اردو اکادمی دہلی کے پروگرام نئے پرانے چراغ کا22جولائی سے آغاز

Story by  اے ٹی وی | Posted by  Shah Imran Hasan | 1 Years ago
 اردو اکادمی دہلی کے پروگرام نئے پرانے چراغ کا22جولائی سے آغاز
اردو اکادمی دہلی کے پروگرام نئے پرانے چراغ کا22جولائی سے آغاز

 

 

آواز دی وائس، نئی دہلی

اردو کے فروغ کے لیے اردو اکادمی ہمیشہ سے کوشاں رہی ہے اور اب کورونا کے بعد حالات معمول پر آتے ہی اکادمی کی سرگرمیاں اپنے عروج کی جانب بڑھ رہی ہیں۔ اسی سلسلے میں اکادمی مقبول عام پروگرام 'نئے پرانے چراغ' کا آغاز کرنے جا رہی ہے۔ 

 اردو اکادمی کے وائس چیئرمین حاجی تاج محمد نے ایک پریس ریلیز جاری کرتے ہوئے کہا کہ نئے شعرا اور تخلیق کار جنہوں نے اس سے قبل اس پروگرام میں شرکت نہیں کی ہے اپنا نام اردو اکادمی، دہلی کے دفتر میں 5جولائی تک اندراج کراسکتے ہیں تاکہ آگے کی کارروائی میں ان کے نام کا اندراج ہوسکے۔

 انہوں نے مزید کہا کہ اردو اکادمی، دہلی کی جانب سے منعقد ہونے والا دہلی کے بزرگ اور جواں عمر قلمکاروں کا مقبول ترین پانچ روزہ ادبی اجتماع 'نئے پرانے چراغ' 22 جولائی تا 26 جولائی 2022ء اکادمی کے ' قمر رئیس سلور جوبلی آڈیٹوریم' میں منعقد ہوگا۔ افتتاحی اجلاس 22جولائی2022ء بروز جمعہ شام پانچ بجے منعقد ہوگا۔

اس پروگرام میں 22 تا26 جولائی ساڑھے چھ بجے روزانہ 'محفل شعر وسخن' منعقد ہوگی جس میں دہلی کے بزرگ و جواں عمر شعرا اپنا کلام پیش کریں گے۔

وہیں23 تا 26 جولائی کو صبح دس بجے تا دو بجے روزانہ 'تحقیقی وتنقیدی اجلاس' منعقد ہوگا جس میں دہلی کی تینوں یونیورسٹیوں کے ریسرچ اسکالرز منتخب موضوعات پر تحقیقی و تنقیدی مقالے پیش کریں گے اور 23 تا 26 جولائی کو دوپہر ڈھائی بجے سے شام پانچ بجے تک روزانہ 'تخلیقی اجلاس' منعقد ہوگا جس میں دہلی کے بزرگ و جواں عمر تخلیق کار افسانہ، انشائیہ، خاکہ وغیرہ پیش کریں گے۔ واضح رہے کہ اس پروگرام میں تقریباً سواچار سو ریسرچ اسکالرز، تخلیق کار اور شعرا اپنے مقالے اور تخلیقات سے سامعین کو محظوظ کریں گے۔