بستی: آسام کے وزیر اعلیٰ ہمنتا بسوا سرما نے ملک بھر میں یکساں سول کوڈ (یو سی سی) نافذ کرنے کی وکالت کرتے ہوئے دعویٰ کیا ہے کہ اس کے نفاذ نہ ہونے کی صورت میں مسلم خواتین کو سب سے زیادہ مشکلات کا سامنا کرنا پڑتا ہے۔ انہوں نے تعددِ ازدواج جیسے مسائل سے نمٹنے کے لیے مشترکہ قانون کو ضروری قرار دیا۔

اتوار کی شام یہاں صحافیوں سے بات کرتے ہوئے سرما نے کہا، ’’آسام میں یکساں سول کوڈ پہلے ہی نافذ کرنے کے لیے نوٹیفائی کیا جا چکا ہے اور اسے ملک بھر میں نافذ کیا جانا چاہیے۔‘‘ انہوں نے کہا کہ یو سی سی کی عدم موجودگی میں مسلم خواتین سب سے زیادہ متاثر ہوتی ہیں۔ سرما نے تعددِ ازدواج جیسے معاملات سے نمٹنے کے لیے ایک مشترکہ قانون کی ضرورت پر بھی زور دیا۔

آسام کے وزیر اعلیٰ اتر پردیش کے مشرقی حصے میں واقع بستی ضلع میں بی جے پی کے قومی جنرل سکریٹری ہریش دویدی کے اہل خانہ سے تعزیت کرنے پہنچے تھے۔ وہ تلیاجوت گاؤں میں دویدی کی رہائش گاہ پر ان کی والدہ کے انتقال پر اہل خانہ سے اظہارِ تعزیت کرنے گئے تھے۔

اینٹی ایس آئی آر احتجاج اور حکومت کی تبدیلی کے مطالبات کے درمیان کانگریس اور دیگر اپوزیشن جماعتوں کی جانب سے بی جے پی کو نشانہ بنائے جانے پر ردعمل ظاہر کرتے ہوئے سرما نے کہا، ’’اقتدار ووٹوں کے ذریعے حاصل ہوتا ہے، طاقت کے زور پر نہیں۔‘

‘ انہوں نے کہا، ’’جو لوگ یہ سمجھتے ہیں کہ دھمکیوں اور خوف کے ذریعے حکومت تبدیل کی جا سکتی ہے، انہیں بنگلہ دیش اور نیپال کی صورت حال پر نظر ڈالنی چاہیے۔‘‘ سرما نے دعویٰ کیا کہ دہلی میں ہونے والے احتجاج میں صرف 5,000 سے 10,000 افراد نے شرکت کی تھی۔ کولکاتا میں درگا پوجا پنڈال میں بھگدڑ کے واقعے پر اظہارِ افسوس کرتے ہوئے آسام کے وزیر اعلیٰ نے کہا کہ حکومت نے واقعے کا فوری نوٹس لیا اور زخمیوں کے علاج کا انتظام کیا۔

انہوں نے مزید کہا کہ مستقبل میں ایسے واقعات کی روک تھام کے لیے ضروری اقدامات بھی کیے جا رہے ہیں۔ اس سے قبل ہمنتا بسوا سرما ایودھیا سے سڑک کے راستے ہریش دویدی کی رہائش گاہ پہنچے۔ وہاں انہوں نے بی جے پی رہنما کی مرحوم والدہ کی تصویر پر پھول چڑھائے اور سوگوار خاندان سے تعزیت کا اظہار کیا۔