نئی دہلی: سپریم کورٹ نے جمعرات کو سی بی ایس ای سے کہا کہ وہ 2027 سے شروع ہونے والے نئے تعلیمی سیشن میں چھٹی جماعت کے طلبہ کے لیے تین زبانوں کی تعلیم لازمی قرار دینے کی اپنی پالیسی نافذ کرنے پر غور کرے، جس میں دو ہندوستانی مادری زبانیں شامل ہوں گی۔ چیف جسٹس سوریہ کانت، جسٹس جوی مالیا باگچی اور جسٹس وی موہنا پر مشتمل بنچ کے سامنے سی بی ایس ای کی جانب سے ایڈیشنل سالیسٹر جنرل ایشوریہ بھاٹی پیش ہوئیں۔ انہوں نے عدالت کو بتایا کہ سی بی ایس ای اس تجویز پر غور کرے گا۔ جسٹس باگچی نے ابتدا میں کہا کہ بچوں کو سہولت فراہم کرنے کے لیے سی بی ایس ای کو تین زبانوں کی پالیسی کے نفاذ کو اگلے تعلیمی سال تک مؤخر کرنے پر غور کرنا چاہیے۔

انہوں نے کہا کہ جو طلبہ اس وقت چھٹی جماعت میں ہیں، اگر وہ اسی سال تین زبانیں پڑھنا چاہتے ہیں تو انہیں اس کی اجازت بھی دی جا سکتی ہے۔ قانونی افسر نے کہا کہ سی بی ایس ای اس تجویز پر غور کرے گا اور اس معاملے پر ایک نیا نوٹ عدالت میں پیش کرے گا۔ بنچ نے واضح کیا کہ اس کی تجاویز فریقین کے حقوق اور ان کے دلائل پر اثرانداز نہیں ہوں گی اور اصل قانونی مسائل کا فیصلہ بعد میں کیا جا سکتا ہے۔ اس سے قبل مرکزی حکومت اور سی بی ایس ای نے عدالت کو بتایا تھا کہ وہ چھٹی جماعت کے طلبہ کے لیے تین زبانوں کی تعلیم لازمی قرار دینے والی پالیسی کے نفاذ سے متعلق عدالت کی تجاویز پر کام کر رہے ہیں۔

اس پالیسی میں کم از کم دو ہندوستانی زبانوں کا مطالعہ لازمی کیا گیا ہے۔ 27 مئی کو سپریم کورٹ نے اس پالیسی کو چیلنج کرنے والی عرضی پر غور کرنے پر رضامندی ظاہر کی تھی اور مرکزی حکومت، سی بی ایس ای اور این سی ای آر ٹی کو نوٹس جاری کرکے ان سے جواب طلب کیا تھا۔ سی بی ایس ای کی جانب سے جاری ایک سرکلر کے مطابق، یکم جولائی سے نویں جماعت کے طلبہ کے لیے تین زبانوں کا مطالعہ لازمی قرار دیا گیا ہے، جن میں کم از کم دو ہندوستانی زبانیں ہوں گی۔ سی بی ایس ای نے اپنے بیان میں کہا تھا کہ نویں جماعت کا ہر طالب علم تین زبانیں پڑھے گا اور ان میں کم از کم دو ’بھارتیہ بھاشائیں‘ ہوں گی۔

ہندوستانی زبانوں میں ہندی، سنسکرت، تمل، تیلگو، کنڑ، ملیالم، مراٹھی، بنگالی، پنجابی، گجراتی، اوڈیا اور آسامی وغیرہ شامل ہیں، جبکہ انگریزی، فرانسیسی، جرمن، عربی اور ہسپانوی وغیرہ غیر ہندوستانی زبانوں کی مثالیں ہیں۔ چھٹی جماعت کے لیے دو ہندوستانی زبانوں کو لازمی قرار دیا گیا ہے، تاہم ساتویں، آٹھویں اور نویں جماعت کے ان طلبہ کے لیے کچھ رعایتیں دی گئی ہیں جو پہلے دو غیر ہندوستانی زبانیں پڑھ رہے تھے۔

یہ اقدام سی بی ایس ای کے نصاب کو قومی تعلیمی پالیسی 2020 اور اسکول ایجوکیشن کے لیے قومی نصابی فریم ورک 2023 کے مطابق بنانے کا حصہ ہے۔ 15 مئی کو جاری کیے گئے سرکلر کے مطابق، جو طلبہ غیر ملکی زبان پڑھنا چاہتے ہیں، وہ دو ہندوستانی زبانیں پڑھنے کے بعد اسے صرف تیسری زبان کے طور پر اختیار کر سکتے ہیں، یا اسے اضافی چوتھی زبان کے طور پر پڑھ سکتے ہیں۔ سرکلر میں کہا گیا ہے کہ یکم جولائی 2026 سے نویں جماعت میں تین زبانوں (آر ون، آر ٹو اور آر تھری) کا مطالعہ لازمی ہوگا اور ان میں کم از کم دو ہندوستانی زبانیں ہوں گی۔

سی بی ایس ای نے کہا کہ جب تک آر تھری کے لیے مخصوص نصابی کتابیں دستیاب نہیں ہوتیں، نویں جماعت کے طلبہ اپنی منتخب کردہ زبان کے لیے چھٹی جماعت کی آر تھری نصابی کتابیں (2026-27 ایڈیشن) استعمال کریں گے۔ سی بی ایس ای نے یہ بھی کہا ہے کہ طلبہ کی توجہ تعلیم پر برقرار رکھنے اور ان پر غیر ضروری دباؤ کم کرنے کے لیے دسویں جماعت کی سطح پر آر تھری زبان کا کوئی بورڈ امتحان نہیں لیا جائے گا۔ اس کے علاوہ اسکولوں سے کہا گیا ہے کہ وہ 30 جون تک او اے ایس آئی ایس پورٹل پر چھٹی سے نویں جماعت تک آر تھری زبانوں کے اپنے اختیارات کو اپ ڈیٹ کریں۔