گورکھپور (اتر پردیش): اتر پردیش کے وزیر اعلیٰ یوگی آدتیہ ناتھ نے بدھ کو کہا کہ سوشل میڈیا نے سچ اور جھوٹ کے درمیان ’آدھا سچ‘ کے نام سے ایک نئی صورت پیدا کردی ہے، اس لیے کسی بھی اطلاع کو سمجھنے کے لیے اس کا مکمل پس منظر اور سیاق و سباق جاننا ضروری ہے۔

وزیر اعلیٰ نے گورکھ ناتھ مندر میں مہنت دگ وجے ناتھ کی 57ویں برسی اور مہنت اویدیا ناتھ کی 12ویں برسی کے موقع پر منعقد شری مد بھاگوت مہاپوران کتھا گیان یگیہ کے آغاز کے موقع پر عقیدت مندوں سے خطاب کرتے ہوئے کہا کہ آج پوری دنیا میں انسانیت کو کئی طرح کے چیلنجز کا سامنا ہے۔

انہوں نے کہا کہ جدید دور میں لوگوں کے درمیان ڈپریشن اور الجھن کی کیفیت بھی بڑھی ہے۔ ان کے مطابق سائنس نے اگرچہ بہت ترقی کی ہے، لیکن مستقل امن کی تلاش میں دنیا آج بھی ہندوستان کی طرف دیکھتی ہے۔ سوشل میڈیا کا ذکر کرتے ہوئے آدتیہ ناتھ نے کہا کہ آج اطلاعات تیزی سے پھیلنے کے دور میں سچ اور جھوٹ کے درمیان ’آدھا سچ‘ جیسی صورتحال سامنے آگئی ہے۔

انہوں نے کہا کہ کسی بات کا صرف ایک حصہ پیش کردینے سے وہ مکمل سچ نہیں بن جاتا۔ اس لیے کسی بھی اطلاع کو سمجھنے کے لیے اس کے پورے سیاق و سباق کو جاننا ضروری ہے۔ آدتیہ ناتھ نے کہا کہ کسی شخص کے خیالات، گفتگو اور عمل میں ہم آہنگی ہونا کامیابی کے لیے ضروری ہے۔ اگر ان تینوں میں فرق ہو تو انسان کے اندر یہ الجھن پیدا ہوجاتی ہے کہ اسے کیا کرنا چاہیے اور کیا نہیں کرنا چاہیے۔ انہوں نے کہا کہ شری مد بھاگوت کتھا اس طرح کی الجھن کو دور کرنے میں مدد دیتی ہے۔