نئی دہلی: آنے والے دنوں میں سپریم کورٹ میں خاتون ججوں کی تعداد بڑھ کر تین ہو سکتی ہے، کیونکہ عدالت کے کالجیم نے گجرات ہائی کورٹ کی چیف جسٹس سنیتا اگروال کو سپریم کورٹ میں ترقی دینے کی سفارش کی ہے۔ سپریم کورٹ اور ہائی کورٹ کے ججوں کی تقرری کے عمل سے واقف ذرائع نے بتایا کہ ان کے ساتھ دہلی ہائی کورٹ کے چیف جسٹس دیویندر کمار اپادھیائے اور تلنگانہ ہائی کورٹ کے چیف جسٹس اپریش کمار سنگھ کے ناموں کو بھی اگلے چند دنوں میں سپریم کورٹ میں ترقی کے لیے منظوری ملنے کا امکان ہے۔

سپریم کورٹ میں فی الحال دو خاتون جج ہیں۔ جسٹس بی وی ناگ رتنا 31 اگست 2021 سے سپریم کورٹ کی جج ہیں، جبکہ جسٹس وینکٹا سبرامنی موہنا کو رواں سال 2 جون کو سپریم کورٹ میں مقرر کیا گیا تھا۔ جسٹس سنیتا اگروال کی سپریم کورٹ میں ترقی کے بعد ان کے اور جسٹس ناگ رتنا کے پاس ہائی کورٹ میں کام کرنے کا تجربہ ہوگا۔

جسٹس موہنا کو براہ راست وکلا کی صف سے سپریم کورٹ میں ترقی دی گئی تھی۔ وہ سپریم کورٹ کی سینئر وکیل رہ چکی ہیں۔ جسٹس ناگ رتنا 2027 میں ایک ماہ سے زیادہ عرصے تک ہندوستان کی چیف جسٹس بھی رہیں گی۔ جسٹس سنیتا اگروال نے دسمبر 1990 میں وکیل کے طور پر رجسٹریشن کرایا تھا۔ 21 سال تک وکالت کرنے کے بعد نومبر 2011 میں انہیں الہ آباد ہائی کورٹ کا ایڈیشنل جج مقرر کیا گیا۔ اس کے بعد اگست 2013 میں انہوں نے مستقل جج کے طور پر حلف لیا۔ جسٹس اگروال تربیت یافتہ اور تصدیق شدہ ثالث بھی ہیں اور وہ الہ آباد ہائی کورٹ کے اس پہلے گروپ کا حصہ تھیں جسے ثالثی اور مصالحت کی تربیت دی گئی تھی۔