فرحان اسرائیلی / جے پور
راجستھان کے شہر جے پور سے تعلق رکھنے والے 27 سالہ معین خان کی کہانی خود کو نئے انداز میں پیش کرنے۔ مستقل مزاجی اور زندگی کے مقصد میں تبدیلی کی ایک دلچسپ مثال ہے۔ سوشل میڈیا پر ان کی شناخت ایک دن میں قائم نہیں ہوئی بلکہ اس کے پیچھے برسوں کی محنت۔ خاندانی جدوجہد۔ تفریح اور اپنے ناظرین سے جڑنے کے انداز میں ایک بڑی تبدیلی شامل ہے۔دوستوں کے درمیان ہونے والے عام مذاق سے شروع ہونے والا یہ سفر رفتہ رفتہ ایک پیشے میں تبدیل ہوگیا۔ معین نے پرینک ویڈیوز اور سماجی تجربات پر مبنی ویڈیوز بنانا شروع کیں اور مزاح کے ذریعے لاکھوں لوگوں کی توجہ حاصل کی۔ لیکن ایک وقت ایسا آیا جب انہوں نے اپنے مواد کا رخ بالکل بدلنے کا فیصلہ کیا۔ آج وہ اسلامی تعلیمات۔ نبی کریم حضرت محمد ﷺ کی سیرت اور اسلامی تاریخ سے متعلق ویڈیوز بناتے ہیں۔
سوشل میڈیا پر ’معین جے پور ٹی وی‘ کے نام سے معروف معین نے مختلف ڈیجیٹل پلیٹ فارمز پر مجموعی طور پر 17.7 لاکھ سے زیادہ فالوورز اور سبسکرائبرز حاصل کرلیے ہیں۔جے پور کے کھو ناگوریان علاقے میں رہنے والے معین نے اپنے سفر کا آغاز کسی بڑے کاروباری منصوبے کے ساتھ نہیں کیا تھا۔ کالج کے زمانے میں دوستوں کے ساتھ ہنسی مذاق کرنے کی ان کی عادت رفتہ رفتہ کیمرے کے سامنے آنے لگی۔
بارہویں جماعت کی تعلیم مکمل کرنے کے بعد انہوں نے گریجویشن کیا اور پھر صحافت میں ماسٹرز کی ڈگری حاصل کی جو انہوں نے 2022 میں مکمل کی۔ تاہم سوشل میڈیا سے ان کی دلچسپی کالج کے زمانے ہی میں پیدا ہوچکی تھی۔ان کے دوستوں نے انہیں عام لوگوں کے ساتھ پرینک ویڈیوز بنانے کا مشورہ دیا۔ خوش مزاج طبیعت اور مزاح میں دلچسپی رکھنے والے معین کو یہ خیال پسند آیا۔ وہ غیر ملکی یوٹیوب چینل ’ریبل ٹی وی‘ کی پرینک ویڈیوز باقاعدگی سے دیکھا کرتے تھے۔ اسی سے متاثر ہوکر انہوں نے اپنا چینل شروع کرنے کا فیصلہ کیا۔وہ اپنے چینل کا نام ایسا رکھنا چاہتے تھے جس سے جے پور کے ساتھ ان کا تعلق ظاہر ہو۔ ابتدا میں انہوں نے اس کا نام ’جے پور پرینک ٹی وی‘ رکھا۔ کام میں وسعت آنے کے بعد انہوں نے اسے مختصر کرکے ’جے پور ٹی وی‘ کردیا۔ 2017 میں انہوں نے اسی نام سے ایک ڈومین بھی رجسٹر کرایا۔

کالج کے تجربات سے وائرل کامیابی تک
ابتدا میں ناظرین کی بڑی تعداد حاصل کرنا آسان نہیں تھا۔ معین مسلسل نئی ویڈیوز بناتے رہے اور کئی مرتبہ خاصی محنت کے باوجود انہیں وہ ویوز نہیں ملتے تھے جن کی وہ توقع رکھتے تھے۔تاہم 2018 میں حالات بدل گئے۔ ایک دوسرے مواد تخلیق کار کے ساتھ مل کر بنائی گئی ان کی سماجی تجربے پر مبنی ویڈیو وائرل ہوگئی۔ صرف 4 سے 5 منٹ کی اس ویڈیو کو تقریباً راتوں رات 12 لاکھ سے زیادہ ویوز ملے۔ اس کامیابی نے ان کے ڈیجیٹل سفر کو نئی رفتار دی۔
اس دوران انہوں نے ہندو مسلم بھائی چارے اور سماجی ہم آہنگی کو فروغ دینے والی ویڈیوز بھی بنائیں۔ رکشا بندھن جیسے تہواروں کے موقع پر تیار کی گئی ویڈیوز کو ناظرین کی جانب سے مثبت ردعمل ملا۔مزاحیہ ویڈیوز نے انہیں خاصی شہرت دلائی۔ ان کی ابتدائی ویڈیوز میں سے ایک کو 5 کروڑ سے زیادہ بار دیکھا گیا۔ 2017 کے اوائل میں ایک لاکھ سبسکرائبرز مکمل ہونے پر انہیں یوٹیوب کا سلور پلے بٹن بھی ملا۔ان کی بڑھتی ہوئی مقبولیت کے پیچھے ایک ذاتی مقصد بھی تھا اور وہ تھا اپنے خاندان کی مالی مدد کرنا۔
