نئی دہلی: دہلی میونسپل کارپوریشن (ایم سی ڈی) نے بھلسوا لینڈ فل سے کوڑا ہٹانے کی آخری تاریخ چھٹی بار بڑھا کر فروری 2027 کر دی ہے۔ اس مقام پر اب بھی برسوں سے جمع 10 لاکھ میٹرک ٹن سے زیادہ پرانا کوڑا موجود ہے۔ حکام کے مطابق، میونسپل کارپوریشن نے دہلی حکومت کو ایک ترمیم شدہ منصوبہ پیش کیا ہے۔

اس میں بھلسوا کے کوڑے کے پہاڑ کو ہٹانے کی آخری تاریخ دسمبر 2026 سے بڑھا کر فروری 2027 کر دی گئی ہے۔ تاہم، اوکھلا لینڈ فل سے کوڑا ہٹانے کے لیے دسمبر 2026 اور غازی پور کے لیے دسمبر 2027 کی آخری تاریخ برقرار رکھی گئی ہے۔ حکام نے بتایا کہ بھلسوا لینڈ فل سے پرانے کوڑے کی صفائی اور اسے ہٹانے میں تاخیر کی بنیادی وجہ ٹھیکے دار کی تبدیلی ہے۔

اس کام میں پرانے کوڑے کو چھانٹنا، اسے قابلِ استعمال بنانے کے لیے دوبارہ استعمال اور ری سائیکلنگ کے عمل سے گزارنا اور پھر وہاں سے ہٹانا شامل ہے۔ ایک افسر نے بتایا، ’’ٹھیکہ دوسری کمپنی کو سونپنے کے دوران آلات اور مشینوں کے انتظام اور انہیں ایک جگہ سے دوسری جگہ پہنچانے سے متعلق مسائل پیدا ہوئے، جس کی وجہ سے دو ماہ کی تاخیر ہوئی ہے۔‘‘