کولکاتا: ترنمول کانگریس میں جاری گروہی کشمکش کے درمیان نندی گرام اسمبلی ضمنی انتخاب کے لیے ممتا بنرجی کے خیمے کی امیدوار سَنچیتا پردھان ڈے نے جمعہ کو اپنی نامزدگی واپس لے لی۔ نامزدگی واپس لینے کی آخری تاریخ میں ابھی ایک دن باقی ہے۔ یہ پیش رفت الیکشن کمیشن کی جانب سے 6 اکتوبر کو ہونے والے ضمنی انتخاب کے لیے ممتا بنرجی کی قیادت والے دھڑے کو نیا پارٹی نام اور انتخابی نشان الاٹ کیے جانے کے چند گھنٹے بعد ہوئی۔ پیشے سے ٹیچر سَنچیتا پردھان ڈے کو ممتا خیمے نے نندی گرام سے امیدوار بنایا تھا۔ جمعہ کی دوپہر وہ اپنے شوہر ستیہ جیت کے ساتھ ریاستی سیکریٹریٹ ’نَبَنّا‘ پہنچیں، جہاں انہوں نے مغربی بنگال کے وزیر اعلیٰ شوبھندو ادھیکاری سے ملاقات کی۔

اس ملاقات کے بعد پردھان ڈے نے اپنی نامزدگی واپس لے لی۔ اس کے ساتھ ہی نندی گرام ضمنی انتخاب میں ممتا خیمے کی آل انڈیا ترنمول کانگریس کا کوئی امیدوار نہیں رہا۔ ممتا بنرجی نے کبھی کانگریس سے الگ ہو کر ترنمول کانگریس قائم کرنے کے لیے بغاوت کی تھی، لیکن اب ان کے سیاسی سفر کی شناخت بن چکی اسی پارٹی میں مسلسل بغاوتوں کے باعث اس کی اپنی شناخت کو بحران کا سامنا ہے۔

مغربی بنگال میں 6 اکتوبر کو ہونے والے اسمبلی ضمنی انتخابات سے آل انڈیا ترنمول کانگریس کے نام اور اس کے ’جوڑا گھاس پھول‘ انتخابی نشان کو الگ رکھنے کا الیکشن کمیشن کا عبوری فیصلہ محض انتخابی نشان سے متعلق تنازع نہیں ہے، بلکہ یہ اس پارٹی کی سیاسی وراثت پر جاری ایک بڑے تنازع کی تازہ کڑی ہے۔ 28 سال قبل پارٹی کے قیام کے وقت سے ہی ممتا بنرجی کا اس پر غلبہ رہا ہے۔

اس عبوری حکم کے بعد ایک غیر معمولی صورتحال پیدا ہوگئی ہے۔ پہلی بار ممتا بنرجی کا گروپ اور باغی دھڑا، دونوں ہی اس نام اور انتخابی نشان کے بغیر انتخابات میں اترنے پر مجبور ہوں گے، جس کے تحت ترنمول کانگریس تقریباً تین دہائیوں سے انتخابات لڑتی رہی ہے۔ ممتا بنرجی کے لیے بغاوت کوئی نئی سیاسی زبان نہیں ہے۔ اسی راستے اور سیاسی حکمت عملی کے ذریعے ان کا اپنا سیاسی سفر آگے بڑھا تھا۔ 1990 کی دہائی کے وسط میں کانگریس کی ریاستی یونٹ پر کنٹرول کے معاملے میں ان کا پارٹی کے اس وقت کے ریاستی صدر سومین مترا کے ساتھ شدید تنظیمی اختلاف ہوا۔ مترا اپنے عہدے پر برقرار رہے، جبکہ ممتا نے کانگریس سے الگ ہونے کا فیصلہ کیا۔

ممتا نے 1 جنوری 1998 کو ترنمول کانگریس کی بنیاد رکھی اور کانگریس کے خلاف اپنی سیاسی جدوجہد کو اپنے سیاسی سفر کا اہم مقصد بنا لیا۔ کانگریس کے ایک سینئر رہنما نے پی ٹی آئی بھاشا سے کہا، ’’ہم جہاں سے شروع کرتے ہیں، گھوم پھر کر آخرکار وہیں پہنچ جاتے ہیں، کیونکہ ہم جانتے ہیں کہ تاریخ خود کو دہراتی ہے۔ کانگریس سے الگ ہوکر اپنی پارٹی بنانے کے باوجود انہوں نے کانگریس کو ختم کرنے کی کوشش کی۔ کرم کا حساب کتاب بھی عجیب طریقے سے ہوتا ہے۔‘‘ ممتا کی حکمت عملی اس وقت کامیاب رہی۔ ترنمول کا دائرہ وسیع ہوا اور وہ بائیں محاذ کے لیے اہم سیاسی چیلنج بن گئی۔ بالآخر مغربی بنگال میں مارکسی کمیونسٹ پارٹی (سی پی آئی ایم) کی قیادت والی حکومت کے 34 سالہ اقتدار کو ختم کرنے والی سیاسی تحریک میں ترنمول کانگریس نے اہم کردار ادا کیا۔ پارٹی کے انتخابی نشان پر بھی ممتا کی اپنی چھاپ تھی۔