معین کے والد تعمیراتی سامان کی سپلائی کا کام کرتے ہیں اور خاندان کی کئی مالی ذمہ داریاں تھیں۔ ایسے میں یوٹیوب اور تشہیری کاموں سے ہونے والی آمدنی صرف معین کی ذاتی کامیابی نہیں تھی بلکہ اس کے ذریعے وہ گھر کے اخراجات میں بھی حصہ ڈالنے لگے تھے۔کورونا لاک ڈاؤن سے کچھ عرصہ پہلے یوٹیوب اور تشہیری کاموں سے ان کی ماہانہ آمدنی تقریباً 1.5 لاکھ سے 2 لاکھ روپے تک پہنچ گئی تھی۔وبا کے دوران بعض ادائیگیاں تاخیر سے ہوئیں۔ جب طویل عرصے سے زیر التوا رقم بالآخر موصول ہوئی تو ان کے اکاؤنٹ میں 2.58 لاکھ روپے جمع ہوئے۔ معین نے فوراً اس رقم سے اپنا ایک پرانا خواب پورا کرنے کا فیصلہ کیا۔ انہوں نے ماروتی آلٹو کار خریدی اور اپنے والد کو تحفے میں دے دی۔وہ اسے اپنی زندگی کے یادگار ترین لمحات میں شمار کرتے ہیں۔

مشکلات کے بعد ایک نئی شروعات
ابتدائی کامیابی کے باوجود ان کا سفر آسان نہیں رہا۔ 2019 سے 2021 کے درمیان ان کے کام کو کئی مشکلات کا سامنا کرنا پڑا اور لاک ڈاؤن کے دوران ویڈیوز کی شوٹنگ مکمل طور پر رک گئی۔2021 کے آخر میں ان کا پرانا انسٹاگرام اکاؤنٹ بھی معطل ہوگیا جس پر 2 لاکھ سے زیادہ فالوورز تھے۔ انہیں نئے اکاؤنٹ کے ساتھ دوبارہ شروعات کرنا پڑی۔2022 کے بعد تقریباً ڈیڑھ سال تک معین نے ایک پروڈکشن ہاؤس میں کام کیا جہاں انہیں اداکاری اور ہدایت کاری سیکھنے کا موقع ملا۔ کچھ عرصہ وہ دہلی میں بھی رہے اور ڈریم 11 جیسے بڑے برانڈز کے اشتہارات پر کام کیا۔تاہم رفتہ رفتہ انہیں احساس ہوا کہ روایتی ملازمت ان کی پسند کا راستہ نہیں ہے۔ وہ آزادانہ طور پر کام کرنا اور اپنا کچھ قائم کرنا چاہتے تھے۔ چنانچہ وہ جے پور واپس آگئے اور اپنے چینل پر دوبارہ کام شروع کردیا۔
ان کے ڈیجیٹل کیریئر کا سب سے بڑا موڑ 2024 کے رمضان المبارک میں آیا۔
اس سے پہلے ان کے خاندان کے کچھ افراد عمرہ کے لیے گئے تھے جس کے بعد گھر میں مذہبی موضوعات پر گفتگو کا سلسلہ بھی بڑھ گیا تھا۔ رمضان کے دوران معین نے ایک اسکرپٹڈ ویڈیو بنائی جس میں ایک روزہ دار کو روزہ توڑنے کے بدلے پیسوں کی پیشکش کی جاتی ہے لیکن وہ اپنے ایمان کی وجہ سے انکار کردیتا ہے۔ اس ویڈیو کو تقریباً 5 لاکھ ویوز ملے۔اس حوصلہ افزا ردعمل کے بعد انہوں نے اسلامی معلومات پر سوال و جواب کی ایک ویڈیو تیار کی۔ اس کی مقبولیت ان کی توقعات سے کہیں زیادہ رہی۔ اسے فیس بک پر 1.2 کروڑ۔ انسٹاگرام پر 80 لاکھ اور یوٹیوب پر 25 لاکھ ویوز ملے۔اس غیر معمولی ردعمل نے انہیں اپنے مواد کا رخ تبدیل کرنے کا حوصلہ دیا۔ 2024 کے آخر میں انہوں نے اسلامی موضوعات کے لیے ایک الگ یوٹیوب چینل شروع کیا۔
سوشل میڈیا کے ذریعے مذہبی معلومات کی تشہیر
