ڈراما انسانی زندگی اور معاشرے کے مختلف رنگوں کو فنکارانہ انداز میں پیش کرنے کا ایک مؤثر ذریعہ ہے۔ اس کے ذریعے کہانی محض الفاظ تک محدود نہیں رہتی بلکہ کرداروں کی اداکاری، مکالموں اور حرکات و سکنات سے اسٹیج پر ایک جیتی جاگتی تصویر بن جاتی ہے۔ اسٹیج ڈراما جہاں ناظرین کو تفریح فراہم کرتا ہے وہیں انہیں انسانی جذبات، معاشرتی رویوں اور تہذیبی اقدار سے بھی روشناس کراتا ہے۔ اردو اکادمی دہلی گزشتہ 35 برسوں سے اس روایت کو برقرار رکھتے ہوئے مسلسل اردو ڈراما فیسٹیول منعقد کرتی آ رہی ہے۔ اس سال بھی اسی سلسلے کو آگے بڑھاتے ہوئے 36ویں فیسٹیول کا اہتمام کیا گیا ہے۔ اس کا بنیادی مقصد اردو زبان و ثقافت کو فروغ دینے کے ساتھ اسٹیج ڈرامے کی روایت کو زندہ رکھنا اور عصری مسائل کو فنکارانہ انداز میں پیش کرنا ہے۔

فیسٹیول کی افتتاحی تقریب کی نظامت مالک اشتر نے کی۔ انہوں نے اپنے دلنشیں اور معلوماتی انداز میں اردو ڈرامے اور پارسی تھیٹر کی تاریخی روایت پر روشنی ڈالی اور اسٹیج ڈراموں کی ادبی، تہذیبی اور ثقافتی اہمیت کو اجاگر کیا۔فیسٹیول کے پہلے دن تھیٹر لیلا ایکٹنگ اسٹوڈیو اینڈ پرفارمنگ آرٹس سوسائٹی کے زیر اہتمام ’’امراؤ جان‘‘ پیش کیا گیا۔ ڈرامے کی ہدایت کاری ورون شرما نے کی۔ معروف ادیب مرزا ہادی رسوا کے شہرۂ آفاق ناول ’’امراؤ جان ادا‘‘ سے ماخوذ اس ڈرامے کا آغاز فلم ’’امراؤ جان‘‘ کے مشہور نغمے ’’ان آنکھوں کی مستی کے مستانے ہزاروں ہیں‘‘ سے ہوا۔ نغمے کی دلکش پیشکش نے ابتدا ہی میں محفل کو رومانوی فضا سے ہم کنار کر دیا۔

تقریباً بیس مناظر پر مشتمل اس موسیقی سے مزین ڈرامے میں پانچ مرکزی کرداروں کے علاوہ بیس سے زائد ضمنی کردار بھی شامل تھے۔ تمام فنکاروں نے اپنے کرداروں کو مہارت اور خوش اسلوبی سے نبھایا اور کہانی کو مؤثر انداز میں آگے بڑھایا۔ ڈرامے میں موسیقی اور نغمات کو جذبات کے اظہار کا اہم ذریعہ بنایا گیا تھا۔ محبت، درد، خوشی، غم اور انسانی احساسات کی مختلف کیفیات کو موسیقی کے ذریعے خوبصورتی سے پیش کیا گیا جس سے ڈرامے کی مجموعی تاثیر میں اضافہ ہوا۔

ڈرامے کا ایک نمایاں پہلو یہ تھا کہ امراؤ جان اپنے درد و غم اور داخلی احساسات کے اظہار کے لیے اردو شاعری کا سہارا لیتی ہے۔ اس سلسلے میں خواجہ حیدر علی آتش کی معروف غزل ’’یہ آرزو تھی تجھے گل کے روبرو کرتے‘‘ بھی نہایت خوبصورت انداز میں پیش کی گئی۔ اس غزل نے ڈرامے کی ادبی فضا کو مزید دلکش اور مؤثر بنا دیا۔ شاعری اور موسیقی کے حسین امتزاج نے کہانی کے جذباتی اور تہذیبی پہلوؤں کو نمایاں کرنے میں اہم کردار ادا کیا۔

ڈرامے کی ایک اور قابل ذکر فنی خوبی ماضی کے واقعات کو پیش کرنے کی تکنیک کا استعمال تھا۔ جب امراؤ جان نواب صاحب کے سامنے اپنی گزشتہ زندگی اور بیتے ہوئے ایام کا ذکر کرتی ہے تو کہانی ماضی میں منتقل ہو جاتی ہے اور اس کی زندگی کے مختلف واقعات مناظر کی صورت میں اسٹیج پر دکھائے جاتے ہیں۔ اس تکنیک کو کئی مقامات پر خوبصورتی سے برتا گیا جس سے ماضی اور حال کے درمیان مؤثر ربط قائم ہوا۔ اس طرح ناظرین امراؤ جان کی زندگی کے مختلف مراحل سے بتدریج واقف ہوتے چلے گئے۔

ڈرامے کی کہانی فیض آباد کی ایک کمسن لڑکی امیرن کے گرد گھومتی ہے جو حالات کے جبر کے نتیجے میں اپنے خاندان سے جدا ہو کر لکھنؤ کے ایک کوٹھے تک پہنچ جاتی ہے۔ وقت گزرنے کے ساتھ وہ ’’امراؤ جان‘‘ کے نام سے شہرت حاصل کرتی ہے اور اپنی صلاحیتوں کے بل پر ایک باصلاحیت رقاصہ اور شاعرہ کے طور پر پہچانی جانے لگتی ہے۔ نواب سلطان سے اس کی محبت اور پھر جدائی کے ساتھ زندگی کی محرومیاں اور تلخ حقیقتیں کہانی کو جذباتی گہرائی عطا کرتی ہیں۔ امراؤ جان کے کردار کے ذریعے عورت کی سماجی حیثیت، اس کی داخلی کشمکش اور معاشرتی ناانصافیوں کو بھی نمایاں کیا گیا ہے۔

مرزا ہادی رسوا کا ناول ’’امراؤ جان ادا‘‘ 1899 میں شائع ہوا تھا۔ یہ ناول محض ایک عورت کی داستان نہیں بلکہ اپنے عہد کے لکھنؤ کی تہذیب، معاشرت، زبان و بیان، موسیقی، رقص اور محفلوں کی زندگی کا بھی ایک اہم ادبی اور تاریخی حوالہ ہے۔ اسٹیج پر ناول کو پیش کرتے ہوئے موسیقی، اداکاری اور ماضی کے واقعات کو منظر عام پر لانے جیسی فنی خوبیوں کے امتزاج سے ایک معروف ادبی کردار کو نئی ڈرامائی صورت میں پیش کرنے کی کامیاب کوشش کی گئی۔

ڈرامے کے اختتام پر محکمۂ فن، ثقافت و السنہ، حکومتِ دہلی کے اسپیشل سکریٹری اور اردو اکادمی کے سکریٹری لیکھ راج نے ہدایت کار ورون شرما کو پودا پیش کرکے ان کی فنی کاوشوں کو سراہا اور حوصلہ افزائی کی۔فیسٹیول کے پہلے روز ’’امراؤ جان‘‘ کی پیشکش نے اردو ادب کے کلاسیکی ورثے، لکھنؤ کی تہذیبی روایت اور اسٹیج ڈرامے کے فن کو ایک دلکش اور مؤثر انداز میں ناظرین کے سامنے پیش کیا۔