انہوں نے گھاس سے نکلتے ہوئے دو پھولوں کا خاکہ تیار کیا تھا، جو ان کی زمینی سیاست کی شناخت بن گیا۔ پارٹی میں کئی بار بغاوتیں ہوئیں، لیکن یہ انتخابی نشان برقرار رہا۔ پارٹی کے بانی چیئرمین پنکج بنرجی نے قیام کے کچھ ہی عرصے بعد پارٹی چھوڑ کر کانگریس میں واپسی کی تھی، تاہم بعد میں وہ دوبارہ ترنمول میں آگئے۔ ایک اور بانی رکن اجیت پانجا کے 2001 میں ممتا کی سیاسی حکمت عملی سے اختلافات پیدا ہوئے اور انہوں نے الگ تنظیم بنانے کی ناکام کوشش کی۔ سدیپ بندوپادھیائے کو ممتا سے اختلاف کے بعد پارٹی سے نکال دیا گیا تھا، لیکن کچھ برس بعد وہ دوبارہ ترنمول میں شامل ہوگئے۔

سبرت مکھرجی، جنہیں کبھی ممتا کے سیاسی رہنماؤں میں شمار کیا جاتا تھا، نے بھی پارٹی سے الگ ہوکر ایک دھڑے کی قیادت کی، لیکن بعد میں ترنمول میں واپس آگئے اور ممتا کی کابینہ میں وزیر بنے۔ اسی طرح کی صورتحال دنیش ترویدی اور مکل رائے کے معاملے میں بھی دیکھی گئی۔ 2012 میں ریلوے کرایوں میں اضافے کے معاملے پر ممتا سے اختلاف کے باعث دنیش ترویدی کا ریلوے وزیر کے طور پر دور ختم ہوگیا۔ مکل رائے، جو کبھی تنظیمی اعتبار سے پارٹی کے دوسرے اہم ترین رہنما سمجھے جاتے تھے، ابھیشیک بنرجی کے بڑھتے ہوئے اثر و رسوخ کے بعد ممتا سے الگ ہوگئے۔

وہ 2017 میں بی جے پی میں شامل ہوئے اور 2021 کے اسمبلی انتخابات کے بعد دوبارہ ترنمول میں واپس آگئے۔ کچھ بغاوتوں سے ترنمول کو انتخابی نقصان ہوا، جبکہ کچھ نے پارٹی کی حکمت عملی، ذاتی سیاسی عزائم اور قیادت کی منتقلی سے متعلق اختلافات کو نمایاں کیا۔ تاہم ان میں سے کسی نے بھی پارٹی کی سیاسی قیادت کے مرکز کے طور پر ممتا کی جگہ نہیں لی۔ یہ صورتحال 2022 میں پارٹی کے اندر پیدا ہونے والی افراتفری کے دوران ایک بار پھر سامنے آئی، جب پرانے رہنماؤں اور ابھیشیک بنرجی کی نوجوان قیادت کے درمیان کشیدگی سے ایک بڑے اقتدار کی کشمکش کا خدشہ پیدا ہوگیا تھا۔

اس وقت ممتا نے قومی عہدیداروں کی کمیٹی کو تحلیل کردیا تھا اور تنظیم میں آخری فیصلہ کرنے کی اپنی طاقت کا مظاہرہ کیا تھا۔ سیاسی تجزیہ کار شوبھومے مترا کا ماننا ہے کہ پارٹی میں حالیہ اختلاف نے ایسی کمزوری کو سامنے لایا ہے جو ماضی کی بغاوتوں میں نظر نہیں آئی تھی۔ ترنمول کے سینئر رہنما سوگت رائے نے ریتبرت بنرجی کے دھڑے کی بغاوت سے پیدا ہونے والے بحران سے نمٹنے کی ممتا کی صلاحیت کا دفاع کیا۔ انہوں نے ایسے دور کو ’’سیاسی زندگی میں عارضی‘‘ قرار دیتے ہوئے ممتا کو ’’اس مرحلے کے گزرنے کا انتظار‘‘ کرنے کا مشورہ دیا.