نئی دہلی: سپریم کورٹ نے منگل کو نیشنل ہائی ویز اتھارٹی آف انڈیا (این ایچ اے آئی) سے سوال کیا کہ شاہراہوں پر کھڑی یا رکی ہوئی گاڑیوں کی فوری نشاندہی اور نگرانی کے لیے الیکٹرانک نظام کیوں نہیں بنایا جا سکتا۔ جسٹس وکرم ناتھ، جسٹس آگسٹین جارج مسیح اور جسٹس سندیپ مہتا کی بنچ راجستھان کے پھلودی علاقے میں نومبر 2025 میں پیش آئے ایک سڑک حادثے سے متعلق ازخود کارروائی کی سماعت کر رہی تھی۔ اس حادثے میں 15 افراد کی جان چلی گئی تھی۔

عدالت کی معاونت کرنے والے سینئر وکیل اے این ایس نڈکرنی نے، جو اس معاملے میں امیکس کیوری یعنی عدالت کے معاون کے طور پر پیش ہو رہے ہیں، شاہراہوں پر گاڑیوں کی پارکنگ کے باعث پیش آنے والے حالیہ حادثات کا حوالہ دیا۔ اس پر بنچ نے کہا، ’’این ایچ اے آئی کے پاس تمام وسائل موجود ہیں، تو ایسا الیکٹرانک نگرانی کا نظام کیوں نہیں ہو سکتا جس کے ذریعے شاہراہ پر رکی یا کھڑی کسی بھی گاڑی کی فوری نشاندہی کی جا سکے؟‘‘ اس معاملے میں پیش ہونے والے ایک وکیل نے عدالت کو بتایا کہ این ایچ اے آئی شاہراہوں پر گشت بھی کرتی ہے۔ عدالت کو بتایا گیا کہ اس معاملے میں کئی درخواستیں بھی دائر کی گئی ہیں۔

سپریم کورٹ نے معاملے کی اگلی سماعت 13 اکتوبر کو مقرر کرتے ہوئے کہا کہ اس دوران شاہراہوں سے تجاوزات ہٹانے سے متعلق درخواستوں پر غور کیا جائے گا۔ ستمبر میں بھی اس معاملے کی سماعت کے دوران سپریم کورٹ نے شاہراہوں پر تجاوزات اور کھڑی گاڑیوں کے مسئلے پر تشویش ظاہر کی تھی۔ اس وقت این ایچ اے آئی کے وکیل نے بتایا تھا کہ شاہراہوں پر غیر مجاز پارکنگ کی روک تھام کے لیے باقاعدہ معائنہ اور گشت سے متعلق سرکلر جاری کیے گئے ہیں۔ عدالت کے معاون نے اس وقت کہا تھا کہ شاہراہوں پر گاڑیوں کی غیر قانونی پارکنگ ایک بڑا مسئلہ ہے، جس کی وجہ سے سڑک حادثات پیش آتے ہیں۔

نومبر 2025 میں سپریم کورٹ نے پھلودی میں 2 نومبر کو پیش آئے اس حادثے کا ازخود نوٹس لیا تھا، جس میں ایک ٹیمپو ٹریولر سڑک پر کھڑے ٹریلر ٹرک سے ٹکرا گیا تھا۔ یہ حادثہ بھارت مالا ہائی وے پر ماتودا گاؤں کے قریب اس وقت پیش آیا تھا جب ٹیمپو ٹریولر بیکانیر کے کولایت مندر سے جودھپور جا رہا تھا۔ 13 اپریل کو سپریم کورٹ نے کئی عبوری ہدایات جاری کرتے ہوئے کہا تھا کہ کسی بھی بھاری یا تجارتی گاڑی کو قومی شاہراہ کی مرکزی سڑک یا پختہ کنارے پر مقررہ جگہ، پارکنگ بے، لی بائی یا شاہراہ کے کنارے موجود سہولت گاہ کے علاوہ کہیں بھی کھڑا یا روکا نہیں جا سکے گا۔ عدالت نے قومی شاہراہ کی حدود میں کسی نئے ڈھابے، کھانے پینے کی دکان یا تجارتی ڈھانچے کی تعمیر یا اسے چلانے پر بھی پابندی عائد کی تھی۔ سپریم کورٹ نے وزارت سڑک ٹرانسپورٹ و شاہراہیں اور این ایچ اے آئی کو یہ ہدایت بھی دی تھی کہ حادثات کے خطرناک مقامات اور حساس علاقوں کی نشاندہی کی جائے اور قومی شاہراہوں پر موجود تمام خطرناک مقامات کی جامع فہرست شائع کی جائے۔