آج معین کی ویڈیوز میں نبی کریم حضرت محمد ﷺ کی سیرت۔ اسلامی تاریخ اور اسلام سے متعلق غلط فہمیوں کو دور کرنے جیسے موضوعات شامل ہیں۔ مختلف سوشل میڈیا پلیٹ فارمز پر ان کی موجودگی مسلسل مضبوط ہورہی ہے۔انسٹاگرام پر ان کے 4.21 لاکھ فالوورز ہیں جبکہ ان کے دو فیس بک پیجز کو تقریباً 9 لاکھ افراد فالو کرتے ہیں۔ ان کے نئے اسلامی یوٹیوب چینل کے سبسکرائبرز کی تعداد ایک لاکھ سے تجاوز کرچکی ہے جبکہ پرانے ’جے پور ٹی وی‘ چینل پر 3.47 لاکھ سبسکرائبرز ہیں۔معین کا کہنا ہے کہ وہ مذہبی موضوعات پر مواد تیار کرتے وقت خاص احتیاط برتتے ہیں۔ وہ خود کو کوئی عالم دین نہیں سمجھتے اور ان کا ماننا ہے کہ بڑی تعداد میں لوگوں تک معلومات پہنچانے سے پہلے ان کی تصدیق ضروری ہے۔ وہ معتبر کتابوں سے معلومات کی جانچ کرتے ہیں اور ضرورت پڑنے پر اسلامی علماء سے بھی مشورہ لیتے ہیں۔
پرینک ویڈیوز بنانے کے تجربے نے بھی انہیں ذمہ داری کے حوالے سے کئی اہم سبق سکھائے ہیں۔ 2019 میں ایک پرینک کے دوران ایک شخص اس قدر خوف زدہ ہوگیا تھا کہ معاملہ بالآخر پولیس تک پہنچ گیا۔ اس واقعے نے معین کو احساس دلایا کہ تفریح کے نام پر کسی کو پریشان کرنا درست نہیں ہے۔ اس کے بعد انہوں نے متعلقہ افراد کی رضامندی کے بغیر پرینک ویڈیوز بنانا بند کردیا۔وہ بیٹنگ اور گیمنگ ایپلی کیشنز کی جانب سے ملنے والی پرکشش تشہیری پیشکشیں بھی قبول نہیں کرتے۔ معین کا کہنا ہے کہ اس طرح کے اشتہارات ان کے اصولوں کے خلاف ہیں اور ان کے والد بھی اس کی حمایت نہیں کرتے۔ اس کے بجائے وہ جے پور کی مقامی دکانوں۔ ریستورانوں اور کیفے کی تشہیر کو ترجیح دیتے ہیں۔

جے پور سے وابستگی اور مستقبل کے خواب
معین اپنے بہن بھائیوں میں سب سے بڑے ہیں۔ ان کے چھوٹے بھائی محسن فزیوتھراپسٹ ہیں۔ معین زیادہ تر شوٹنگ اور ایڈیٹنگ کا کام گھر سے ہی کرتے ہیں۔ اس کام میں ان کی ایک چھوٹی ٹیم بھی معاونت کرتی ہے جس میں انمول۔ چیتنا اور سمیر شامل ہیں۔جے پور ان کے تخلیقی کام کا ایک اہم حصہ ہے۔ مالویہ نگر۔ مانسروور۔ سٹی پارک۔ جل محل اور البرٹ ہال ان کے پسندیدہ مقامات میں شامل ہیں جہاں وہ ویڈیوز کی شوٹنگ کرتے ہیں۔ان کی کوششوں کو مختلف سطحوں پر سراہا بھی گیا ہے۔ انہیں کوٹہ میں ’بیسٹ کری ایٹر‘ ایوارڈ سے نوازا گیا جبکہ راجستھان کے ’ریفَا‘ ایوارڈ شو میں بھی انہیں اعزاز دیا گیا۔مستقبل کے حوالے سے معین چاہتے ہیں کہ وہ صحافت میں حاصل کی گئی اپنی تعلیمی قابلیت اور ڈیجیٹل مواد سازی کے تجربے کو یکجا کریں۔ ان کا خواب ایک ایسا میڈیا پلیٹ فارم قائم کرنا ہے جہاں رپورٹرز اور نیوز اینکرز کو اسلامی موضوعات کے بارے میں زیادہ گہری اور درست معلومات فراہم کی جاسکیں۔سڑکوں پر پرینک ویڈیوز کے ذریعے لوگوں کو ہنسانے سے لے کر ایمان اور تاریخ پر مبنی مواد تیار کرنے تک معین خان کا سفر اس بات کی عکاسی کرتا ہے کہ ڈیجیٹل دنیا میں مواد تخلیق کرنے والے افراد وقت کے ساتھ اپنی شناخت اور ترجیحات تبدیل کرسکتے ہیں۔ ان کے لیے اب اگلا مقصد صرف اپنے ناظرین کی تعداد بڑھانا نہیں بلکہ ایسا پلیٹ فارم قائم کرنا ہے جو مواد سازی کو ذمہ دارانہ صحافت کے ساتھ جوڑ سکے۔