نئی دہلی: سپریم کورٹ نے اداکار راجپال یادو سے متعلق چیک باؤنس معاملے کو حل کرنے کے لیے دہلی ہائی کورٹ کے سابق جج جسٹس نجمی وزیری کو ثالث مقرر کیا ہے۔ یہ قانونی تنازع 2010 میں ہونے والے ایک مالی معاہدے سے متعلق ہے۔ اس معاہدے کے تحت راجپال یادو نے اپنی ہدایت کاری میں پہلی فلم ’اتا پتا لاپتا‘ بنانے کے لیے میسرز مرلی پروجیکٹس پرائیویٹ لمیٹڈ سے پانچ کروڑ روپے لیے تھے۔ کمپنی نے الزام لگایا کہ 2013 میں یادو نے فلم کے لیے حاصل کی گئی پانچ کروڑ روپے کی مالی مدد واپس کرنے کے لیے ایک کروڑ پانچ لاکھ روپے کے سات چیک دیے تھے، لیکن یہ تمام چیک باؤنس ہو گئے۔

شکایت کنندہ کے مطابق، 2012 میں دونوں فریقوں کے درمیان ہونے والے معاہدے میں طے پایا تھا کہ راجپال یادو، ان کی اہلیہ اور ان کی کمپنی سود سمیت تقریباً 11 کروڑ روپے ادا کرنے پر راضی ہوئے تھے۔ معاملے کی سماعت کے دوران سپریم کورٹ نے اس بات کا نوٹس لیا کہ اداکار نے عدالت کی رجسٹری میں دو کروڑ روپے جمع کرا دیے ہیں۔ چیف جسٹس سوریہ کانت اور جسٹس جوئے مالیا باگچی پر مشتمل بنچ نے کہا، ’’دونوں فریقوں کی جانب سے مختصراً پیش کیے گئے نکات کو دیکھتے ہوئے ہمیں لگتا ہے کہ اس معاملے کو ثالثی کے ذریعے باہمی رضامندی سے حل کیا جا سکتا ہے۔‘

‘ بنچ نے 15 اکتوبر کے اپنے حکم میں کہا، ’’معاملے سے متعلق مسائل کی پیچیدگی کو دیکھتے ہوئے ہم دونوں فریقوں کے درمیان تنازع حل کرنے کے لیے دہلی ہائی کورٹ کے سابق جج جسٹس نجمی وزیری کو واحد ثالث مقرر کرتے ہیں۔‘‘ بنچ نے دونوں فریقوں کو ہدایت دی کہ وہ ثالث سے رابطہ کرکے پیشی کی تاریخ طے کریں۔ عدالت نے کہا کہ ثالث دونوں فریقوں کو ذاتی طور پر یا آن لائن پیش ہونے کے لیے کہہ سکتے ہیں۔ ثالث دونوں فریقوں سے بات چیت کرکے اپنی فیس طے کریں گے۔ سپریم کورٹ نے ماتحت عدالت کو راجپال یادو کا پاسپورٹ واپس کرنے کی بھی ہدایت دی، تاکہ وہ اپنے پیشہ ورانہ کام جاری رکھ سکیں۔

تاہم، ماتحت عدالت اس کے لیے کچھ شرائط مقرر کر سکتی ہے۔ عدالت نے واضح کیا کہ راجپال یادو ان شرائط کی پابندی کرنے کے بعد ہی بیرون ملک سفر کر سکیں گے۔ بیرون ملک سے واپسی پر انہیں ماتحت عدالت کو اس کی اطلاع دینی ہوگی۔ بنچ نے کہا کہ ثالثی کی رپورٹ موصول ہوتے ہی معاملے کو سماعت کے لیے فہرست میں شامل کیا جائے۔ سپریم کورٹ میں سماعت کے دوران راجپال یادو کے وکیل نے بتایا کہ اداکار نے عدالت کی سابقہ ہدایات پر عمل کرتے ہوئے دو کروڑ روپے جمع کرا دیے ہیں۔ ان کے وکیل نے عدالت سے درخواست کی کہ سات چیک باؤنس کے مقدمات میں سزا اور تین ماہ کی قید کے فیصلے کو چیلنج کرنے والی ان کی درخواست پر قانونی نکات اور میرٹ کی بنیاد پر سماعت کی جائے۔