انہوں نے خواتین سے متعلق مسائل پر گفتگو کی انہیں سرکاری اسکیموں سے آگاہ کیا ماحول کے تحفظ کا پیغام دیا اور نوجوانوں کو منشیات کے غلط استعمال کے خلاف خبردار کیا۔ ان کی یہ مہم آج ماحول کے تحفظ تعلیم منشیات سے نجات سیاحت کے فروغ اور انسانی امداد سمیت مختلف شعبوں تک پھیل چکی ہے۔ اس وقت وہ ریاچا یعنی ہارٹیکلچر اور زرعی جنگلات کے تحفظ کے لیے تحقیقی و توسیعی انجمن کے اسمارٹ پور منصوبے کے ساتھ ضلعی رابطہ کار کے طور پر بھی کام کررہے ہیں جس کے ذریعے وہ کشمیر کے دور دراز علاقوں میں ڈیجیٹل فرق کو کم کرنے کا قابل تعریف کام کررہے ہیں۔

اعزازات اور بلند حوصلے

کفایت اللہ ملک کی انتھک کوششوں اور سماجی خدمت سے ان کی وابستگی کو قومی سطح پر اس وقت شناخت ملی جب ملک کی صدر دروپدی مرمو نے انہیں باوقار صدارتی ایوارڈ سے نوازا۔ اس کے علاوہ انہیں جموں و کشمیر کے سماجی جنگلات کے محکمہ کی جانب سے ’’بہترین جنگلات دوست ایوارڈ‘‘ ’’انسانیت کے سفیر ایوارڈ 2024‘‘ بھی مل چکا ہے جو پورے ہندستان میں مختلف 10 شعبوں سے تعلق رکھنے والے 10 افراد کو دیا جاتا ہے۔ انہیں سماجی خدمت کے لیے سال 2024 کا ایوارڈ ’’عالمی انسانی حقوق ایوارڈ‘‘ اور ’’اے ڈی جی کا تعریفی ایوارڈ 2019‘‘ سمیت کئی دیگر باوقار اعزازات بھی حاصل ہوچکے ہیں۔کفایت اللہ پُراعتماد انداز میں کہتے ہیں کہ ’’جب آپ کی نیت صاف ہوتی ہے تو ہر کوئی آپ کی مدد کرتا ہے۔‘‘ وہ مزید کہتے ہیں کہ وہ اسکول چھوڑنے والے بچوں کے مسائل کو سمجھنا اور ان کا حل تلاش کرنا چاہتے ہیں۔ ہماری ٹیم کے تمام ارکان بہت جوش و جذبے سے بھرپور ہیں۔ ان کا ماننا ہے کہ نوجوان ہی کسی بھی ملک کا مستقبل ہوتے ہیں اور جب وہ اپنی سوچ بدلیں گے اور اپنی زندگی کو بہتر بنائیں گے تب ہی حقیقی تبدیلی آسکتی ہے۔