لکھنؤ: اتر پردیش حکومت نے ریاستی ملازمین، امداد یافتہ تعلیمی و تکنیکی تعلیمی اداروں، شہری بلدیاتی اداروں کے مستقل اور کل وقتی ملازمین، ورک چارج ملازمین اور یو جی سی پے اسکیل کے تحت تنخواہ حاصل کرنے والے ملازمین کے مہنگائی الاؤنس (ڈی اے) میں 3 فیصد اضافہ کردیا ہے۔ اب ان ملازمین کو 60 فیصد کے بجائے 63 فیصد مہنگائی الاؤنس ملے گا۔ اضافے کی شرح یکم جولائی 2026 سے نافذ ہوگی۔
اس سلسلے میں حکومت کی جانب سے ہفتہ کو حکم نامہ جاری کردیا گیا۔ بڑھے ہوئے مہنگائی الاؤنس کی ادائیگی نومبر 2026 کی معمول کی تنخواہ کے ساتھ کی جائے گی۔ حکومت کے اس فیصلے سے ریاست کے لاکھوں ملازمین کو فائدہ پہنچے گا۔ حکومت کے بیان کے مطابق، اس فیصلے کا فائدہ مستقل ملازمین کے علاوہ امداد یافتہ تعلیمی اداروں، شہری بلدیاتی اداروں اور دیگر اہل زمروں کے ملازمین کو بھی ملے گا۔
حکم نامے کے مطابق، یکم جولائی سے 31 اکتوبر 2026 تک کی مدت کے بڑھے ہوئے مہنگائی الاؤنس کے بقایاجات کی ادائیگی کے لیے ملازمین کی مختلف زمروں کے لحاظ سے الگ الگ انتظام کیا گیا ہے۔ جن ملازمین کا تعلق جنرل پروویڈنٹ فنڈ (جی پی ایف) سے ہے، ان کے معاملے میں انکم ٹیکس اور سرچارج کی کٹوتی کے بعد بقایا رقم مقررہ حد کے مطابق ان کے پروویڈنٹ فنڈ اکاؤنٹ میں جمع کی جائے گی۔ یہ رقم یکم نومبر 2027 تک اکاؤنٹ میں جمع رہے گی۔ نیشنل پنشن سسٹم (این پی ایس) سے وابستہ ملازمین کے معاملے میں بقایاجات کی 10 فیصد رقم ان کے ٹئیر-1 پنشن اکاؤنٹ میں جمع کی جائے گی۔
اس کے علاوہ ریاستی حکومت بطور آجر بقایاجات کی 14 فیصد رقم کے برابر اپنا حصہ بھی ٹئیر-1 اکاؤنٹ میں جمع کرے گی۔ ٹئیر-1 اکاؤنٹ نیشنل پنشن سسٹم (این پی ایس) کا بنیادی پنشن اکاؤنٹ ہوتا ہے۔ اس میں ملازم اور حکومت، یعنی آجر، دونوں کی جانب سے رقم جمع کی جاتی ہے۔ بقیہ 90 فیصد رقم ملازم کے پبلک پروویڈنٹ فنڈ (پی پی ایف) اکاؤنٹ میں جمع کرائی جائے گی یا نیشنل سیونگ سرٹیفکیٹ (این ایس سی) کی شکل میں دی جائے گی۔
این ایس سی دستیاب نہ ہونے کی صورت میں متعلقہ رقم نقد ادا کی جائے گی۔ حکومت نے ریٹائر ہونے والے اور اگلے 6 ماہ میں ریٹائر ہونے والے ملازمین کے لیے خصوصی انتظام بھی کیا ہے۔ حکم نامہ جاری ہونے سے پہلے جن ملازمین کی خدمات ختم ہوچکی ہیں، جو یکم جولائی 2026 سے حکم نامہ جاری ہونے کی تاریخ کے درمیان ریٹائر ہوئے ہیں یا اگلے 6 ماہ میں ریٹائر ہونے والے ہیں، انہیں مہنگائی الاؤنس کے بقایاجات کی پوری رقم نقد ادا کی جائے گی۔
