نئی دہلی: سپریم کورٹ نے مقامی بلدیاتی انتخابات میں نامزدگی کے عمل کے دوران ’’بڑے پیمانے پر رکاوٹیں ڈالے جانے‘‘ سے متعلق حقائق کی جانچ کرنے والے کمیشن کی رپورٹ کے بعد پنجاب کے 50 بلدیاتی وارڈوں میں ہوئے انتخابات منسوخ کرتے ہوئے نئے سرے سے انتخاب کرانے کا حکم دیا ہے۔ چیف جسٹس سوریہ کانت، جسٹس جوی مالیا باگچی اور جسٹس وی. موہنا پر مشتمل بنچ نے پٹیالہ ضلع کے 28 اور موگا کے 22 وارڈوں میں ہوئے انتخابات منسوخ کردیے۔

سپریم کورٹ نے پنجاب و ہریانہ ہائی کورٹ کی سابق جج نرمل جیت کور کی سربراہی میں قائم یک رکنی کمیشن کی سفارشات کو قبول کرتے ہوئے یہ حکم دیا۔ مقامی بلدیاتی انتخابات 21 دسمبر 2024 کو ہوئے تھے۔ کمیشن 24 مارچ 2025 کو قائم کیا گیا تھا اور اس نے 18 نومبر 2025 کو اپنی رپورٹ پیش کی تھی۔ بنچ نے 28 ستمبر کے اپنے حکم میں کہا تھا کہ کمیشن اس نتیجے پر پہنچا ہے کہ نامزدگی کے عمل کے دوران بڑے پیمانے پر رکاوٹیں ڈالی گئیں۔ اس دوران نامزدگی کے کاغذات چھینے گئے، پھاڑے گئے یا ضائع کیے گئے اور امیدواروں پر حملے کیے گئے، انہیں حراست میں لیا گیا یا دھمکایا گیا۔

عدالت نے کہا، ’’ہم کمیشن کی سفارشات کو قبول کرتے ہیں اور متعلقہ 50 وارڈوں میں نئے سرے سے انتخابات کرانے کی ہدایت دیتے ہیں۔ دوبارہ انتخاب کا عمل چھ ہفتوں کے اندر مکمل کیا جائے۔‘‘ یہ حکم بدھ کی رات اپ لوڈ کیا گیا۔ سپریم کورٹ نے پنجاب حکومت کی جانب سے پیش ہونے والے سینئر وکیل کپل سبل کے اس بیان کا بھی حوالہ دیا کہ ریاست کو کمیشن کی سفارشات پر کوئی اعتراض نہیں ہے۔

عدالت نے پنجاب و ہریانہ ہائی کورٹ کے چیف جسٹس سے کہا کہ وہ دوبارہ انتخاب کے عمل کی نگرانی کے لیے ہائی کورٹ بار کے کم از کم دو یا تین سینئر ارکان کو ’’نگران‘‘ مقرر کریں۔ بنچ نے کہا کہ نامزدگی کے کاغذات داخل کرنے، ان کی جانچ، انتخابی نشان الاٹ کرنے اور ووٹنگ سمیت انتخابی عمل کی ویڈیو ریکارڈنگ مذکورہ نگرانوں کی موجودگی میں کی جائے گی۔ ریکارڈنگ کو مناسب طریقے سے محفوظ کرکے نگرانی کمیٹی کے حوالے کیا جائے گا۔

سپریم کورٹ نے کہا کہ دوبارہ انتخاب کے عمل میں کسی شخص کی جانب سے مداخلت یا رکاوٹ ڈالنے کی شکایت نگرانی کمیٹی کے سامنے کی جاسکتی ہے۔ نگرانی کمیٹی اور نگرانوں کو دی جانے والی فیس ہائی کورٹ کے چیف جسٹس طے کریں گے۔

عدالت نے یہ بھی ہدایت دی کہ دوبارہ انتخاب مکمل ہونے کے بعد ہائی کورٹ کے چیف جسٹس کو رپورٹ پیش کی جائے۔ بنچ نے کہا، ’’دوبارہ انتخاب کا عمل اسی وقت مکمل سمجھا جائے گا جب ہائی کورٹ کے چیف جسٹس پیش کی گئی رپورٹ کی بنیاد پر اس بات سے مطمئن ہوں کہ انتخابات آزادانہ اور منصفانہ طریقے سے کرائے گئے ہیں۔‘

‘ کئی ایسے امیدواروں نے پنجاب و ہریانہ ہائی کورٹ سے رجوع کیا تھا جنہیں مبینہ طور پر نامزدگی کے کاغذات داخل کرنے کی اجازت نہیں دی گئی تھی یا جو پٹیالہ بلدیاتی ادارے میں میئر اور ڈپٹی میئر کے انتخابات سے ناخوش تھے۔ 10 جنوری 2025 کو ہائی کورٹ نے پٹیالہ میونسپل کارپوریشن کے انتخابات کو برقرار رکھتے ہوئے کہا تھا کہ بعض وارڈوں میں انتخابات ملتوی کیے جانے سے پورا انتخابی عمل متاثر نہیں ہوتا۔ اس فیصلے سے غیر مطمئن امیدواروں نے سپریم کورٹ کا رخ کیا تھا۔