باضابطہ گرفتاری سے قبل طویل حراست شخصی آزادی کی خلاف ورزی: عدالت

Story by  PTI | Posted by  [email protected] | Date 21-11-2026
باضابطہ گرفتاری سے قبل طویل حراست شخصی آزادی کی خلاف ورزی: عدالت
باضابطہ گرفتاری سے قبل طویل حراست شخصی آزادی کی خلاف ورزی: عدالت

 



نئی دہلی: دہلی کی ایک عدالت نے ڈرون کے پرزوں کی اسمگلنگ کے ایک ملزم کو ضمانت دیتے ہوئے کہا ہے کہ کسی شخص کو باضابطہ گرفتاری سے قبل 24 گھنٹے سے زیادہ حراست میں رکھنا اس کے بنیادی حقِ شخصی آزادی اور گرفتاری سے متعلق آئینی دفعات کی خلاف ورزی ہے۔ ایڈیشنل سیشن جج سوربھ پرتاپ سنگھ لالر نے 18 نومبر کو اپنے حکم میں ملزم شعیب نواب خان کو ضمانت دے دی۔ خان 27 ستمبر سے عدالتی حراست میں تھا۔ ملزم کی جانب سے ایڈوکیٹ ترون رانا عدالت میں پیش ہوئے۔ عدالت نے اپنے حکم میں کہا کہ باضابطہ گرفتاری سے قبل خان ’’24 گھنٹے سے زیادہ وقت تک کسٹم حکام کے کنٹرول میں رہا اور اس کی آزادانہ نقل و حرکت پر پابندی عائد رہی۔‘‘

عدالت نے کہا، ’’ہوائی جہاز سے اترنے کے فوراً بعد سامان کی جانچ اور ضروری کارروائی مکمل کرنے کے لیے کسی شخص کو روکنا اور کچھ وقت تک حراست میں رکھنا قابل قبول ہے۔‘‘ تاہم عدالت نے کہا، ’’کسی شخص کو 25 ستمبر کی رات سے 27 ستمبر کی صبح تک حراست میں رکھنا اور اس طرح اس کی باضابطہ گرفتاری اور اس سے متعلق آئینی تحفظات کے نفاذ میں تاخیر کرنا قانون کے تحت ناقابل قبول ہے۔‘‘ عدالت نے آئین کے آرٹیکل 22(2) کا حوالہ دیا، جس کے تحت گرفتار شخص کو 24 گھنٹے کے اندر قریبی مجسٹریٹ کے سامنے پیش کرنا لازمی ہے۔

عدالت نے کہا کہ یہ آئینی تحفظ ’’اسی لمحے سے نافذ ہوجاتا ہے، جب کسی شخص کو حراست میں لے کر اس کی آزادی محدود کردی جاتی ہے، نہ کہ اس وقت سے جب باضابطہ طور پر اس کی گرفتاری درج کی جاتی ہے۔‘‘ عدالت نے مزید کہا، ’’تحقیقات کے نام پر یا دفتر کے احاطے میں آرام کرنے کے بہانے کسی شخص کو طویل عرصے تک حراست میں رکھنا اور پھر اپنی سہولت کے مطابق اس کی باضابطہ گرفتاری درج کرنا، 24 گھنٹے کے اندر مجسٹریٹ کے سامنے پیش کرنے کی آئینی پابندی سے بچنے کا ایک طریقہ ہے۔‘‘

عدالت کے مطابق، اگر ابتدائی جانچ اور پوچھ گچھ کے بعد محکمہ کسٹم کے پاس کسٹم ایکٹ کی دفعات کے تحت ملزم کو گرفتار کرنے کے لیے کافی بنیاد موجود نہیں تھی تو اسے رہا کردینا چاہیے تھا۔ بعد میں تحقیقات کے دوران ضرورت پڑنے پر اسے گرفتار کیا جاسکتا تھا۔ عدالت نے کہا، ’’کسی شخص کی آزادی پر پابندی برقرار رکھتے ہوئے اسے باضابطہ گرفتاری کے بغیر طویل عرصے تک حراست میں رکھنا آئین کے آرٹیکل 21 میں شامل شخصی آزادی کے بنیادی اصول اور آرٹیکل 22 کے تحت فراہم کردہ خصوصی تحفظات کی خلاف ورزی ہے۔‘‘

عدالت نے محکمہ کسٹم کی اس دلیل کو بھی مسترد کردیا کہ خان مسلسل غیر قانونی حراست میں نہیں تھا، کیونکہ اس نے خود کسٹم دفتر میں آرام کرنے اور اگلی صبح تفتیشی کارروائی میں شامل ہونے کے لیے تحریری درخواست دی تھی۔ محکمہ کسٹم نے الزام لگایا تھا کہ خان اور دو دیگر افراد ہانگ کانگ سے ویتنام ہوتے ہوئے دہلی پہنچے تھے۔ وہ 25 ستمبر کی رات تقریباً 11 بجے اندرا گاندھی بین الاقوامی ہوائی اڈے کے ٹرمینل-3 پر اترے تھے۔ محکمہ کے مطابق، ان کے قبضے سے مبینہ طور پر ’آٹیل روبوٹکس‘ کے 10 ڈرون، ریموٹ کنٹرولر، اڈاپٹر، کیبلز اور دیگر پرزوں کے علاوہ ایک آئی فون بھی ضبط کیا گیا تھا۔

ان تمام اشیا کی مجموعی قیمت ایک کروڑ روپے سے زیادہ بتائی گئی۔ استغاثہ نے دعویٰ کیا تھا کہ یہ ڈرون فوجی استعمال کی صلاحیت رکھنے والے بغیر پائلٹ کے فضائی طیارے (یو اے وی) ہیں، جن کی درآمد پر پابندی عائد ہے۔ عدالت نے خان کو ایک لاکھ روپے کے ذاتی مچلکے اور اتنی ہی رقم کی ایک ضمانت جمع کرانے کی شرط پر رہا کرنے کا حکم دیا۔ عدالت نے واضح کیا کہ اس کے تبصرے ’’ابتدائی نوعیت کے ہیں اور صرف موجودہ ضمانت کی درخواست تک محدود ہیں۔‘‘ واضح رہے کہ خان کی پہلی ضمانت کی درخواست 27 اکتوبر کو مجسٹریٹ عدالت نے مسترد کردی تھی۔