نئی دہلی: دہلی کی ایک عدالت نے منگل کو ہندوتوا حامی انفلوئنسر سوتنتر بھاردواج کو تین ہفتے کی عبوری ضمانت دے دی۔ یہ معاملہ جنتر منتر پر احتجاج کے دوران ایک طالبہ کے والد پر حملے سمیت دیگر الزامات سے متعلق ہے۔ کارروائی بند کمرے میں ہوئی۔ عدالتی ذرائع کے مطابق ایڈیشنل سیشن جج نے بھاردواج کو تین ہفتے کی عبوری ضمانت دی۔

بھاردواج کو 7 ستمبر کو 14 دن کی عدالتی حراست میں بھیجا گیا تھا۔ اس سے قبل پیر کو جج نے کہا تھا کہ ملزم کی ضمانت کی عرضی پر بند کمرے میں سماعت ہوگی۔ اس کے بعد عدالت کے عملے نے میڈیا اہلکاروں سے کمرۂ عدالت سے باہر جانے کو کہا۔ بعد میں عدالتی عملے نے بتایا کہ ضمانت کی عرضی پر حکم 15 ستمبر تک محفوظ رکھا گیا ہے۔

حملے کے معاملے میں گرفتاری کا مطالبہ کرتے ہوئے ’کاکروچ جنتا پارٹی‘ (کاجپا) کی جانب سے پارلیمنٹ اسٹریٹ تھانے کے باہر احتجاج کے چند گھنٹے بعد، 4 ستمبر کو بھاردواج کو بلند شہر میں حراست میں لیا گیا تھا۔ یہ کارروائی ایک انٹرویو کو لے کر پیدا ہونے والے غصے کے بعد ہوئی تھی، جس میں بھاردواج نے دعویٰ کیا تھا کہ احتجاج کے دوران اس نے طالبہ کے والد کی ’’کھوپڑی پھوڑ دی تھی‘‘ اور اپنے سیاسی روابط کی وجہ سے گرفتاری سے بچ گیا تھا۔

بھاردواج کو ایک جج کی رہائش گاہ پر پیش کیا گیا تھا، جہاں جج نے دہلی پولیس کی جانب سے ملزم سے ایک دن کی حراستی پوچھ گچھ کی درخواست منظور کر لی تھی۔ اگلے دن مجسٹریٹ عدالت نے بھاردواج کو ایک دن کی عدالتی حراست میں بھیج دیا تھا۔ اس کے بعد موجودہ عدالت نے ان کی عدالتی حراست میں 21 ستمبر تک توسیع کر دی تھی۔