نئی دہلی: مرکزی وزیر برائے پارلیمانی امور کرن رجیجو نے جمعہ کے روز کہا کہ ’’ذہنی نکسلوں‘‘ اور محب وطن ہندوستانیوں کے درمیان جنگ کی لکیر کھنچ گئی ہے۔ انہوں نے لوگوں سے اپیل کی کہ وہ ’’غداروں‘‘ کو یاد رکھیں۔ ان کا یہ بیان سپریم کورٹ کے سینئر وکیل پرشانت بھوشن کے اس بیان کے ایک دن بعد سامنے آیا ہے، جس میں انہوں نے نئی دہلی میں ایک پریس کانفرنس کے دوران حکومت کی تبدیلی کی بات کہی تھی۔
کرن رجیجو نے سوشل میڈیا پلیٹ فارم ایکس پر ایک پوسٹ میں کہا، ’’جنگ کی لکیر کھنچ گئی ہے۔ ایک طرف ذہنی نکسل ہیں اور دوسری طرف محب وطن ہندوستانی۔ ایک طرف وہ لوگ ہیں جو ہندوستان کے آئین پر یقین رکھتے ہیں اور دوسری طرف انتشار پھیلانے والے ہیں۔‘‘ ایک دوسری پوسٹ میں انہوں نے کہا، ’’پیارے محب وطن ہندوستانیو! یاد رکھیں، اپنے دشمنوں کو ایک بار معاف کریں، دوستوں کو دو بار، لیکن غداروں کو کبھی معاف نہ کریں۔‘‘
رجیجو نے ایکس پر پرشانت بھوشن کے دو ویڈیو کلپ بھی شیئر کیے۔ ان کے ساتھ انہوں نے لکھا، ’’وہ کشمیر اور شمال مشرقی ہندوستان کو ہندوستان سے الگ کرنا اور ملک کو توڑنا چاہتے ہیں۔‘‘ بی جے پی کے سینئر رہنما نے پرشانت بھوشن کی ایک حالیہ تصویر بھی شیئر کی، جس میں وہ کانگریس کے ایک رہنما اور دیگر افراد کے ساتھ نظر آ رہے ہیں۔
