نئی دہلی: قومی دارالحکومت میں مارچ میں ہونے والے ’روٹس ایشیا 2027‘ میں 115 سے زائد بڑی ایئر لائن کمپنیوں اور 55 سے زائد ممالک کے نمائندوں کے شرکت کرنے کی امید ہے۔ 16 سے 18 مارچ تک منعقد ہونے والے ’روٹس ایشیا 2027‘ میں ایئر لائن کمپنیوں، ہوائی اڈوں، مختلف مقامات اور ایشیا بحرالکاہل خطے میں فضائی رابطے کے مستقبل سے متعلق ہوا بازی کے شعبے کے اہم فیصلہ ساز افسران شرکت کریں گے۔ ’

روٹس ایشیا 2027‘ کے انعقاد سے قبل منعقد ایک پروگرام میں شہری ہوا بازی کے وزیر رام موہن نائیڈو نے کہا کہ یہ خاص طور پر ایسے وقت میں ایک اہم عالمی ہوا بازی پروگرام ہے، جب دنیا ایک دوسرے سے جڑنے کی کوشش کر رہی ہے۔ انہوں نے کہا، ’’ہندوستان دنیا کی تیسری سب سے بڑی گھریلو ہوا بازی مارکیٹ بن گیا ہے اور ہمارا ہدف عالمی سطح پر تیسری سب سے بڑی ہوا بازی مارکیٹ بننا ہے۔ اس کے لیے فضائی رابطہ بہت اہم ہے۔‘

‘ نائیڈو نے کہا کہ یہ پروگرام ہندوستان کے علاقائی اور بین الاقوامی فضائی رابطے کو نمایاں فروغ دے گا۔ انہوں نے بتایا کہ ’روٹس ایشیا 2027‘ میں 115 سے زائد بڑی ایئر لائن کمپنیوں، 55 سے زائد ممالک کے نمائندوں اور 2500 سے زیادہ بالمشافہ ملاقاتوں کے انعقاد کی امید ہے۔ وزیر نے کہا، ’’یہ صرف پروگرام نہیں ہیں، بلکہ یہ ایک پیغام ہیں۔ یہ دنیا کو بتاتے ہیں کہ ہندوستان صرف دنیا کی سب سے بڑی ہوا بازی مارکیٹ بننا نہیں چاہتا، بلکہ ایشیا اور اس سے آگے کے ہوا بازی کے شعبے کو نئی شکل دینے میں بھی شراکت دار بننا چاہتا ہے۔‘‘