گوہاٹی:آسام کے گوہاٹی میں پلتن بازار ریلوے اسٹیشن پر پولیس نے خفیہ اطلاع کی بنیاد پر کارروائی کرتے ہوئے 2 بنگلہ دیشی شہریوں کو گرفتار کیا ہے۔ گوہاٹی پولیس نے ہفتہ کو یہ اطلاع دی۔گوہاٹی پولیس کمشنریٹ کے ڈپٹی کمشنر آف پولیس آپریشنز کولندر ناتھ ڈیکا نے بتایا کہ ریلوے اسٹیشن پر کارروائی کے دوران دونوں افراد کو گرفتار کیا گیا۔

انہوں نے کہا کہ خفیہ اطلاع کی بنیاد پر پلتن بازار ریلوے اسٹیشن پر کارروائی کی گئی۔ اس دوران 2 بنگلہ دیشی شہریوں کو گرفتار کیا گیا جو غیر قانونی طور پر ہندوستان میں داخل ہوئے تھے۔ڈی سی پی نے بتایا کہ پوچھ گچھ کے دوران دونوں نے مبینہ طور پر اعتراف کیا کہ وہ میگھالیہ کی سرحد سے غیر قانونی طور پر ہندوستان میں داخل ہوئے تھے اور روزگار کی تلاش میں مغربی بنگال جانے کی کوشش کر رہے تھے۔

پولیس کے مطابق دونوں کے قبضے سے 2 آدھار کارڈ بھی برآمد ہوئے جو جانچ کے دوران جعلی پائے گئے۔ ان کے پاس سے بنگلہ دیشی کرنسی کے نوٹ بھی برآمد ہوئے ہیں۔کولندر ناتھ ڈیکا نے کہا کہ دونوں افراد اس وقت پولیس کی تحویل میں ہیں۔ انہیں ہندوستان سے نکالنے کے لیے امیگرنٹس ایکسپلشن فرام آسام ایکٹ 1950 کے تحت کارروائی شروع کی جائے گی۔ آئندہ چند دنوں میں انہیں ہندوستان سے ملک بدر کرنے کی کارروائی کی جائے گی۔

پولیس نے بتایا کہ معاملے میں مزید قانونی کارروائی جاری ہے۔