اس سے پہلے اداکار کی گاڑی پر فائرنگ کے سلسلے میں گرفتار کیے گئے 4 ملزمین کو جمعرات کو ممبئی کی ایسپلانیڈ عدالت میں پیش کیا گیا تھا جسے کِلا کورٹ بھی کہا جاتا ہے۔ پولیس کی جانب سے عدالت میں پیش کی گئی ریمانڈ درخواست کے مطابق انیل پنڈت کو اس معاملے میں مفرور ملزم نامزد کیا گیا ہے۔

عدالتی کارروائی کے دوران ممبئی پولیس نے مؤقف اختیار کیا کہ فائرنگ کا واقعہ انیل پنڈت کے اشارے پر انجام دیا گیا تھا۔عدالت نے چاروں ملزمین کو 26 اکتوبر تک پولیس تحویل میں بھیج دیا۔ پولیس نے ان کی تحویل 31 اکتوبر تک دینے کی درخواست کی تھی جسے عدالت نے مسترد کر دیا۔

چاروں ملزمین کو راجستھان کے کوٹا سے ممبئی لایا گیا تھا۔ طبی معائنے کے بعد انہیں ایسپلانیڈ عدالت میں پیش کیا گیا۔یہ واقعہ 18 اکتوبر کو شام تقریباً 7 بجے ممبئی کے جوہو علاقے میں پیش آیا تھا۔ ٹائیگر شرف ایک فٹ بال کلب سے باہر نکل رہے تھے کہ ان کی گاڑی پر فائرنگ کی گئی۔ اداکار اس واقعے میں محفوظ رہے جبکہ ان کے ڈرائیور کو چوٹیں آئی تھیں۔

دریں اثنا منگل کو ٹائیگر شرف کی ٹیم نے ان کے نام سے منسوب فرضی خبروں اور غیر مجاز بیانات کے پھیلاؤ پر سخت انتباہ جاری کیا۔ ٹیم نے مصنوعی ذہانت سے تیار کی گئی ان ویڈیوز پر بھی تشویش ظاہر کی جنہیں غلط طور پر اداکار سے منسوب کیا جا رہا ہے۔ٹیم نے میڈیا اداروں اور سوشل میڈیا پلیٹ فارمز سے اپیل کی کہ وہ کسی بھی خبر یا مواد کو شائع کرنے سے پہلے اس کی تصدیق کریں۔ اس نے خبردار کیا کہ ایسا فرضی مواد تیار کرنے یا اسے فروغ دینے اور پھیلانے والے افراد اور صفحات کے خلاف قانونی کارروائی بھی کی جا سکتی ہے۔

سوشل میڈیا پر جاری ایک سرکاری بیان میں ٹائیگر شرف کی ٹیم نے واضح کیا کہ اداکار نے فائرنگ کے حالیہ واقعے یا اس سے متعلق پیش رفت کے بارے میں نہ کوئی بیان جاری کیا ہے اور نہ کوئی ویڈیو جاری کی ہے۔ ٹیم نے یہ بھی کہا کہ اداکار نے اس سلسلے میں کسی بھی قسم کے ابلاغ کی اجازت نہیں دی ہے۔