چنئی: تمل ناڈو حکومت نے ریاستی بجلی تقسیم کار کمپنی ٹی این پی ڈی سی ایل میں فیلڈ اسسٹنٹ کی 8,000 آسامیوں پر براہ راست بھرتی کو منظوری دے دی ہے۔ یہ بھرتی تمل ناڈو پبلک سروس کمیشن (ٹی این پی ایس سی) کے ذریعے کی جائے گی۔

محکمہ توانائی کی جانب سے 28 اکتوبر کو جاری کردہ سرکاری حکم نامے کے مطابق، بھرتی کا عمل 2 سال میں مرحلہ وار مکمل کیا جائے گا۔ اس کے تحت 2027 میں 5,000 اور 2028 میں 3,000 آسامیوں کو پُر کیا جائے گا۔ یہ فیصلہ تمل ناڈو پاور ڈسٹری بیوشن کارپوریشن لمیٹڈ (ٹی این پی ڈی سی ایل) کے چیئرمین اور منیجنگ ڈائریکٹر کی جانب سے پیش کردہ تجویز کے بعد کیا گیا ہے۔

ریاستی حکومت کے منظور شدہ مالی تخمینے کے مطابق، تمام 8,000 آسامیوں پر تقرری مکمل ہونے کے بعد ان ملازمین کی تنخواہوں اور دیگر الاؤنسز پر سالانہ تقریباً 341.26 کروڑ روپے خرچ ہوں گے۔ حکم نامے کے مطابق، 2027 میں پہلے مرحلے کے تحت بھرتی کیے جانے والے 5,000 ملازمین پر سالانہ 213.28 کروڑ روپے خرچ ہونے کا اندازہ ہے۔

اس طرح ماہانہ اخراجات تقریباً 17.77 کروڑ روپے ہوں گے۔ اس کے بعد 2028 میں مزید 3,000 ملازمین کی تقرری سے سالانہ 127.97 کروڑ روپے کا اضافی خرچ آئے گا، جو ماہانہ تقریباً 10.66 کروڑ روپے ہوگا۔ ان آسامیوں کے لیے بنیادی تنخواہ کا پیمانہ 18,800 روپے سے 59,900 روپے مقرر کیا گیا ہے۔

حکومت کے پرنسپل سکریٹری انل میشرام کے دستخط سے جاری حکم نامے کے مطابق، مہنگائی بھتہ (ڈی اے) 60 فیصد، مکان کرایہ بھتہ (ایچ آر اے)، سٹی کمپنسیٹری الاؤنس (سی سی اے)، میڈیکل الاؤنس اور کنٹری بیوٹری پنشن اسکیم (سی پی ایس) میں آجر کی جانب سے دیے جانے والے تعاون کو شامل کرنے کے بعد فی ملازم ماہانہ مجموعی خرچ 35,548 روپے ہوگا۔